ປິດສາກລັດເຄາະລິຟະຂອງກຸ່ມໄອເອສ

 

ນາຍົກລັດຖະມົນຕີອິຣັກປະກາດລັດເຄາະລີຟະຂອງກຸ່ມໄອເອສເຖິງຈຸດອາວະສານແລ້ວ ຫຼັງຈາກອງທັບອິຣັກບຸກຢຶດຄືນມັດຊາຢິດສັນຍາລັກໃນເມືອງໂມຊູນໄດ້ເມື່ອວັນພະຫັດທີ 3 ປີພໍດີນັບຕັ້ງແຕ່ຫົວໜ້າໃຫຍ່ໄອເອສປະກາດສະຖາປະນາລັດທາງສາສະໜາ ເໜືອພື້ນທີ່ຄວບຄຸມໃນອິຣັກ ແລະ ຊີເຣຍທີ່ມັດຊາຢິດແຫ່ງນີ້.

ສຳນັກຂ່າວເອພີ ແລະ ເອເອຟພີລາຍງານຈາກເມືອງໂມຊູນປະເທດອິຣັກເມື່ອວັນທີ 29 ມິຖຸນາວ່າ ນາຍົກລັດຖະມົນ ໄຮເດີ ອັນ-ອາບາດີ ຂອງອິຣັກເຜີຍຜ່ານທາງທະວິິດເຕີເມື່ອວັນພະຫັດວ່າ ລັດຈອມປອມຂອງດາອິດ (ກຸ່ມໄອເອສ) ສິ້ນສຸດລົງແລ້ວ ແລະ ກອງທັບລັດຖະບານກຳລັງຈະໄດ້ໄຊຊະນະຢ່າງເຕັມຮູບ.

ການຢຶດຄືນມັດຊາຢິດ ອັນ-ນູຣີ ແລະ ຫໍຄອຍອາວ-ຮັດບາ ໃນເຂດເມືອງເກົ່າຂອງເມືອງໂມຊູນ ຖືເປັນໄຊຊະນະແບບສັນຍາລັກຄັ້ງຍິ່ງໃຫຍ່ເນື່ອງຈາກເມື່ອວັນທີ 29 ມິຖຸນາ 2014 ອາບູ ບັກ ອ່າວ-ແບັກດາດີ ຫົວໜ້າໃຫຍ່ກຸ່ມໄອເອສເຄີຍໃຊ້ມັດຊາຢິດແຫ່ງນີ້ເປັນສະຖານທີ່ປະກາດລັດເຄາະລິຟະເໜືອພື້ນທີ່ຍຶດຄອງໃນອິຣັກ ແລະ ຊີເຣຍ ເຊິ່ງເປັນການປະກົດຕົວຕໍ່ສາທາລະນະພຽງຄັ້ງດຽວຂອງ ອ່າວ-ແບັກດາດີ.

ເຈົ້າໜ້າທີ່ທາງການອິຣັກ ແລະ ກອງກຳລັງພັນທະມິດກ່າວວ່າ ນັກຮົບໄອເອສວາງລະເບີດທຳລາຍມັດຊາຢິດອັນ-ນູຣີເມື່ອອາທິດທີ່ຜ່ານມາແຕ່ກຸ່ມໄອເອສກ່າວວ່າມັດຊາຢິດຖືກທຳລາຍໂດຍການໂຈມຕີທາງອາກາດຂອງເຮືອບິນຮົບອາເມລິກາ.

ທາງດ້ານພັນເອກ ໄຣອັນ ດິວລອນ ນາຍທະຫານກອງທັບຂອງອາເມລິກາໃນຖານະໂຄສົກກອງກຳລັງພັນທະມິດຕ່າງຊາດໃນອິຣັກ ຖະແຫຼງຕໍ່ກັບສື່ມວນຊົນໃນວໍຊິງຕັນເມື່ອວັນພະຫັດວ່າ ການປົດປ່ອຍເມືອງໂມຊູນທາງພາກເໜືອຂອງອິຣັກຈາກການຄວບຄຸມຂອງກຸ່ມໄອເອສຈະມີຂຶ້ນໃນອີກ “ບໍ່ເທົ່າໃດມື້ຂ້າງໜ້າ” ແລະ ການຍຶດຄືນເມືອງໂດຍສົມບູນຈະຖືກປະກາດໂດຍລັດຖະບານອິຣັກ.