ປີເກຮັບກະທິງບໍ່ດີພໍໄດ້ແຊມຢູໂຣ

 

ເຄຫຼາດ ປີເກ ກອງຫຼັງທີມຊາດສະເປນຮັບວ່າ “ກະທິງໂຫດ” ບໍ່ດີພໍທີ່ຈະໄດ້ແຊມ ຢູໂຣ 2016 ຫຼັງຈາກທີ່ເສຍໃຫ້ກັບອີຕາລີແບບບໍ່ມີທາງສູ້ໃນເກມຮອບ 16 ທີມສຸດທ້າຍເມື່ອວັນຈັນ ຊີ້ວ່າມີປັດໄຈຕ່າງໆຫຼວງຫຼາຍໃນເລື່ອງນີ້ ແລະ ຂຸນພົນ “ລາ ໂຣຄາ” ກໍຫຼິ້ນບໍ່ໄດ້ໃນລະດັບທີ່ຕ້ອງການ.

 

ເຄຫຼາດ ປີເກ ກອງຫຼັງທີມຊາດສະເປນອອກມາຍອມຮັບເມື່ອວັນອັງຄານນີ້ວ່າຂຸນພົນ “ກະທິງ” ເຮັດບໍ່ໄດ້ດີພໍທີ່ຈະປະສົບຄວາມສຳເລັດໃນ ຢູໂຣ 2016 ຫຼັງຈາກທີ່ເສຍໃຫ້ກັບອີຕາລີ 2-0 ໃນເກມຮອບ 16 ທີມສຸດທ້າຍທີ່ສະໜາມ ສະຕາດ ເດິ ຟຣັອງ ເມື່ອວັນຈັນທີ່ຜ່ານມາ.

 

ສະເປນເປັນແຊມຢູໂຣ 2008 ແລະ 2012 ລວມທັງເປັນແຊມໂລກ 2010 ແຕ່ຕ້ອງປະສົບກັບຄວາມລົ້ມເຫຼວຕົກຮອບແບ່ງກຸ່ມໃນເສິກບານໂລກ 2014 ແຕ່ວ່າດ້ວຍຟອມການຫຼິ້ນໃນເກມທະລົ່ມຕຸລະກີ 3-0 ໃນ ຢູໂຣ 2016 ເຮັດໃຫ້ທຸກຄົນເບິ່ງວ່າພວກເຂົາມີລຸ້ນສ້າງປະຫວັດສາດໄດ້ແຊມຢູໂຣ 3 ສະໄໝຕິດຕໍ່ກັນ.

 

ຢ່າງໃດກໍຕາມສະເປນຕ້ອງເສຍໃຫ້ກັບໂຄເອເຊຍໃນນັດສຸດທ້າຍຂອງຮອບແບ່ງກຸ່ມເຮັດໃຫ້ຕ້ອງໄປພົບກັບອີຕາລີໃນຮອບ 16 ທີມສຸດທ້າຍ ແລະ ທັບ “ກະທິງ” ກໍໂຊຟອມບໍ່ອອກຖືກ “ອັດຊູຣີ” ເອົາຄືນຈາກທີ່ເຄີຍເສຍ 0-4 ໃນນັດຊິງຢູໂຣ 4 ປີກ່ອນຈາກປະຕູຂອງ ຈໍໂຈ ຄິເອວລິນີ ແລະ ກຣາເຊຍໂນ ເປວເລ.

 

“ເຮົາຕ້ອງການກ້າວຕໍ່ໄປແຕ່ເຮົາກໍມາຈົບລົງໂດຍຄູ່ແຂ່ງທີ່ຍາກທີ່ສຸດ ແລະ ເຮົາກໍບໍ່ສາມາດຫຼິ້ນໄດ້ໃນລະດັບທີ່ຕ້ອງການ ມັນມີສະຖານະການແວດລ້ອມຫຼວງຫຼາຍ, ລະດັບຂອງນັກເຕະ, ທຸກສິ່ງທຸກຢ່າງລວມເຂົ້າກັນຫຼັງຈາກທີ່ເສຍໃຫ້ກັບ ຈໍເຈຍ ຂ້ອຍເວົ້າໄດ້ວ່າເຮົາບໍ່ໄດ້ເປັນໂຕເຕັງ ແລະ ຂ້ອຍຄິດວ່າຕອນນີ້ເຮົາບໍ່ໄດ້ຢູ່ໃນກຸ່ມຂອງສຸດຍອດທີມ ເຮົາມີນັກເຕະຊັ້ນເລີດແຕ່ເຮົາກໍບໍ່ໄດ້ຢູ່ໃນລະດັບທີ່ຈະຄວ້າແຊມໄດ້” ປີເກ ກ່າວ.