ປັນຍາປະດິດ (AI) ຈະປ່ຽນສະມາດໂຟນໄປໃນທິດທາງໃດໃນປີ 2018 ນີ້

ປັນຍາປະດິດ (AI) ຈະປ່ຽນສະມາດໂຟນໄປໃນທິດທາງໃດໃນປີ 2018 ນີ້

 

ປີ 2017 ທີ່ຜ່ານມາ ວົງການສະມາດໂຟນໄດ້ລິເລີ່ມໃນການພັດທະນາປັນຍາປະດິດ ຫລື ລະບົບ AI ກັນຫລາຍຂຶ້ນ, ເຊິ່ງເຮັດໃຫ້ເຮົາໄດ້ເຫັນຄວາມສາມາດອັນຫຼາກຫລາຍຂອງລະບົບດັ່ງກ່າວຕັ້ງແຕ່ການວິເຄາະຂໍ້ມູນທີ່ຊັບຊ້ອນ ເຊັ່ນຮູບພາບ ໄປຈົນເຖິງຄວາມສາມາດໃນການຮຽນຮູ້ດ້ວຍໂຕເອງຂອງລະບົບ. ການນຳເອົາAI ມາຝັງເຂົ້າກັບລະບົບຂອງສະມາດໂຟນຈຶ່ງປຽບຄືກັບການປົດລ໋ອກຄວາມສາມາດຂອງສະມາດໂຟນໄປອີກຂັ້ນ. ເຮົາມາເບີ່ງກັນວ່າ AI ໃນປີ 2018 ນັ້ນ ມີແນວໂນ້ມຈະປ່ຽນສະມາດໂຟນໃຫ້ສະຫລາດຂຶ້ນຄືແນວໃດ.   

1. ຍົກລະດັບການຖ່າຍຮູບພາບດ້ວຍ AI ວິເຄາະວັດຖຸ

ຄຸນສົມບັດດ້ານການຖ່າຍຮູບເປັນສິ່ງທີ່ສະມາດໂຟນຍຸກໃຫມ່ຂາດບໍ່ໄດ້, ເຖິງແມ່ນໃນຍຸກກ່ອນສະມາດໂຟນຈະພັດທະນາໄປໄກຈົນຖ່າຍພາບໄດ້ງາມທຽບເທົ່າກ້ອງມືອາຊີບແລ້ວ, ເມື່ອມີ AI ເພີ່ມເຂົ້າມາຈະຊ່ວຍເຮັດໃຫ້ການຖ່າຍຮູບງ່າຍ, ງາມ ແລະ ເປັນທຳມະຊາດຍິ່ງຂຶ້ນ. ຍ້ອນ AI ສາມາດເຄາະວັດຖຸ, ອົງປະກອບພາບ, ແລະ ປັບຄ່າຕ່າງໆໃຫ້ເຫມາະສົມກັບສະຖານະການຕົວຈິງແບບອັດຕະໂນມັດ. ລະບົບນີ້ຖືກນຳໃຊ້ແລ້ວໃນສະມາດໂຟນ Huawei Mate 10 Pro.  ໃນປີ 2018 ນີ້ AI ເຫລົ່ານີ້ຈະໄດ້ຮັບການພັດທະນາໃຫ້ດີຂຶ້ນ ແລະ ແຜ່ຫລາຍຂຶ້ນ ຈົນອາດຈະກາຍເປັນຟິດເຈີ້ປະຈຳເຄື່ອງຂອງສະມາດໂຟນສ່ວນໃຫຍ່ໄປໃນທີ່ສຸດ.

2. ລະບົບແປພາສາທີ່ໃຊ້ງ່າຍ ແລະ ຖືກຕ້ອງກວ່າເກົ່າ

ຟັງຊັ້ນແປພາສາເປັນຟັງຊັ້ນທີ່ມີປະໂຫຍດ ແຕ່ຫລາຍຄົນກັບເລືອກທີ່ຈະບໍ່ໃຊ້ ເພາະແອັບພາສາທີ່ມີຢູ່ໃນຍຸກປັດຈຸບັນມີຄວາມສາມາດຂ້ອນຂ້າງຈຳກັດ ເຊັ່ນ:ຈຳເປັນຕ້ອງຕໍ່ອິນເຕີເນັດເພື່ອແປ, ແປສຽງເວົ້າບໍ່ໄດ້, ຕ້ອງແປເທື່ອລະຄຳ ຫລື ອາດຈະແປບໍ່ຄ່ອຍຖືກປານໃດ. ແຕ່ປັດຈຸບັນສະມາດໂຟນຍີ່ຫໍ້ຕ່າງໆເລີ່ມຝັງຟັງຊັ້ນແປພາສາຕິດມາກັບສະມາດໂຟນເລີຍ ເຊັ່ນ: ໂຫມດແປພາສາຜ່ານກ້ອງ Real-Time ຂອງ Huawei Mate 10 Pro ໃຊ້ງານໄດ້ບໍ່ຕ້ອງຕ້ອງເຊື່ອມຕໍ່ອິນເຕີເນັດ, ການແປບົດສົນທະນາແບບຮີບດ່ວນ ແລະ ອື່ນໆ. ເມື່ອມີ AI ຈະເຮັດໃຫ້ກຳແພງຈຳກັດດ້ານພາສາປີນີ້ບາງລົງອີກຢ່າງແນ່ນອນ.

