ປີນີ້ການເກັບລາຍຮັບຈາກສ່ວຍສາອາກອນຈະປະຕິບັດໄດ້ພຽງ 93%

ກະຊວງການເງິນ ໃຫ້ຮູ້ວ່າ: ປີນີ້ການເກັບລາຍຮັບຈາກສ່ວຍສາອາກອນຈະປະຕິບັດໄດ້ພຽງ 93% ຂອງແຜນການ, ຍ້ອນລາຍຮັບຈາກບັນດາບໍລິສັດຂຸດຄົ້ນແຮ່ຄຳໃນທົ່ວປະເທດທີ່ໄດ້ຂື້ນແຜນໄວ້ເບື້ອງຕົ້ນປະມານ 200 ຕື້ກີບແມ່ນບໍ່ສາມາດປະຕິບັດໄດ້, ເນື່ອງຈາກລາຄາຄໍາ, ທອງແດງ ແລະ ແຮ່ອື່ນໆໃນຕະຫລາດໂລກຫລຸດລົງ, ສົ່ງຜົນໃຫ້ຫລາຍບໍລິສັດບໍ່ມີຜົນກຳໄລທີ່ຈະປະກອບສ່ວນໃຫ້ງົບປະມານລັດ, ພ້ອມນີ້ກິດຈະການກ່ຽວກັບໄມ້ບໍ່ມີການເຄື່ອນໄຫວ ແລະ ຫົວໜ່ວຍທຸລະກິດອື່ນໆທີ່ຕິດພັນກັບທຸລະກິດໄມ້ໄດ້ເຄື່ອນໄຫວຫລຸດລົງ ເຊັ່ນ: ທຸລະກິດຂົນສົ່ງ, ຮ້ານອາຫານ, ໂຮງແຮມ-ບ້ານພັກ ແລະ ອື່ນໆ ກໍແມ່ນມີການເຄື່ອນໄຫວຫລຸດລົງເຊັ່ນດຽວກັນ, ເຮັດໃຫ້ລາຍຮັບງົບປະມານຫລຸດລົງຕື່ມອີກ. ນອກຈາກນີ້ທ່າອ່ຽງການແຈ້ງເສຍອາກອນຂອງຫົວໜ່ວຍທຸລະກິດໃນງວດ I ໄດ້ຫລຸດລົງຖ້າທຽບໃສ່ປີຜ່ານມາ ເຊັ່ນ: ຂົງເຂດການຜະລິດທົ່ວໄປຫລຸດລົງ 4,2%, ບໍ່ແຮ່ຫລຸດລົງ 85,3%, ຊື້-ຂາຍພາຫະນະຫລຸດລົງ 31,1%, ໂທລະຄົມຫລຸດລົງ 13,04% ແລະ ອື່ນໆ. ນອກນີ້ມີທ້ອງຖິ່ນຈຳນວນໜຶ່ງບໍ່ສາມາດເກັບລາຍຮັບໄດ້ຕາມແຜນການ, ໂດຍສະເພາະລາຍຮັບຈາກອາກອນແບບມອບເໝົາຕາມສັນຍາ ແລະ ພາສີທີ່ດິນ.

