ປັນເດວລີ້ເລັງດຶງມອນໂຕລິໂວ໊ຮ່ວມທັບເຈຍໃຫຍ່

 

ເຊຊາເຣ້ ປັນເດວລີ້ ນາຍໃຫຍ່ຄົນໃໝ່ຂອງ ບາເລັນເຊຍ ຢາກດຶງໂຕ ຣິກຄາໂດ້ ມອນໂຕລິໂວ້ ກອງກາງໂຕເກົ໋າຂອງ ເອຊີ ມິລານ ໃນຕົ້ນປີໜ້າ ຄາດວ່າ “ເຈຍໃຫຍ່” ເລັງທຸ່ມເງິນ 10 ລ້ານເອີໂຣຫວັງໄດ້ໂຕມາເສີມທັບແດນກາງ.

 

ເຊຊາເຣ້ ປັນເດວລີ້ ນາຍໃຫຍ່ຄົນໃໝ່ຂອງ “ເຈຍໃຫຍ່” ບາເລັນເຊຍ ສະໂມສອນດັງຂອງ ລາ ລີກາ ສະເປນຕົກເປັນຂ່າວວ່າຕ້ອງການດຶງໂຕ ຣິກຄາໂດ້ ມອນໂຕລິໂວ້ ມິດຟິວກັບຕັນທີມຂອງ ເອຊີ ມິລານ ທີມດັງຈາກອີຕາລີໃນຊ່ວງເປີດຕະຫຼາດຊື້ຂາຍນັກເຕະເດືອນມັງກອນນີ້.

 

ກ່ອນໜ້ານີ້ ບາເລັນເຊຍ ຫາກໍເຮັດການແຕ່ງຕັ້ງ ປັນເດວລີ້ ມາຄຸມບັງຫຽນໃນຖິ່ນ ເມສຕາຢ້າ ສະເຕດ້ຽມ ເປັນໄລຍະເວລາ 2 ປີ ຫຼ້າສຸດມີລາຍງານລະບຸວ່າອະດີດນາຍໃຫຍ່ ຟິອໍເລັນຕິນ້າ ກັບທີມຊາດອີຕາລີໄດ້ສະເໜີລາຍຊື້ນັກເຕະທີ່ເຂົາພ້ອມເສີມທັບໄປໃຫ້ກັບ ປີເຕີ້ ລິມ ເຈົ້າຂອງທີມຄົນສິງກະໂປແລ້ວເຊິ່ງ ມອນໂຕລິໂວ້ ອາຍຸ 31 ປີເປັນໜຶ່ງໃນເປົ້າໝາຍ ແລະ ຄາດວ່າ ບາເລັນເຊຍ ພ້ອມທຸ່ມ 10 ລ້ານເອີໂຣເພື່ອດຶງນັກເຕະໃຫ້ໄດ້.

 

ທັງນີ້ໄລຍະທີ່ຜ່ານມາ ມອນໂຕລິໂວ້ ຍັງບໍ່ເປັນທີ່ມັກຮັກຂອງແຟນບານ ເອຊີ ມິລານ ແລະ ເຊື່ອກັນວ່າເຂົາອາດຍ້າຍທີມໃນອະນາຄົດເຖິງວ່າຈະເປັນຫົວໜ້າທີມຢູ່ກໍຕາມ.