ປືນກຽມເອິກຫັກ!! ເປເອັດເຊຂຶ້ນເຕັງໜຶ່ງໄດ້ກອງເຕ

 

ເລີ ປາຣີຊີຢົງ ສື່ດັງຂອງຝຣັ່ງຕີຂ່າວ ປາຣີ ແຊັງ-ແຊັກແມັງ ແຊງໜ້າ ອາເຊນອນ ຂຶ້ນມາເປັນເຕັງໜຶ່ງທີ່ຈະໄດ້ ເອັນໂກໂລ ກອງເຕ ມິດຟິວ ເລສເຕີ ໄປຮ່ວມທັບຫຼັງຈາກທີ່ “ເປເອັດເຊ” ຍື່ນຂໍ້ສະເໜີທີ່ມີຄ່າເມື່ອຍກ້ອນໃຫຍ່ໃຫ້ກັບ ກອງເຕ ພິຈາລະນາ ຂະນະທີ່ “ປືນໃຫຍ່” ບໍ່ຢາກຈ່າຍເງິນເທົ່າກັບຄ່າຈີກສັນຍາຂອງນັກເຕະ.

 

ປາຣີ ແຊັງ-ແຊັກແມັງ ສະໂມສອນມະຫາເສດຖີຈາກ ລີກແອັງ ເປັນທີມທີ່ມີໂອກາດຫຼາຍທີ່ສຸດທີ່ຈະໄດ້ ເອັນໂກໂລ ກອງເຕ ກອງກາງໂຕເກັ່ງຂອງ ເລສເຕີ ຊີຕີ ໄປຮ່ວມທັບ ຕາມການລາຍງານຂອງ ເລີ ປາຣີຊີຢົງ ສື່ຊື່ດັງຂອງເມືອງນ້ຳຫອມ.

 

ກອງເຕ ຍ້າຍຈາກ ກອງ ໄປຢູ່ກັບ ເລສເຕີ ເມື່ອຊ່ວງເດືອນສິງຫາທີ່ຜ່ານມາ ແລະ ເຂົາກໍເຮັດຜົນງານໄດ້ດີຈົນເປັນໜຶ່ງໃນກຳລັງສຳຄັນທີ່ຊ່ວຍໃຫ້ທີມໄດ້ແຊມ ພຣີເມຍລີກ ປະຈຳລະດູການ 2015-2016.

 

ຜົນງານດັ່ງກ່າວເຮັດໃຫ້ມີຫຼາຍທີມທີ່ໃຫ້ຄວາມສົນໃຈນັກເຕະເຊັ່ນ ປາຣີ, ອາເຊນອນ ແລະ ແມນເຊສເຕີ ຢູໄນເຕັດ ເປັນຕົ້ນ ເຊິ່ງກ່ອນໜ້ານີ້ມີຂ່າວວ່າ ປືນໃຫຍ່ ເປັນເຕັງໜຶ່ງທີ່ຈະໄດ້ ກອງເຕ ໄປເສີມທັບ.

 

ຢ່າງໃດກໍຕາມຫຼ້າສຸດ ເລີ ປາຣີຊີຢົງ ປ່ອຍຂ່າວ “ເປເອັດເຊ” ສົ່ງຄົນໄປເຈລະຈາກັບຕົວແທນຂອງ ກອງເຕ ເຖິງ 2 ເທື່ອຊ່ວງເດືອນເມສາທີ່ຜ່ານມາ ແລະ ຍື່ນສັນຍາທີ່ມີຄ່າເມື່ອຍກ້ອນໃຫຍ່ໃຫ້ນັກເຕະພິຈາລະນາແລ້ວ.

 

ທັງນີ້ ບໍ່ໄດ້ມີການລະບຸຢ່າງຊັດເຈນວ່າຄ່າເມື່ອຍທີ່ ເປເອັດເຊ ຍື່ນໃຫ້ເປັນຈຳນວນເງິນເທົ່າໃດແຕ່ວ່າ ເປເອັດເຊ ກໍມີໂອກາດດີທີ່ຈະໄດ້ນັກເຕະຫຼັງຈາກທີ່ ອາເຊນອນ ບໍ່ເຕັມໃຈທີ່ຈະຈ່າຍເງິນເທົ່າກັບຄ່າຈີກສັນຍາຂອງ ກອງເຕ ເຊິ່ງຢູ່ທີ່ 20 ລ້ານປອນ.