ປືນ-ມ້າລາຍຍິ້ມ!!ໝາປ່າຢັນພ້ອມຂາຍດຣັກສ໌ເລີ

 

ອາເຊນອນ ແລະ ຢູເວັນຕຸດ ຕ້ອງນຳ້ລາຍໄຫຼແນ່ນອນຫຼັງຈາກທີ່ ເຄລົ້າ ເອົາລອຟ ບິກບອດຂອງ ໂວຟບວກ ຢືນຢັນເອງວ່າພ້ອມທີ່ຈະພິຈາລະນາຂໍ້ສະເໜີຂໍຊື້ ຢູລຽນ ດຣັກສ໌ເລີ ມິດຟິວທີມຊາດເຢຍລະມັນແລ້ວ ຫຼັງຈາກທີ່ນັກເຕະສະແດງທ່າທີຢາກຍ້າຍໜີ “ໝາປ່າເມືອງເບຍ” ມາຕະຫຼອດ.

 

ເຄລົ້າ ເອົາລອຟ ຜູ້ອຳນວຍການກິລາ ເຟົາເອຟແອວ ໂວຟບວກ ສະໂມສອນດັງໃນ ບຸນເດສລີກາ ເຢຍລະມັນ ປະກາດຢືນຢັນເມື່ອວັນອາທິດທີ່ຜ່ານມາວ່າພ້ອມທີ່ຈະຮັບຟັງທຸກຂໍ້ສະເໜີຂອງທີມຕ່າງໆທີ່ສົນໃຈຢາກໄດ້ ຢູລຽນ ດຣັກສ໌ເລີ ໄປຮ່ວມແລ້ວ.

 

ເພເມກເກີທີມຊາດເຢຍລະມັນກຽມເກັບເຄື່ອງຂອງຍ້າຍອອກຈາກ ໂຟກສະວາເກັນ ອາຣີນາ ໃນຊ່ວງເປີດຕະຫຼາດຊື້ຂາຍນັກເຕະຮອບສອງເດືອນມັງກອນນີ້ ຫຼັງຈາກຖືກຕັດຊື່ອອກຈາກທີມຊຸດທີ່ບຸກໄປຢາມ ບາເຢິນ ມິວນິກ ເມື່ອວັນເສົາທີ່ຜ່ານມາ ຫຼັງສະແດງທ່າທີຊັດເຈນວ່າຕ້ອງການຫາຕົ້ນສັງກັດໃໝ່ມາໂດຍຕະຫຼອດ.

 

ເຖິງວ່ານັກເຕະຈະເຄີຍຖືກ ໂວຟບວກ ປັດຂໍ້ສະເໜີຂຶ້ນບັນຊີຍ້າຍທີມຊ່ວງໜ້າຮ້ອນທີ່ຜ່ານມາແຕ່ ເອົາລອຟ ຍອມຮັບວ່າຕອນນີ້ສະຖານະການປ່ຽນໄປແລ້ວເຮັດໃຫ້ບັນດາຍັກໃຫຍ່ທົ່ວເອີຣົບທັງ ອາເຊນອນ, ຢູເວັນຕຸດ ແລະ ປາຣີ ແຊັງ-ແຊັກແມງ ທີ່ມີຂ່າວພົວພັນອາດຈະມີຫວັງໃນການໄດ້ ດຣັກສ໌ເລີ ຫຼາຍຂຶ້ນ.

 

ເອົາລອຟ ກ່າວຜ່ານ “ຟຸດບອນ ສະກາຍ ສະປອດ ເຢຍລະມັນ” ສື່ຊື່ດັງເມືອງເບຍວ່າ “ຖ້າມີຂໍ້ສະເໜີເຂົ້າມາ ເຮົາກໍຈະຮັບຟັງເຮົາເຮັດທຸກຢ່າງແບບຍຸຕິທຳຢ່າງຕໍ່ເນືື່ອງ ແຕ່ໂຊກບໍ່ດີທີ່ສະຖານະການເຫຼົ່ານີ້ເຮັດໃຫ້ຫຼາຍຢ່າງປ່ຽນໄປ ເຂົາຈະໄດ້ກັບສູ່ທີມບໍ່ຫວາ..ມັນຄົງເປັນເລື່ອງຍາກ”.

 

ທັງນີ້ ດຣັກສ໌ເລີ ຍ້າຍຈາກ ຊາວເກ 04 ມາຢູ່ກັບ ໂວຟບວກ ດ້ວຍຄ່າຕົວ 36 ລ້ານເອີໂຣເມື່ອເດືອນສິງຫາ 2015.

 

ບົດຄວາມໃຫມ່ໆ