ຜີກຽມເຊັນຊິວວາຮ່ວມທັບແລ້ວ

 

ສື່ຝຣັ່ງລະບຸ ແມນເຊສເຕີ ຢູໄນເຕັດ ກຽມແລ້ວທີ່ຈະໄດ້ ແບນາໂດ ຊິວວາ ປີກຈອມພິ້ວຂອງ ອາແອສ ໂມນາໂກ ມາຮ່ວມທີມໂດຍ “ຜີສາດແດງ” ຫວັງເປີດການເຈລະຈາໃຫ້ໄດ້ໂດຍໄວກ່ອນທີ່ທີມອື່ນຈະຕັດໜ້າໄປກ່ອນ.

 

ແມນເຊສເຕີ ຢູໄນເຕັດ ສະໂມສອນຍັກໃຫຍ່ຂອງ ພຣີເມຍລີກ ອັງກິດໃກ້ແລ້ວທີ່ຈະໄດ້ຕົວ ແບນາໂດ ຊິວວາ ປີກຕົວເກັ່ງຂອງ ອາແອສ ໂມນາໂກ ສະໂມສອນຈ່າຝູງຂອງ ລີກ ແອັງ ຝຣັ່ງມາຮ່ວມດ້ວຍຄ່າຫົວ 42.5 ລ້ານປອນແລ້ວ ຫຼັງຈາກທີ່ມີຄວາມຄືບໜ້າໃນການເຈລະຈາເລື່ອງດັ່ງກ່າວ ຕາມລາຍງານຂອງ ຟຣັອງ ຟຸດບອນ ສື່ວົງການລູກໜັງແດນນຳ້ຫອມເມື່ອວັນອັງຄານທີ່ຜ່ານມາ.

 

ເປັນທີ່ເຊື່ອກັນວ່າ ຊິວວາ ຕົກເປັນທີ່ສົນໃຈຂອງຫຼາຍທີມທະວີບເອີຣົບຫຼັງຈາກທີ່ເຮັດຜົນງານໄດ້ດີກັບ ໂມນາໂກ ໃນລະດູການນີ້ ໂດຍນອກຈາກ “ຜີສາດແດງ” ແລ້ວນັ້ນທີມດັງອື່ນໆຈາກ ພຣີເມຍລີກ ເຊັ່ນ ອາເຊນອນ, ແມນເຊສເຕີ ຊີຕີ ແລະ ເຊວຊີ ຕາງກໍກຳລັງຈັບຕາເບິ່ງສະຖານະການຂອງ ດາວເຕະທີມຊາດປັອກຕຸຍການອາຍຸ 22 ປີຢູ່ເຊັ່ນກັນ.

 

ທັງນີ້ ວາດິມ ວາຊິວເຢບ ຮອງປະທານ ໂມນາໂກ ຫາກໍພະຍາຍາມຫຼຸດກະແສຂ່າວການຍ້າຍທີມຂອງ ຊິວວາ ໂດຍການບອກວ່າ ຕອນນີ້ບໍ່ມີໃຜໃນທີມຍື່ນເລື່ອງຂໍຍ້າຍທີມ ແຕ່ຫຼ້າສຸດ ຟຣັອງ ຟຸດບອນ ເຜີຍວ່າຕອນນີ້ທັງສອງທີມເຈລະຈາເລື່ອງການຍ້າຍທີມຂອງນັກເຕະຢູ່ ແລະ ໃກ້ຈະໄດ້ຮັບບົດສະຫຼຸບແລ້ວ ໂດຍທີ່ “ຜີສາດແດງ” ຢາກໃຫ້ແລ້ວໃຫ້ໄດ້ກ່ອນທີ່ຄູ່ແຂ່ງລາຍອື່ນໆຈະເດີນເລື່ອງທາບທາມນັກເຕະ.

 

ຟຣັອງ ຟຸດບອນ ເສີມວ່າ ໂຊເຊ ມູຣິນໂຢ ນາຍໃຫຍ່ຂອງ ແມນ ຢູໄນເຕັດ ກຳນົດໃຫ້ ຊິວວາ ເປັນເປົ້າໝາຍຫຼັກຂອງການເສີມທັບໃນຊ່ວງຊຳເມີນີ້ໂດຍລະດູການນີ້ ຊິວວາ ຍິງໃນລີກໄດ້ 8 ລູກພ້ອມກັບເຮັດແອັດຊິດໄດ້ອີກ 9 ເທື່ອຈົນເປັນໜຶ່ງໃນກຳລັງສະຄັນທີ່ຊ່ວຍໃຫ້ ໂມນາໂກ ເປັນຈ່າຝູງຂອງລີກຢູ່ໃນຕອນນີ້.