ປູດ!!ຜີໂອເຄຂາຍສະໄນເດີລິນໃຫ້ທັອບຟີ 22 ລ້ານປອນ

 

ສື່ດັງອັງກິດລະບຸວ່າ “ຜີສາດແດງ” ແມນເຊສເຕີ ຢູໄນເຕັດ ຕົກລົງປ່ອຍ ມັອກການ ສະໄນເດີລິນ ມິດຟິວເລືອດນໍ້າຫອມໃຫ້ກັບ ເອເວີຕັນ ຮຽບຮ້ອຍທີ່ລາຄາ 22 ລ້ານປອນ ຄາດວ່າທຸກຢ່າງຈະສຳເລັດຮຽບຮ້ອຍພາຍໃນ 48 ຊົ່ວໂມງ.

 

ແມເຊສເຕີ ຢູໄນເຕັດ ສະໂມສອນຍັກໃຫຍ່ຂອງ ພຣີເມຍລີກ ຕົກລົງຂາຍ ມັອກການ ສະໄນເດີລິນ ກອງກາງຝຣັ່ງໃຫ້ກັບ ເອເວີຕັນ ສະໂມສອນຄູ່ແຂ່ງຮ່ວມລີກຮຽບຮ້ອຍແລ້ວທີ່ລາຄາ 22 ລ້ານປອນຕາມການລາຍງານຈາກ ສະກາຍ ສະປອດ ສື່ກິລາຊັ້ນນຳເມືອງຜູ້ດີເມື່ອວັນອັງຄານນີ້.

 

ດາວເຕະທີມຊາດຝຣັ່ງຍ້າຍຈາກ ເຊົາແຮມຕັນ ມາຮ່ວມທັບ “ຜີສາດແດງ” ດ້ວຍຄ່າໂຕສູງເຖິງ 25 ລ້ານປອນເມື່ອຊ່ວງຊໍາເມີປີ 2015 ແຕ່ລະດູການນີ້ກາຍເປັນພຽງນັກເຕະສ່ວນເກີນໃນແຜນການເຮັດທີມຂອງ ໂຊເຊ ມູຣິນໂຢ ແລະ ຫາກໍໄດ້ຮັບໂອກາດໂຊຄວາມສາມາດພຽງແຕ່ 8 ເກມເທົ່ານັ້ນ.

 

ຫຼ້າສຸດ ສະກາຍ ສະປອດ ລະບຸວ່າ “ເດິ ທັອບຟີ” ໄດ້ບັນລຸຂໍ້ຕົກລົງກັບ “ຜີສາດແດງ” ເປັນທີ່ຮຽບຮ້ອຍສໍາລັບການຂໍຊື້ ສະໄນເດີລິນ ມາຮ່ວມທີມ ຂະນະທີ່ ເດິ ເທລາກຣາຟ ອີກສື່ໜຶ່ງຂອງອັງກິດຊີ້ວ່າທຸກຢ່າງອາດຈະສຳເລັດຮຽບຮ້ອຍພາຍໃນ 48 ຊົ່ວໂມງຂ້າງໜ້ານີ້.