ຜີສາດແດງ ເຈັບ!! ບາເຊໂລນາ ກຽມຕໍ່ສັນຍາສະບັບໃໝ່ກັບ ເນມາ

ແມນຢູ ອາດຈະຕ້ອງຍຸຕິຄວາມສົນໃຈທີ່ຈະດຶງໂຕ ເນມາ ດາວຍິງຊາດ ບຣາຊິວ ຂອງ ບາເຊໂລນາ ແລ້ວເມື່ອ “ເຈົ້າບຸນທຸ່ມ” ວາງແຜນທີ່ຈະຕໍ່ສັນຍາສະບັບໃໝ່ກັບ ເນມາ ໄວໆນີ້ພ້ອມທັງຈະປະເຄນຄ່າເມື່ອຍໃຫ້ເຖິງ 500,000 ປອນຕໍ່ອາທິດອີກດ້ວຍ.

ບາເຊໂລນາ ຍັກໃຫຍ່ຈາກ ລາ ລີກາ ສະເປນ ກຽມພ້ອມທີ່ຈະຍື່ນສັນຍາສະບັບໃໝ່ໄລຍະຍາວພ້ອມເພີ່ມຄ່າເມື່ອຍເຖິງ 500,000 ປອນຕໍ່ອາທິດໃຫ້ກັບ ເນມາ ກອງໜ້າໂຕສໍາຄັນຂອງທີມໃນໄວໆນີ້ ເພື່ອກີດກັນບໍ່ໃຫ້ ແມນຢູ ທີມດັງຈາກ ພຣີເມຍລີກ ອັງກິດ ມາດຶງໂຕໄປຈາກຖິ່ນ ແຄມນູ ຈາກການລາຍງານຂອງ “ເດິ ມິເລີ” ສື່ກິລາດັງຂອງເມືອງຜູ້ດີເມື່ອວັນພຸດທີ 28 ຕຸລາທີ່ຜ່ານມາ.

ກອງໜ້າທີມຊາດ ບຣາຊິວ ຕົກເປັນຂ່າວພົວພັນກັບ “ຜີສາດແດງ” ມາຕະຫຼອດຊ່ວງພັກລະດູການທີ່ຜ່ານມາ ເຊິ່ງພໍ່ຂອງນັກເຕະກໍຍອມຮັບວ່າ ແມນຢູ ຍື່ນຂໍ້ສະເໜີຫາລູກຊາຍຂອງຕົນແທ້ກ່ອນທີ່ ບາຊາ ຈະປັດຂໍ້ສະເໜີໄປ ແລະ “ເຈົ້າບຸນທຸ່ມ” ກໍພ້ອມທີ່ຈະປະເຄນຄ່າເມື່ອຍກ້ອນໃຫຍ່ໃຫ້ກັບກອງໜ້າອາຍຸ 23  ປີ ສູງເຖິງ 500,000 ຕໍ່ອາທິດ ເຊິ່ງຖ້າວ່າເປັນຄວາມຈິງກໍຈະເຮັດໃຫ້ ເນມາ ກາຍເປັນນັກເຕະທີ່ມີຄ່າເມື່ອຍສູງທີ່ສຸດໃນໂລກ ເປັນຮອງພຽງແຕ່ ເມສຊີ ກັບ ໂຣນັນໂດ້ ເທົ່ານັ້ນ ໂດຍພ້ອມທີ່ຈະລົງປາກກາກັນຊ່ວງທ້າຍປີນີ້.

ໂຈເຊບ ມາເຣຍ ບາໂຕເມວ ປະທານສະໂມສອນ “ອາຊູກຣານາ” ກ່າວວ່າ “ເຮົາຈະປັບປຸງສັນຍາໃໝ່ຂອງ ເນມາ ໃນລະດູການນີ້ແຕ່ເຮົາຈະບໍ່ພະຍາຍາມເວົ້າເຖິງການເຈລະຈາຕໍ່ລອງກັນ ແລະ ເຮົາຈະເຮັດວຽກກັນແບບສຸກຂຸມຈົນກວ່າເຮົາຈະສາມາດປະກາດເລື່ອງດັ່ງກ່າວອອກມາຢ່າງເປັນທາງການໄດ້”.

..........................................................................................................................................................................