ຜີກັບມາລ່າ ໂຄຣສ ເສີມທັບໃນຊ່ວງພັກຮ້ອນ

 

ສື່ດັງຈາກຜູ້ດີປ່ອຍຂ່າວ ແມນຢູໄນເຕັດ ກຽມກັບໄປລ່າ ໂທນີ ໂຄຣສ ມິດຟິວໂຕເທັກນິກຂອງ ເຣອັນ ມາດຣິດ ໃນຊ່ວງພັກລະດູການນີ້ຫຼັງຈາກທີ່ທີມ “ຜີສາດແດງ” ເຄີຍຜິດຫວັງໃນການດຶງນັກເຕະເມື່ອ 2 ປີຜ່ານມາສະໄໝທີ່ ເດວິດ ມອຍ ຄຸມທັບ.

 

“ເດ ມິນເລີ” ສື່ຊື່ດັງຂອງປະເທດອັງກິດລາຍງານຂ່າວວ່າ ແມນເຊສເຕີ ຢູໄນເຕັດ ສະໂມສອນດັງຈາກ ພຣີເມຍລີກ ພ້ອມທີ່ຈະກັບມາລ່າ ໂທນີ ໂຄຣສ ຫ້ອງເຄື່ອງໂຕເກັ່ງຂອງ ເຣອັນ ມາດຣິດ ມະຫາອຳນາດລູກໜັງຈາກ ລາ ລີກາ ອີກຮອບໃນຊ່ວງພັກຊຳເມີນີ້.

ກັບໄປປີ 2014 ຜີສາດແດງ ເຄີຍມີຂ່າວກັບ ໂຄຣສ ມາແລ້ວໂດຍ ເດວິດ ມອຍ ນາຍໃຫຍ່ ແມນຢູ ໃນເວລານັ້ນຕ້ອງການດຶງນັກເຕະທີ່ຍັງຫຼິ້ນໃຫ້ກັບ ບາເຢິນ ມິວນິກ ຢູ່ມາຮ່ວມທີມຕັ້ງແຕ່ຊຳເມີແຕ່ວ່າບໍ່ສຳເລັດເຊິ່ງວ່າ ມອຍ ກໍພະຍາຍາມນຳມາຕະຫຼອດແຕ່ສຸດທ້າຍເຂົາກໍຖືກໄລ່ອອກຈາກທີມກ່ອນຈົບລະດູການ 2014 ແລະ ຫຼັງການແຕ່ງຕັ້ງ ຫຼຸຍ ຟານກາວ ມາຄຸມບັງຫຽນການເຈລະຈາກໍມິດໄປ ແລະ ໂຄຣສ ກໍຍ້າຍໄປຮ່ວມກັບ “ລາຊາຊຸດຂາວ” ໃນທີ່ສຸດ ຈົນລ່າສຸດສື່ຜູ້ດີຕີຂ່າວວ່າ ທີມດັງຈາກ ໂອນ ທຣາຟເຟິດ ກັບມາສົນໃຈນັກເຕະອີກຮອບ ແລະ ກຽມດຶງໂຕໃນຊ່ວງຕະຫຼາດໜ້າຮ້ອນນີ້.

 

ທັງນີ້ ໂຄຣສ ທີ່ເຊື່ອວ່າໄດ້ຮັບຄ່າເມື່ອຍເຖິງ 200,000 ປອນຕໍ່ອາທິດກັບຕົ້ນສັງກັດຫຼິ້ນໄປ 30 ນັດໃນ ລາ ລີກາ, ສ້າງໂອກາດເຖິງ 54 ເທື່ອ ແລະ ເປັນກຳລັງສຳຄັນໃນແຜນແດນກາງຂອງ “ໂລສ ບັງໂກສ” ເຊິ່ງເຮັດໃຫ້ຍັງບໍ່ເປັນທີ່ຈະແຈ້ງວ່າ ເຣອັນ ມາດຣິດ ຈະຍອມຂາຍນັກເຕະໃຫ້ກັບ ແມນຢູ ຫຼື ບໍ່.