ປືນພ້ອມທຸ່ມສຸດໂຕເພື່ອຫວັງດຶງ ຮີກວາອິນ ຮ່ວມທັບ

 

ສື່ແດນກະທິງຕີຂ່າວ ອາເຊນອນ ພ້ອມເຮັດທຸກຢ່າງເພື່ອດຶງ ກອນຊາໂລ ຮີກວາອິນ ຫົວຫອກຂອງ ນາໂປລີ ມາເສີມຄົມໃນຊ່ວງຊຳເມີນີ້ເຖິງວ່າ “ອັດຊູລາ” ຕ້ອງການດຶງນັກເຕະໄວ້ຕໍ່ໄປ ແລະ ຕັ້ງລາຄານັກເຕະໄວ້ສູງເຖິງກວ່າ 70 ລ້ານປອນກໍຕາມ.

 

“ຟີຊາເຄດ” ສື່ດັງຂອງສະເປນລາຍງານຂ່າວວ່າ ອາເຊນອນ ສະໂມສອນຍັກໃຫຍ່ຈາກ ພຣີເມຍລີກ ພ້ອມເຮັດທຸກວິທີທາງເພື່ອດຶງ ກອນຊາໂລ ຮີກວາອິນ ກອງໜ້າຂອງ ນາໂປລີ ທີມດັງຈາກ ກັນໂຊ ຊີຣີ ອາ ມາລ່າຕານ່າງໃນຮັງ ເອັມມິເຣດ ສະເຕດຽມ ໃຫ້ໄດ້ໃນຊ່ວງເປີດຕະຫຼາດນັກເຕະຊ່ວງຊຳເມີ.

“ເດິ ກັນເນີ” ຕົກເປັນຂ່າວກັບກອງໜ້າລະດັບໂລກຫຼາຍໆຄົນໃນຊ່ວງຫຼາຍເດືອນຜ່ານມາ ແລະ ອາແຊນ ເວນເກີ ຜູ້ຈັດການທີມຕ້ອງການດຶງຫົວຫອກຄົນໃໝ່ມາເສີມທັບ ລ່າສຸດສື່ຈາກແດນຜູ້ດີຕີຂ່າວວ່າ ທີມດັງຈາກນະຄອນ ລອນດອນ ຕັດສິນໃຈເດີນໜ້າລ່າອະດີດາວເຕະ ເຣອັນ ມາດຣິດ ທີ່ຖືກ ນາໂປລີ ຕັ້ງຄ່າຫົວໄວ້ຢ່າງໜ້ອຍ 70.5 ລ້ານປອນເມື່ອປີທີ່ຜ່ານມາ ແລະ ພ້ອມເຮັດທຸກຢ່າງເພື່ອດຶງນັກເຕະມາໄວ້ຄອບຄອງໃຫ້ໄດ້.

 

ຢ່າງໃດກໍຕາມ “ປືນໃຫຍ່” ອາດຈະຕ້ອງງານໜັກໃນການລ່າໂຕ ຮີກວາອິນ ເນື່ອງຈາກວ່າ “ອັດຊູລາ” ຢາກດຶງນັກເຕະໄວ້ກັບທີມຕໍ່ໄປ ຂະນະທີ່ ນິໂຄລັສ ຮີກວາອິນ ນາຍໜ້າຂອງນັກເຕະເຜີຍວ່ານ້ອງຊາຍບໍ່ຄິດສົນໃຈຍ້າຍໄປຫຼິ້ນບ່ອນໃດທັງນັ້ນ.