ປິດຕຳນານ..ເທບ ລີ ຢອງ ແດ່ ແຂວນແຣັກເກັດແລ້ວ

 

ລີ ຢອງ ແດ່ ຈັບຄູ່ກັບ ຢູ ເຢືອນ ເຊືອງ ຂອງເກົາຫຼີໃຕ້ໄດ້ແຊມຊາຍຄູ່ຂອງການແຂ່ງຂັນ ແບັດມິນຕັນໂຄຣຽນ ໂອເພັນ 2016 ໂດຍການເອົາຊະນະ ລີ ຈຸນ ຮຸຍ ກັບ ຢູ ເສິນ ຈາກຈີນໄປໄດ້ 2-1 ເກມ 16-21, 22-20, 21-18 ໃນຮອບຊິງຊະນະເລີດທີ່ນະຄອນໂຊປະເທດເກົາຫຼີເມື່ອວັນທີ 2 ທີ່ຜ່ານມາ.

 

“ນີ້ແມ່ນລາຍການສຸດທ້າຍໃນການແຂ່ງຂັນ ແບັດມິນຕັນນາໆຊາດຢ່າງເປັນທາງການແລ້ວ ດີໃຈທີ່ສິ້ນສຸດລົງໂດຍການເປັນຜູ້ຊະນະ ເກມທຳອິດໜັກຫຼາຍ ແລະ ກົດດັນຫຼາຍ ມັນເຮັດໃຫ້ຮຶດຫຼິ້ນແບບສູ້ຕາຍເພາະນີ້ແມ່ນເກມສຸດທ້າຍແລ້ວ ເສຍບໍ່ໄດ້ ຍິ່ງເສຍໃນບ້ານຍິ່ງບໍ່ໄດ້ເດັດຂາດ”.

 

ລີ ຢອງ ແດ່ ອາຍຸ 28 ປີກ່າວ ແລະ ຢືນຢັນວ່າການໄດ້ແຊມຊາຍຄູ່ແບັດມິນຕັນໂຄຣຽນ ໂອເພັນ 2016 ຄັ້ງນີ້ເປັນ ແຊມຊຸບເປີ້ຊີຣີຕຳແໜ່ງທີ 43 ຂອງຕົນເອງ ແລະ ເປັນຕຳແໜ່ງແຊມທີ່ມີຄວາມໝາຍຫຼາຍເປັນພິເສດຕະຫຼອດໄລຍະເວລາ 13 ປີຕິດຕໍ່ກັນມາ ເພາະນີ້ເປັນແຊມສຸດທ້າຍໃນຊີວິດແບັດມິນຕັນ.

 

“ຂ້ອຍຕັດສິນໃຈເຊົາຫຼິ້ນມາຕັ້ງແຕ່ຕົ້ນປີແລ້ວ ຂີດເສັ້ນໄວ້ແລ້ວວ່າ ໂຄຣຽນ ໂອເພັນ ລາຍການນີ້ຈະເປັນລາຍການສຸດທ້າຍຂອງຕົນເອງ ເຖິງວ່າຜູ້ໃຫຍ່ຫຼາຍຄົນ ແລະ ຫຼາຍຝ່າຍຈະຂໍຮ້ອງ ແລະ ຮຽກຮ້ອງໃຫ້ຫຼິ້ນຕໍ່ໄປຈົນຮອດໂອລິມປິກ 2020 ເພາະຍັງຫຼິ້ນໄຫວ ແລະ ບໍ່ແກ່ຈົນເກີນໄປແຕ່ຂ້ອຍຕ້ອງປະຕິເສດໄປເພາະຕັດສິນໃຈແລ້ວສ່ວນຈະເຮັດຫຍັງຕໍ່ໄປເອົາໄວ້ອີກໄລຍະໜຶ່ງຄ່ອຍລົງມືເຮັດ” ລີ ຢອງ ແດ່ ກ່າວ.

 

ລີ ຢອງ ແດ່ ແຈ້ງເກີດໃນວົງການດອກປີກໄກ່ໂລກໂດຍການໄດ້ແຊມ 3 ແຊມຄືຊາຍຄູ່, ຄູ່ປະສົມ, ທີມປະສົມຈາກແບັດມິນຕັນເຍົາວະຊົນຊິງແຊມໂລກ 2003 ປີດຽວກັນກໍແຈ້ງເກີດໃນລະດັບທົ່ວໄປ ໂດຍການໄດ້ແຊມຊາຍດ່ຽວແບັດມິນຕັນໄທແລນ ໂອເພັນ 2003 ຮ່ວມກັບ ຈຸງ ແຈ ຊັງ.

 

ຈາກນັ້ນ ລີ ຢອງ ແດ ຈັບຄູ່ກັບ ລີ ຮຽວ ຈຸງ ໄດ້ຫຼຽນຄຳຄູ່ປະສົມກິລາໂອລິມປິກເກມ 2008 ຈັບຄູ່ກັບ ຢູ ເຢືອນ ເຊືອງ ໄດ້ 2 ຫຼຽນຄໍາຈາກປະເພດຊາຍຄູ່ ແລະ ທີມຊາຍໃນກິລາອາຊຽນເກມ 2014 ຈັບຄູ່ກັບ ຈຸງ ແຈ ຊຸງ ໄດ້ຮອງແຊມຊາຍຄູ່ແບັດມິນຕັນຊິງແຊມໂລກ 2007, 2009 ແລະ ຄູ່ກັບ ຢູ ເຢືອນ ເຊືອງ ໄດ້ຮອງແຊມຊາຍຄູ່ແບັດມິນຕັນຊິງແຊມໂລກ 2014 ແລະ ອື່ນໆອີກຫຼາຍລາຍການ.