ປີ 2015-2017 ພົບຜູ້ລະເມີດ ກົດລະບຽບການສັນຈອນເກືອບ 9.000 ຄົນ

ອີງີາມການລາຍງານຂອງ ນສພ ຄວາມສະຫງົບ ວ່າ : ໃນ 3 ປີຜ່ານມາ (2015-2017), ຊາວໜຸ່ມກົມຕໍາຫຼວດຈະລາຈອນ ກົມໃຫຍ່ຕໍາຫຼວດ ກະຊວງ ປກສ ລົງກວດ ກາການສັນຈອນ, ຈັບຄວາມໄວຢູ່ຕາມເສັ້ນທາງຫຼວງແຫ່ງຊາດ ໄດ້ຈໍານວນຫຼາຍຄັ້ງ ພົບຜູ້ລະເມີດກົດລະບຽບ ການສັນຈອນເກືອບ 9.000 ຄົນ.

ກອງປະຊຸມໃຫຍ່ ຄັ້ງທີ IX ໜ່ວຍຊາວໜຸ່ມຮາກຖານ ກົມຕໍາຫຼວດຈະລາຈອນ ຈັດຂຶ້ນໃນວັນທີ 30 ພຶດສະພາ 2018 ໂດຍການຮ່ວມຂອງ ພັທ ກົງສີ ສຸວັນນະຕຸ້ມ ເລຂາຄະນະພັກກົມຫົວໜ້າກົມຕໍາຫຼວດຈະລາຈອນ, ມີເລ ຂາຊາວໜຸ່ມກົມໃຫຍ່ຕໍາຫຼວດ, ແຂກຮັບເຊີນ ແລະ ສະມາຊິກຊາວໜຸ່ມທົ່ວກົມເຂົ້າຮ່ວມ; ໃນກອງປະຊຸມສະຫາຍ ພັຕ ດາວິບູນ ສຸລິວົງ ເລຂາໜ່ວຍຊາວໜຸ່ມ ກົມຕໍາຫຼວດຈະລາຈອນ ໄດ້ຂຶ້ນຜ່ານບົດສະຫຼຸບວຽກງານ, ເຊິ່ງທ່ານ ຍົກໃຫ້ຮູ້ວ່າ: ໃນ 3 ປີຜ່ານມາ, ຊາວໜຸ່ມທົ່ວກົມໄດ້ເອົາໃຈໃສ່ຢ່າງຕັ້ງໜ້າໃນການປະຕິບັດໜ້າທີ່ວຽກງານວິຊາ ສະເພາະສະແດງອອກຄື: ລົງກວດກາການສັນຈອນ, ຈັບຄວາມໄວຢູ່ຕາມເສັ້ນທາງຫຼວງແຫ່ງຊາດ ໄດ້ 17 ຄັ້ງ ພົບຜູ້ລະເມີດກົດລະບຽບການສັນຈອນທັງໝົດ 8.553 ຄົນ ຍິງ 3.667 ຄົນ; ໃນນີ້, ລະເມີດໂດຍໃຊ້ຄວາມໄວເກີນ ທັງໝົດ 5.915 ຄົນ; ນອກຈາກລົງກວດກາການສັນຈອນແລ້ວ, ສະມາຊິກຊາວໜຸ່ມຍັງໄດ້ເຮັດໜ້າທີ່ໃນການ ໂຄສະນາລະບຽບການສັນຈອນຢູ່ຕາມສໍານັກງານ-ອົງການ, ໂຮງຮຽນ, ກຸ່ມບ້ານໄດ້ 194 ຄັ້ງ ມີຜູ້ເຂົ້າຮ່ວມຮັບຟັງ ທັງໝົດ 6.884 ຄົນ ຍິງ 3.011 ຄົນ, ປ້ອງກັນ-ເປີດທາງ, ຈັດລະບຽບບ່ອນຈອດລົດໃຫ້ການນໍາພັກ-ລັດ, ແຂກ ພາຍໃນ ແລະ ຕ່າງປະເທດໄດ້ 2.109 ຄັ້ງ, ຄຸ້ມຄອງ ແລະ ຕິດ ປ້າຍລົດ ໄດ້ 395.637 ຄັນ, ຮັບແຈ້ງປ້າຍຕົກເຮ່ຍ 4.529 ຄັນ, ຂຶ້ນທະບຽນປ້າຍລົດ ປກສ ແລະ ປ້າຍເຄື່ອນໄຫວພິເສດ ໄດ້ 315 ຄັນ; ນອກຈາກນີ້, ຍັງໄດ້ປ້ອງກັນ ບັນ ດາກອງປະຊຸມສໍາຄັນຕ່າງໆຂອງພັກ-ລັດມີຄວາມປອດໄພ 100%.

ໃນກອງປະຊຸມຍັງໄດ້ມີການປ່ອນບັດເລືອກຕັ້ງເອົາຄະນະໜ່ວຍຊາວໜຸ່ມກົມຊຸດໃໝ່ ໂດຍມີການເລືອກເອົາ ທັງ ໝົດ 7 ສະຫາຍ ຈາກທີ່ລົງສະໝັກ 9 ສະຫາຍ; ຜ່ານການປ່ອນບັດເລືອກຕັ້ງໄດ້ເປັນເອກະສັນເລືອກເອົາສະຫາຍ ຮອ ງ່າ ໄຕຍະວົງ ເປັນເລຂາ, ພັຕ ວັດທະນາ ຈິດ ຕະພົງ ແລະ ຮອ ນູ່ແວ່ນ ທອງທີມະຫາໄຊ ເປັນຮອງເລຂາ, ຮອ ພູວຽງ ແກ້ວປັນຍາ, ຮທ ສີສະຫວັດ ດວງມະນາ, ຮທ ນາງ ລັດສະໝີ ຊື່ນພັນ ແລະ ຮຕ ນາງ ຕຸກຕາ ຄໍາວົງສາ ເປັນຄະນະ; ໂອກາດດຽວກັນ, ສະຫາຍ ພັທ ກົງສີ ສຸວັນນະຕຸ້ມ ກໍໄດ້ເນັ້ນໃຫ້ຄະນະໜ່ວຍຊາວໜຸ່ມຊຸດໃໝ່ ຈົ່ງເອົາ ໃຈໃສ່ຊີ້ນໍາ-ນໍາພາສະມາຊີກຊາວໜຸ່ມພາຍໃນກົມໃຫ້ເປັນປົກກະຕິ, ນໍາພາສະມາຊີກເຄື່ອນໄຫວເຮັດໜ້າທີ່ວິຊາ ສະເພາະຢ່າງຫ້າວຫັນ ສາມາດເປັນກໍາລັງແຮງໃຫ້ແກ່ກົມຕໍາຫຼວດຈະລາຈອນ ເພື່ອເຮັດໃຫ້ວຽກງານວິຊາສະເພາະ ຂອງກົມຕໍາຫຼວດຈະລາຈອນ ມີຜົນສໍາເລັດຕາມລະດັບຄາດໝາຍທີ່ວາງໄວ້.

cr: tonamcha