ຜີເຮ!! ກາໝີໂອເຄປ່ອຍກຣິສມັນ

 

ວິນເຊນ ໂຣດຣິເກດ ອະດີດນາຍໜ້ານັກເຕະຄົນໜຶ່ງລະບຸ ແມນເຊສເຕີ ຢູໄນເຕັດ ກັບ ແອັດເລຕິໂກ ມາດຣິດ ບັນລຸຂໍ້ຕົກລົງເລື່ອງການຍ້າຍທີມຂອງ ອັອງຕວນ ກຣິສມັນ ຫົວຫອກທີມຊາດຝຣັ່ງຮຽບຮ້ອຍ ພ້ອມຊີ້ຂ່າວຈະມີຂ່າວອອກມາເລື້ອຍໆຫຼັງຈາກນີ້ແນ່ນອນ.

 

ແມນເຊສເຕີ ຢູໄນເຕັດ ສະໂມສອນຍັກໃຫຍ່ຂອງ ພຣີເມຍລີກ ບັນລຸຂໍ້ຕົກລົງກັບ ແອັດເລຕິໂກ ມາດຣິດ ສະໂມສອນຊັ້ນນຳຂອງ ລາ ລີກາ ສະເປນ ໃນການດຶງຕົວ ອັອງຕວນ ກຣິສມັນ ກອງໜ້າເລືອດນຳ້ຫອມມາຮ່ວມທັບຮຽບຮ້ອຍແລ້ວ ຕາມການລາຍງານຂອງ ວິນເຊນ ໂຣດຣິເກດ ອະດີດນາຍໜ້ານັກເຕະບານລາຍໜຶ່ງ.

 

ກຣິສມັນ ຕົກເປັນຂ່າວກັບ ແມນຢູ ຢ່າງໜັກຕະຫຼອດຊ່ວງ 2-3 ເດືອນທີ່ຜ່ານມາ ໂດຍລາຍງານຫຼາຍແຫ່ງລະບຸວ່າ ໂຊເຊ ມູຣິນໂຢ ຜູ້ຈັດການທີມ “ຜີສາດແດງ” ໝາຍຫົວໃຫ້ເຂົາເປັນເປົ້າໝາຍຫຼັກສຳລັບການເສີມທັບໃນຊ່ວງຊຳເມີນີ້ ເນື່ອງຈາກຕ້ອງການເພີ່ມຄວາມໂຫດໃນເກມບຸກຂອງທີມ.

 

ເປັນທີ່ເຊື່ອກັນວ່າ ກຣິສມັນ ມີຄ່າຈີກສັນຍາສູງເຖິງ 100 ລ້ານເອີໂຣ ເຖິງແບບນັ້ນ ໂຣດຣິເກດ ກໍເຜີຍວ່າທັງສອງທີມຕົກລົງເລື່ອງການເຮັດທຸລະກິດນຳກັນໄດ້ແລ້ວ ໂດຍກ່າວຜ່ານ ທະວິດເຕີ ເຄືອຂ່າຍສັງຄົມອອນລາຍວ່າ “ມີການບັນລຸຂໍ້ຕົກລົງຂັ້ນສຸດທ້າຍລະຫວ່າງ ແອັດ ມາດຣິດ ກັບ ແມນເຊສເຕີ ຢູໄນເຕັດ ກ່ຽວກັບການຍ້າຍທີມຂອງ ກຣິສມັນ ແລ້ວ ແລະ ມັນກໍຈະມີຂ່າວອອກມາເລື້ອຍໆໃນໄວໆນີ້”.

 

ທັງນີ້ເມື່ອບໍ່ດົນມານີ້ ເອຣິກ ໂອນຮັດ ທີ່ປຶກສາດ້ານການກິລາຂອງ ກຣິສມັນ ຢືນຢັນເອງວ່າ ແມນ ຢູໄນເຕັດ ໄດ້ເຮັດການຕິດຕໍ່ຂໍຊື້ນັກເຕະແທ້ ໂດຍລະດູການນີ້ ກຣິສມັນ ຍັງຄົງໂຊຟອມເທບໄດ້ຢ່າງໂດດເດັ່ນຫຼັງຍິງໄປແລ້ວ 25 ລູກຈາກການລົງຫຼິ້ນລວມທຸກລາຍການ 46 ນັດ.