ສໍາລັບຂໍ້ສົນໃຈຂອງສັງຄົມຕໍ່ຄວາມຄືບໜ້າການຫັນເປັນທັນສະໄໝຂອງວຽກງານສ່ວຍສາອາກອນໄດ້ດໍາເນີນໄປຫລາຍປານໃດນັ້ນ? ກະຊວງດັ່ງກ່າວ ໃຫ້ຮູ້ວ່າ: ໄດ້ເລັ່ງປັບປຸງ ແລະ ພັດທະນາລະບົບເກັບລາຍຮັບແບບທັນສະໄໝ ຄື: ຂະຫຍາຍການນຳໃຊ້ລະບົບຄຸ້ມຄອງການເກັບອາກອນທີ່ມີໃນປັດຈຸບັນ, ຊຶ່ງໄດ້ນຳໃຊ້ຢູ່ກົມສ່ວຍສາອາກອນ, ພະແນກສ່ວຍສາອາກອນນະຄອນຫລວງ, ແຂວງຫລວງພະບາງ, ສະຫວັນນະເຂດ, ຈຳປາສັກ, ຄຳມ່ວນ ແລະ ແຂວງວຽງຈັນ ແລະ ຂະຫຍາຍຕື່ມອີກໃນ 4 ເມືອງຢູ່ນະຄອນຫລວງ ເພື່ອໃຫ້ສາມາດເກັບລາຍຮັບສ່ວຍສາອາກອນເພີ່ມຂຶ້ນ. ພ້ອມນັ້ນ, ຍັງມີແຜນຈະຂະຫຍາຍໄປບັນດາແຂວງໃຫຍ່ໆທາງພາກເໜືອ ແລະ ແຂວງອື່ນໆອີກ, ໄປຄຽງຄູ່ກັນນັ້ນກໍໄດ້ຜັນຂະຫຍາຍການນຳໃຊ້ລະບົບ ອີຊີແທກ (Easy Tax) ເຊື່ອມຕໍ່ການມອບເງິນຜ່ານກົນໄກລະບົບທະນາຄານຄື: ການຄ້າຕ່າງປະເທດລາວມະຫາຊົນ, ພັດທະນາລາວ, ສົ່ງເສີມກະສິກຳ, ລາວຫວຽດ ແລະ ທະນາຄານຫວຽດຕິນ ເພື່ອສ້າງຄວາມສະດວກ, ໂປ່ງໃສ ແລະ ວ່ອງໄວ. ນອກນີ້ຍັງໄດ້ພັດທະນາລະບົບແຈ້ງເສຍອາກອນດ້ວຍເຄື່ອງມືທັນສະໄໝ ອີ-ແທກ (E-Tax), ຊຶ່ງມີຫລາຍຫົວໜ່ວຍທຸລະກິດທີ່ຂຶ້ນກັບການຄຸ້ມຄອງຂອງກົມສ່ວຍສາອາກອນ ແລະ ພະແນກສ່ວຍສາອາກອນນະຄອນຫລວງສາມາດແຈ້ງເສຍອາກອນຜ່ານລະບົບດັ່ງກ່າວ ແລະ ຈະສືບຕໍ່ຂະຫຍາຍການນໍາໃຊ້ໄປສູ່ແຂວງອື່ນໆໃນໄວໆນີ້ແລະ ປັດຈຸບັນພວມຕິດຕັ້ງລະບົບເຊື່ອມຕໍ່ຂໍ້ມູນການຂາຍສິນຄ້າ ແລະ ບໍລິການ ຂອງຜູ້ເສຍອາກອນຫາຂະແໜງສ່ວຍສາອາກອນເພື່ອເປັນພື້ນຖານໃຫ້ແກ່ການຄຸ້ມຄອງເກັບອາກອນຢ່າງຖືກຕ້ອງ ແລະ ຄົບຖ້ວນ, ຊຶ່ງໄລຍະທຳອິດຈະຕິດຕັ້ງໃຫ້ໄດ້ຫລາຍກວ່າ 700 ຫົວໜ່ວຍຢູ່ນະຄອນຫລວງ ເພື່ອຍົກຖານການເກັບອາກອນໃຫ້ສູງຂຶ້ນ ແລະ ດັດສົມຫົວໜ່ວຍທຸລະກິດໃນລະບົບມອບເໝົາໃຫ້ຖືບັນຊີີເກັບອາກອນມູນຄ່າເພີ່ມໃຫ້ຖືກຕ້ອງຕາມລະບຽບກົດໝາຍ, ນອກນີ້ຍັງໄດ້ມີການທົດລອງນຳໃຊ້ເຄື່ອງມືທັນສະໄໝເຂົ້າໃນການຄຸ້ມຄອງເກັບລາຍຮັບຈາກທີ່ດິນຢູ່ນະຄອນຫລວງ ແລະ ແຂວງວຽງຈັນຈຳນວນ 16 ບ້ານ ແລະ ຈະຂະຫຍາຍໄປສູ່ບັນດາແຂວງອື່ນໆ.

Cr: http://www.laophattananews.com