ຜີເອົາໃຈອິບາ!! ຖ້າມາສິໃຫ້ໃສ່ເບີ 9

 

ສື່ອັງກິດປ່ອຍຂ່າວຍົ້ວໃຈແຟນ “ຜີແດງ” ວ່າ ແມນເຊສເຕີ ຢູໄນເຕັດ ກຽມເປີດທາງເບີ 9 ໃຫ້ກັບ ຊະລາຕັນ ອິບາຮິໂມວິດ ຫົວຫອກເລືອດສະວິເດັນໃສ່ລ່າຕານ່າງໃນລະດູການໜ້າແລ້ວຍ້າຍ ອອງໂຕນີ ມາຊີຢານ ໄປໃສ່ເບີ 7 ແທນ ເມມຟິສ ເດປາຍ ທີ່ອະນາຄົດໃນຖິ່ນ ໂອນ ທຣາຟເຟິດ ຍັງບໍ່ແນ່ນອນ.

 

ແມນເຊສເຕີ ຢູໄນເຕັດ ສະໂມສອນຍັກໃຫຍ່ຈາກ ພຣີເມຍລີກ ພ້ອມເອົາໃຈ ຊະລາຕັນ ອິບາຮິໂມວິດ ກອງໜ້າຂອງ ປາຣີ ແຊັງ-ແຊັກແມັງ ໂດຍການມອບເສື້ອໝາຍເລກ 9 ໃຫ້ໃສ່ຖ້າວ່າຍ້າຍມາຫຼິ້ນໃຫ້ກັບ ຜີສາດແດງ ຕາມການລາຍງານຂອງ ເດິຊັນ ສື່ເຈົ້າມະໂນຂອງເມືອງຜູ້ດີເມື່ອວັນພະຫັດນີ້.

ດາວເຕະທີມຊາດສະວີເດັນອາຍຸ 34 ປີ ຈະໝົດສັນຍາກັບ ເປເອັດເຊ ຢ່າງເປັນທາງການໃນເດືອນມິຖຸນານີ້ເຮັດໃຫ້ເຂົາສາມາດເຊັນສັນຍາກັບສະໂມສອນໃດກໍໄດ້ເຊິ່ງມີຫຼາຍທີມທີ່ໃຫ້ຄວາມສົນໃຈທັງ ແມນຢູ, ທີມໃນ ເມເຈີລີກ ຊັອກເກີ ແລະ ສະໂມສອນໃນ ຊາຍນິດ ຊຸບເປີລີກ ເປັນຕົ້ນ.

 

“ເດິຊັນ” ແຜ່ຂ່າວວ່າ “ຜີສາດແດງ” ກຽມປ່ຽນແປງເບີເສື້ອຂອງນັກເຕະທີ່ຈະໃຊ້ໃນລະດູການໜ້າ ໂດຍພ້ອມໃຫ້ໝາຍເລກ 9 ກັບ ອິບາຮິໂມວິດ ສ່ວນ ອອງໂຕນີ ມາຊີຢານ ກອງໜ້າທີມຊາດຝຣັ່ງທີ່ໃສ່ເບີ 9 ໃນລະດູການຜ່ານມາຈະປ່ຽນໄປໃສ່ເບີ 7 ແທນ ເມມຟິສ ເດປາຍ ປີກດາວລຸ້ງທີມຊາດໂຮນລັງທີ່ຍັງເຮັດຜົນງານໄດ້ບໍ່ເປັນຕາພໍໃຈ.

 

 

ບົດຄວາມໃຫມ່ໆ