3. ສະມາດໂຟນທີ່ເຂົ້າກັບຮູບແບບການໃຊ້ຊີວິດແບບສະເພາະຕົວ

ຄຸນລັກສະນະຂອງ AI ຍຸກໃຫມ່ ຄືຄວາມສາມາດໃນການຮຽນຮູ້ດ້ວຍໂຕເອງຈາກການໃຊ້ງານແທ້, ຫມາຍຄວາມວ່າຍິ່ງເຮົາໃຊ້ງານມັນຫລາຍເທົ່າໃດ ມັນກໍ່ຈະຍິ່ງສະຫລາດຫລາຍຂຶ້ນເທົ່ານັ້ນ. ເມື່ອນຳ AI ມາຊ່ວຍຄວບຄຸມການເຮັດວຽກງານດ້ານຕ່າງໆຂອງສະມາດໂຟນ ຈະເຮັດໃຫ້ລະບົບປັບໂຕເຂົ້າກັບລັກສະນະການໃຊ້ງານຂອງຜູ້ໃຊ້ເຊັ່ນ ຕົວຢ່າງຄືການຮຽນຮູ້ປະລິມານການໃຊ້ແບັດເຕີລີ້ໃນແຕ່ລະມື້, ຊ່ວງເວລາທີ່ສາກແບັດປະຈຳ, ແອັບພິເຄຊັ້ນໃດທີ່ໃຊ້ດຸ ແລະ ແອັບໃດບໍ່ຄ່ອຍໄດ້ໃຊ້ງານເປັນຕົ້ນ, ລະບົບຈະຊ່ວຍເຮັດໃຫ້ສະມາດໂຟນໃຊ້ພະລັງງານແບັດເຕີລີ້ຢ່າງຄຸ້ມຄ່າ ແລະ ຈັດສັນພະລັງງານເຄື່ອງໄປໃຫ້ແອັບທີ່ໃຊ້ງານແທ້ໆ, ເວົ້າງ່າຍໆກໍ່ຄືສະມາດໂຟນຈະໄວຂຶ້ນ, ປະຢັດແບັດ ແລະ ມີປະສິດທິພາບໂດຍລວມດີຂຶ້ນ.

 

4. ລະບົບສະແກນໃບໜ້າ 3 ມິຕິຈະແພ່ຫລາຍຂຶ້ນ

ທີ່ຜ່ານມາເຮົາໄດ້ສຳພັດນະວັດຕະກຳໃຫມ່ຂອງວົງການສະມາດໂຟນໃນ iPhone X ນັ້ນກໍ່ຄືລະບົບສະແກນໃບຫນ້າ 3ມິຕິ ດ້ວຍກ້ອງ True Depth ທີ່ໄດ້ກາຍເປັນລະບົບຮັກສາຄວາມປອດໄພແບບໃຫມ່ທີ່ປອດໄພກວ່າເກົ່າ, ແຕ່ກໍ່ບໍ່ແມ່ນວ່າ Apple ຈະຜູກຂາດເທັກໂນໂລຢີນີ້ໄວ້ໄດ້ຕະຫລອດ ເພາະຜູ້ຜະລິດສະມາດໂຟນຂອງທາງ Android ກໍ່ສາມາດພັດທະນາເທັກໂນໂລຢີຄ້າຍໆກັນຂຶ້ນມາໄດ້ຢ່າງບໍ່ຍາກ ໃນປີນີ້ເຮົາອາດຈະໄດ້ເຫັນລະບົບສະແກນຫນ້າກັບສະມາດໂຟນລຸ້ນອື່ນໆອີກກໍ່ເປັນໄດ້

5. ການສັ່ງງານດ້ວຍສຽງທີ່ເຂົ້າໃຈກັນຫລາຍຂຶ້ນ

ເຮົາຄຸ້ນເຄີຍກັບຜູ້ຊ່ວຍອັດສະລິຍະໃນສະມາດໂຟນຄື Siri ກັນມາພໍສົມຄວນແລ້ວ ແຕ່ປະຕິເສດບໍ່ໄດ້ວ່າມັນຍັງບໍ່ສະຫລາດພໍທີ່ຈະຊ່ວຍວຽກເຮົາໄດ້ຢ່າງຈິງຈັງໆ, ແຕ່ໄລຍະຫລັງກໍ່ເຫັນຫຼາຍໆບໍລິສັດເລີ່ມຫັນມາພັດທະນາຜູ້ຊ່ວຍອັດສະລິຍະຂອງຕົນເອງຫລາຍຂຶ້ນເຊັ່ນ Google Assistant ທີ່ຝັງ AI ເຂົ້າໄປ ເຮັດໃຫ້ມັນກາຍເປັນຜູ້ຊ່ວຍທີ່ສະຫລາດຂຶ້ນທຸກຄັ້ງທີ່ເຮົາໃຊ້ງານ, ຈົນເຖິງຂັ້ນເຂົ້າໃຈຄຳສັ່ງທີ່ຊັບຊ້ອນ ແລະ ເຮັດວຽກຫລາຍຂັ້ນຕອນໄດ້ໃນການສັ່ງຄັ້ງດຽວ.

ທີ່ມາ : Gadgetsnow