ຜີພ້ອມອັດເມັດເງິນຈີກສັນຍາດຶງ ກຣິສມັນ ເສີມຄົມ

 

ແອັດ ມາດຣິດ ອາດຈະຕ້ອງເມື່ອຍໜັກໃນການພະຍາຍາມດຶງ ກຣິສມັນ ເອົາໄວ້ກັບທີມຕໍ່ໄປຫຼັງຈາກທີ່ ແມນຢູໄນເຕັດ ວາງແຜນທຸ່ມຈີກສັນຍາດຶງນັກເຕະເລືອດນ້ຳຫອມໄປເສີມທັັບໃນລະດູການໜ້າ ຫຼັງຈາກທີ່ເບິ່ງແລ້ວຕ້ອງກິນແຫ້ວ 2 ເປົ້າໝາຍຫຼັກຄື ໂຣນັນໂດ ແລະ ອິບາຮິໂມວິດ.

 

ແມນເຊສເຕີ ຢູໄນເຕັດ ສະໂມສອນຍັກໃຫຍ່ຈາກ ພຣີເມຍລີກ ກຽມທຸ່ມເງິນ 63.1 ລ້ານປອນຕາມເງື່ອນໄຂຄ່າຊື້ສັນຍາເພື່ອດຶງໂຕ ອອງຕວນ ກຣິສມັນ ກອງໜ້າຂອງ ແອັດເລຕິໂກ ມາດຣິດ ມາເສີມທັບໃນຊ່ວງຊຳເມີນີ້ ຈາກການລາຍງານຂອງ ເອວ ກອນຟິເດນຊຽວ ໜັງສືພີມສະເປນເມື່ອວັນພຸດທີ່ຜ່ານມາ.

ລາຍງານລະບຸວ່າ “ຜີສາດແດງ” ຫັນເປົ້າມາທີ່ດາວເຕະທີມຊາດຝຣັ່ງເນື່ອງຈາກບໍ່ໝັ້ນໃຈວ່າຈະສາມາດດຶງ 2 ເປົ້າໝາຍຫຼັກຄື ໂຣນັນໂດ ແລະ ອິບາຮິໂມວິດ ມາເສີມເກມບຸກໄດ້ ຫຼື ບໍ່ ຫຼັງສື່ແດນກະທິງປ່ອຍຂ່າວວ່າ ດາວດັງທີມຊາດປັອກຕຸຍການອາດຈະຂະຫຍາຍສັນຍາກັບ ເຣອັນ ມາດຣິດ ອອກໄປ ຂະນະທີ່ຫົວຫອກຈາກສະວີເດັນທີ່ຈະໝົດສັນຍາກັບ ເປເອັດເຊ ຫຼັງຈົບລະດູການນີ້ໄດ້ຮັບຄວາມສົນໃຈຈາກ ຢູເວັນຕຸດ.

 

ທາງດ້ານ ເດລີ ເອັກສະເພດ ສື່ດັງຈາກອັງກິດລະບຸວ່າບອດບໍລິຫານ ແມນຢູ ມຸ່ງໝັ້ນໃນການດຶງແຄ່ງຊັ້ນນຳເຂົ້າມາເສີມທັບໃນຊ່ວງໜ້າຮ້ອນນີ້ ແລະ ເບິ່ງວ່າ ກຣິສມັນ ທີ່ຫາກໍຊ່ວຍໃຫ້ ແອັດ ມາດຣິດ ຜ່ານເຂົ້າສູ່ຮອບຊິງຊະນະເລີດ ຢູຟາ ແຊມປຽນລີກ ເມື່ອວັນອັງຄານທີ່ຜ່ານມາເປັນຕົວເລືອກທີ່ເໝາະສົມທີ່ຈະເຂົ້າມາແກ້ໄຂບັນຫາປືນຝືດໃນແດນໜ້າໄດ້ຢ່າງແນ່ນອນ.