ຜີຍອມຈ່າຍຫຼາຍແສນປອນເພື່ອຊື້ລິຂະສິດມູຈາກສິງ

 

ບີບີຊີ ສື່ດັງຂອງເມືອງຜູ້ດີປ່ອຍຂ່າວ ແມນ ຢູໄນເຕັດ  ອາດຈະຕ້ອງຍອມຈົກເງິນຫຼາຍແສນປອນໃຫ້ກັບ ເຊວຊີ ເພື່ອຊື້ລິຂະສິດທາງພາບລັກຂອງ ໂຊເຊ ມູຣິນໂຢ ຈົນຊ່ວຍໃຫ້ເຊັນສັນຍາກັບກຸນຊືເລືອດປັອກຕຸຍການໄດ້ງ່າຍຂຶ້ນຫຼັງຈາກທີ່ ເຊວຊີ ຖືຄອງສິດດັ່ງກ່າວຢູ່.

 

ແມນເຊສເຕີ ຢູໄນເຕັດ ສະໂມສອນຍັກໃຫຍ່ຂອງ ພຣີເມຍລີກ ອາດຈະຕ້ອງຈົກເງິນເປັນຈຳນວນຫຼາຍແສນປອນໃຫ້ກັບ ເຊວຊີ ເພື່ອເຮັດໃຫ້ສາມາດເຊັນສັນຍາກັບ ໂຊເຊ ມູຣິນໂຢ ນາຍໃຫຍ່ຄົນດັງໄດ້ງ່າຍຂຶ້ນ ຕາມການລາຍງານຂອງ ບີບີຊີ ສື່ດັງຂອງເມືອງຜູ້ດີ.

 

ທັນທີທີ່ ແມນຢູ ແຍກທາງກັບ ຫຼຸຍ ຟານກາວ ໄປເມື່ອວັນຈັນທີ່ຜ່ານມາພວກເຂົາກໍເດີນເລື່ງເຈລະຈາກັບ ມູຣິນໂຢ ຢ່າງຕໍ່ເນື່ອງຫຼັງຈາກທີ່ຕົກເປັນຂ່າວວ່າໃຫ້ຄວາມສົນໃຈໃນຕົວອະດີດນາຍໃຫຍ່ ເຊວຊີ ມາດົນແລ້ວ.

 

ທັງນີ້ມີລາຍງານລະບຸວ່າທັງສອງຝ່າຍສາມາດຊອກຂໍ້ສະຫຼຸບໃນເງື່ອນໄຂຫຼາຍຢ່າງໄດ້ເປັນທີ່ຮຽບຮ້ອຍເຊັ່ນ ໄລຍະເວລາຂອງສັນຍາ ແລະ ຄ່າເມື່ອຍເປັນຕົ້ນ ແຕ່ບັນຫາໃນບາງປະເດັນເຊິ່ງໃນນັ້ນແມ່ນລິຂະສິດທາງພາບລັກຂອງ ມູຣິນໂຢ ເນື່ອງຈາກ ເຊວຊີ ຄອບຄອງລິຂະສິດນັ້ນຢູ່.

 

ບີບີຊີ ເຜີຍວ່າ ເຊວຊີ ຍື່ນເລື່ອງເປັນຜູ້ຄອບຄອງລິຂະສິດທັງຊື່ ມູຣິນໂຢ ແລະ ລາຍເຊັນຂອງເຂົາຕັ້ງແຕ່ເມື່ອປີ 2005 ແລ້ວ ນັ້ນໝາຍຄວາມວ່າພວກເຂົາສາມາດໃຊ້ມັນເຮັດການຂາຍສິນຄ້າຕ່າງໆໄດ້ ແລະ ໃຜທີ່ເອົາຊື່ ແລະ ລາຍເຊັນຂອງ ມູຣິນໂຢ ໄປໃຊ້ກໍຖືເປັນການລະເມີດລິຂະສິດນັ້ນເອງ ຢ່າງໃດກໍຕາມສື່ເຈົ້າເກົ່າລະບຸວ່າປະເດັນດັ່ງກ່າວຈະບໍ່ເຮັດໃຫ້ການເຮັດສັນຍາລະຫວ່າງ ແມນຢູ ກັບ ມູຣິນໂຢ ຕ້ອງພັງລົງແຕ່ຢ່າງໃດ.