ປິດຂ່າວລື!!ບາຊາຢັນເນມາຕົກລົງຂະຫຍາຍສັນຍາອີກ 5 ປີ

 

ຄວາມຫວັງໃນການດຶງ ເນມາ ໄປປະຈຳການເກມບຸກຂອງ ເປເອັດເຊ ກາຍເປັນໝັນແນ່ນອນເຖິງວ່າຈະທຸ່ມເງິນເປັນສະຖິຕິໂລກເພາະວ່າ ບາເຊໂລນາ ຢືນຢັນແລ້ວວ່າດາວຍິງແຊມບ້າຕົກລົງຂະຫຍາຍສັນຍາກັບທີມອອກໄປອີກ 5 ປີແລ້ວໂດຍຈະມີການລົງນາມຢ່າງເປັນທາງການວັນສຸກນີ້.

 

ບາເຊໂລນາ ມະຫາອຳນາດລູກໜັງຂອງ ລາ ລີກາ ສະເປນອອກມາປະກາດເມື່ອວັນຈັນທີ່ຜ່ານມາວ່າ ເນມາ ສູນໜ້າຂອງທີມຕົກລົງຕໍ່ສັນຍາໃໝ່ເພີ່ມເຕີມອອກໄປອີກ 5 ປີຮຽບຮ້ອຍແລ້ວ ໂດຍຈະມີການເຊັນຂະຫຍາຍສັນຍາຢ່າງເປັນທາງການໃນວັນສຸກທີ່ຈະມາເຖິງນີ້.

 

ກ່ອນໜ້ານີ້ສະຕາກອງໜ້າທີມຊາດບາຊິວຕົກເປັນຂ່າວກ່ຽວພັນກັບການຍ້າຍທີມຢ່າງຕໍ່ເນື່ອງ ໂດຍມີລາຍງານວ່າ ແມນເຊສເຕີ ຢູໄນເຕັດ ພ້ອມທຸ່ມເງິນກ້ອນໃຫຍ່ດຶງ ເນມາ ໄປເສີມທັບ ຂະນະທີ່ອາທິດທີ່ຜ່ານມາ “ເດິ ຊັນ” ສື່ອັງກິດກໍກ່າວວ່າ ປາຣີ ແຊັງ-ແຊັກແມັງ ຍິນດີເທງົບເຖິງ 200 ລ້ານປອນເພື່ອດຶງນັກເຕະໄປຮ່ວມທັບໃນຊ່ວງຊຳເມີປີໜ້າ.

 

ຢ່າງໃດກໍຕາມຫຼ້າສຸດ ບາຊາ ປິດຂ່າວລືຕ່າງໆນໆໂດຍການຢືນຢັນວ່າ ເນມາ ຈະເຊັນຂະຫຍາຍສັນຍາຢ່າງເປັນທາງການໃນວັນສຸກທີ 21 ຕຸລານີ້ເຊິ່ງສົ່ງຜົນໃຫ້ນັກເຕະຈະຢູ່ກັບທີມໄປຈົນຮອດເດືອນມິຖຸນາປີ 2021.

 

ບົດຄວາມໃຫມ່ໆ