ປືນມີຍິ້ມ!!ໂຕລິສໂຊ້ຝັນຢາກຫຼິ້ນໃຫ້ທີມ

 

ອາແຊນ ເວນເກີ ນາຍໃຫຍ່ ອາເຊນອນ ຕ້ອງດີໃຈແນ່ນອນຫຼັງຈາກທີ່ ໂກຣອງແຕັງ ໂຕລິສໂຊ້ ມິດຟິວອະນາຄົດໄກຂອງ ໂອລິມປິກ ລີຢົງ ເຜີຍວ່າຝັນຢາກໄປຫຼິ້ນໃຫ້ກັບ “ປືນໃຫຍ່” ໃນອະນາຄົດເຊື່ອວ່າສະຕາຍການຫຼິ້ນຂອງຕົນເອງຕ້ອງເຂົ້າກັບ ພຣີເມຍລີກ ໄດ້ດີ.

 

ໂກຣອງແຕັງ ໂຕລິສໂຊ້ ກອງກາງດາວລຸ້ງຂອງ ໂອລິມປິກ ລີຢົງ ສະໂມສອນດັງຂອງ ລີກແອັງ ຝຣັ່ງອອກມາເປີດໃຈເມື່ອວັນພຸດທີ່ຜ່ານມາວ່າ ຕົນເອງມີຄວາມຝັນຢາກຫຼິ້ນໃຫ້ກັບ ອາເຊນອນ ສະໂມສອນຍັກໃຫຍ່ໃນອັງກິດຈັກເທື່ອໜຶ່ງໃນອະນາຄົດ.

 

ດາວເຕະອາຍຸ 22 ປີຖືເປັນກຳລັງສຳຄັນຂອງ “ໂອແອວ” ມາໂດຍຕະຫຼອດນັບຕັ້ງແຕ່ຂຶ້ນຈາກຊຸດອະຄາເດມີ້ມາຫຼິ້ນໃນທີມຊຸດໃຫຍ່ຂອງສະໂມສອນຕັ້ງແຕ່ປີ 2013 ແລະ ໄດ້ຮັບການຍົກຍ້ອງຈາກກູຣູທັງຫຼາຍວ່າມີວິທີການຫຼິ້ນທີ່ໜ້າສົນໃນເໝາະກັບການມາຫຼິ້ນໃນລີກຜູ້ດີພໍສົມຄວນ.

 

ໂຕລິສໂຊ້ ກ່າວວ່າ “ມີຫຼາຍສະໂມສອນທີ່ຢູ່ໃນຝັນຂອງຂ້ອຍບໍ່ວ່າຈະເປັນ ເຣອັນ ມາດຣິດ, ບາເຊໂລນາ ລວມທັງທີມດັງໃນອັງກິດເຊັ່ນ ອາເຊນອນ ຂ້ອຍມັກ ພຣີເມຍລີກ ແລະ ຄິດວ່າຕົນເອງອາດຈະເໝາະກັບການຫຼິ້ນໃນລີກນັ້ນ ນີ້ແມ່ນລີກທີ່ມີການແຂ່ງຂັນສູງທີ່ສຸດ, ເປີດກວ້າງທີ່ສຸດ, ສູ້ລໍາບາກທີ່ສຸດ ແລະ ໜ້າຕື່ນຕາຕື່ນໃຈທີ່ສຸດ”.

 

ກອງກາງທີມຊາດຝຣັ່ງຊຸດອາຍຸຕຳ່ກວ່າ 21 ປີເຄີຍເກືອບຍ້າຍໄປຢູ່ກັບ ນາໂປລີ ໃນລີກອີຕາລີເມື່ອຊຳເມີຜ່ານມາໆແລ້ວແຕ່ສຸດທ້າຍກໍປະຕິເສດໄປ ແລະ ຢູ່ກັບ ລີຢົງ ຕໍ່ໃນລະດູການນີ້.

 

“ສຸດທ້າຍຂ້ອຍກໍບອກວ່າ “ບໍ່ຍ້າຍ” ເພາະເປົ້າໝາຍຂອງຂ້ອຍຄືການຊ່ວຍ ໂອແອວ ມີລະດູການທີ່ດີ ຂ້ອຍເລືອກທາງດັ່ງກ່າວດ້ວຍໃຈ ເປັນການຕັດສິນໃຈທາງກິລາ ຂ້ອຍຮູ້ດີວ່າຂ້ອຍຈະພັດທະນາຂຶ້ນຖ້າວ່າຍ້າຍໄປທີ່ນັ້ນແຕ່ສຳລັບຂ້ອຍ ແລະ ໂອແອວ ແລ້ວມັນບໍ່ແມ່ນເລື່ອງກ່ຽວກັບເງິນເລີຍ” ໂຕລິສໂຊ້ ກ່າວ.