ປືນວ່າຈັ່ງໃດ ຊານເຊດ ຂໍຂຶ້ນຄ່າເມື່ອຍ

 

ເດິ ຊັນ ສື່ດັງເມືອງຜູ້ດີຕີຂ່າວ ອະເລັກຊິດ ຊານເຊດ ດາວຍິງ ອາເຊນອນ ຢາກໄດ້ຄ່າເມື່ອຍເພີ່ມເປັນ 160,000 ປອນຕໍ່ອາທິດ ແລະ ຢາກໄດ້ຮັບຄ່າຮັບປະກັນອີກວ່າທີມຈະໄປໃນທິດທາງທີ່ດີ.

 

ອະເລັກຊິດ ຊານເຊດ ກອງໜ້າຂອງ ອາເຊນອນ ສະໂມສອນໃຫຍ່ຈາກ ພຣີເມຍລີກ ອັງກິດ ຕ້ອງການຄ່າເມື່ອຍປະມານ 160,000 ປອນຕໍ່ອາທິດໃນສັນຍາສະບັບໃໝ່ກັບທີມຕາມການລາຍງານຂອງ ເດິ ຊັນ ສື່ດັງຂອງເມືອງຜູ້ດີ.

ອາເຊນອນຕ້ອງການຕໍ່ສັນຍາກັບ ຊານເຊດ 3 ປີ ເຊິ່ງຈະເຮັດໃຫ້ເຂົາຢູ່ກັບທີມໄປຈົນຮອດປີ 2019 ໂດຍຄາດກັນວ່າການເຈລະຈາທັງສອງຝ່າຍຈະເກີດຂຶ້ນໃນເດືອນມິຖຸນານີ້ເພາະ “ປືນໃຫຍ່” ບໍ່ຢາກໃຫ້ມັນລາກຍາວໄປຈົນເຖິງຊ່ວງປີທ້າຍໆຂອງສັນຍາຈົນເຮັດໃຫ້ຕ້ອງສ່ຽງເສຍນັກເຕະໄປ.

 

ທັງນີ້ ເດິ ຊັນ ລະບຸວ່າອະດີດດາວເຕະ ບາເຊໂລນາ ຍັງມີຄວາມສຸກກັບ ອາເຊນອນ ແລະ ປັບຕົວເຂົ້າກັບ ພຣີເມຍລີກ ໄດ້ຢ່າງວ່ອງໄວ ແຕ່ຕ້ອງການຄ່າເມື່ອຍເພີ່ມຄືກັນ ນອກຈາກນີ້ເຂົາຍັງຢາກເບິ່ງອີກວ່າທີມຈະຈົບລະດູການນີ້ດ້ວຍຜົນງານແບບໃດ ແລະ ຢາກໄດ້ຮັບການຮັບປະກັນວ່າຕົ້ນສັງກັດມີຄວາມທະເຍີທະຍານແບບໃດສຳລັບອະນາຄົດ.