ຜີເປີດແຜນຫວັງດຶງໂດ້ກັບຮັງ

 

ແມນເຊສເຕີ ຢູໄນເຕັດ ວາງແຜນ ແລະ ຄິດກົນລະຍຸດເພື່ອດຶງ ຄຣິສຕຽນໂນ ໂຣເນົາໂດ ກັບສູ່ ໂອນ ທຣາຟເຟິດ ໃຫ້ໄດ້ໂດຍຫຼ້າສຸດກຽມໃຫ້ ເຊີ ອາເລັກ ເຟີກູສັນ ເປັນທູດພິເສດເພື່ອຈັດການໆດິວຄັ້ງນີ້ໂດຍສະເພາະ.

ໃນເວລານີ້ ໂຣເນົາໂດ ບໍ່ແຮັບປີກັບສະຖານະການທີ່ ເຣອັນ ມາດຣິດ ແລະ ມີຂ່າວລືຢ່າງໜັກວ່າພ້ອມທີ່ຈະຍ້າຍທີມເຊິ່ງ ແມນ ຢູໄນເຕັດ ແລະ ປາຣີ ແຊງ-ແຊັກແມງ ລວມໄປເຖິງທີມໃນລີກຈີນພ້ອມທຸ່ມງົບປະມານເຕັມທີ່ໃນການດຶງຕົວ ໂຣເນົາໂດ ໃຫ້ກັບມາຮ່ວມທັບໃຫ້ໄດ້.

ຫຼ້າສຸດສື່ໃນອັງກິດລາຍງານວ່າ ແມນ ຢູໄນເຕັດ ກຽມໃຊ້ “ເຟີກີ້” ອະດີດນາຍໃຫຍ່ຜູ່ສ້າງ ໂຣເນົາໂດ ຂຶ້ນມາຈົນໂດ່ງດັງເປັນຕົວກາງໃນການໂອ້ລົມ ແລະ ເຈລະຈາຂັ້ນຕອນສຸດທ້າຍເພື່ອຊັກຊວນ ໂຣເນົາໂດ ໃຫ້ກັບມາຫຼິ້ນທີ່ ແມນ ຢູໄນເຕັດ ອີກຄັ້ງ.

ທັງນີ້ ໂຣເນົາໂດ ຍັງມີຄວາມສຳພັນທີ່ດີກັບ ເຟີກູສັນ ໂດຍຕອນທີ່ ເຟີກີ້ ມີຮູບປັ້ນໜ້າສະໜາມ ໂຣເນົາໂດ ກໍໄດ້ຖ່າຍຄລິບຕົນເອງມາສະແດງຄວາມຍິນດີກັບບອສເຊັ່ນດຽວກັບທຸກເທື່ອທີ່ທັງສອງໄດ້ໂອກາດພົບກັນ ໂຣເນົາໂດ ຈະເຂົ້າທັກທາຍ ເຟີກີ້ ດ້ວຍຄວາມເຄົາລົບສະເໝີ ແລະ ເອີ້ນ ເຟີກີ້ ວ່າ “ບອສ” ທຸກເທື່ອດັ່ງນັ້ນ ການທີ່ ແມນ ຢູໄນເຕັດ ໃຊ້ ເຟີກີ້ ເປັນຕົວກາງກໍມີສິດໂນ້ມນ້າວໃຈ ໂຣເນົາໂດ ໄດ້ບໍ່ຍາກ.

ສຳລັບ ໂຣເນົາໂດ ມີບັນຫາເລື່ອງການລ່ຽງພາສີມູນຄ່າ 14.7 ລ້ານເອີໂຣຈົນຖືກໄອຍະການທີ່ສະເປນສັ່ງຟ້ອງເຊິ່ງຖ້າວ່າ ເຣອັນ ມາດຣິດ ບໍ່ຊ່ວຍຈັດການບັນຫານີ້ເຂົາກໍພ້ອມທີ່ຈະຍ້າຍທີມແນ່ນອນໃນຊ່ວງຊຳເມີນີ້.