ປັດຈຸບັນ ນະຄອນຫຼວງວຽງຈັນ ຍັງມີໜີ້ສິນຫຼາຍກວ່າ 9 ພັນຕື້ກີບ

ທ່ານ ​ດຣ. ສິນ​ລະ​ວົງ ຄຸດ​ໄພທູນ ເຈົ້າ​ຄອງ​ນະຄອນຫຼວງ​ວຽງຈັນ (ນວ) ໄດ້​ປະກອບ​ຄຳ​ເຫັນຊີ້​ແຈງ​ເພີ່ມ​ຕື່ມ​ຕໍ່​ການ​ພັດທະນາ ນວ ເນື່ອງ​ໃນ​ໂອກາດ​ທີ່​ເຂົ້າ​ຮ່ວມກອງ​ປະຊຸມ​ຄົບ​ຄະນະ​ ສະມາຊິກສະພາ​ແຫ່ງ​ຊາດ​ຊຸດ​ທີ VII ປະຈຳເຂດ​ເລືອກ​ຕັ້ງ​ທີ 1 (​ສສຊ) ໃນລະຫວ່າງ​ວັນ​ທີ 28-29 ກັນຍາ 2015 ຜ່ານ​ມາ ເຊິ່ງ​ທ່ານ​ໄດ້​ຕີລາຄາ​ກ່ຽວ​ກັບ​ຜົນ​ການຈັດຕັ້ງປະຕິບັດ​ ແຜນ​ພັດທະນາ ນວ ໃນໜຶ່ງ​ປີຜ່ານມາ ເປັນຕົ້ນ ເສດ​ຖະກິດໃນ​ທ້າຍ​ປີ​ມາ​ນີ້​ ໄດ້​ສືບຕໍ່​ພັດທະ​ນາ​ໃນ​ບັນຍາກາດ​ທ່ວງ​ທ່າ​ດີ ລວມ​ຍອດ​ຜະລິດ​ຕະ​ພັນ​ພາຍ​ໃນ ເພີ່ມ​ຂຶ້ນ 12,8% ສະເລ່ຍ​ລາຍ​ໄດ້ 4.390 ໂດ​ລາ​ສະຫະລັດ​ຕໍ່​ຄົນ​ຕໍ່​ປີ ພື້ນຖານ​ໂຄງ​ລ່າງ​ໄດ້​ມີ​ບາດກ້າວຂະຫຍາຍຕົວ ສະຖຽນ​ລະ​ພາບທາງ​ດ້ານ​ການເມືອງ​ມີ​ຄວາມໝັ້ນ​ທ່ຽງ ສັງຄົມ​ມີ​ຄວາມ​ສະຫງົບ ແລະ ມີ​ຄວາມ​ເປັນ​ລະບຽບຮຽບ​ຮ້ອຍ​ໂດຍ​ພື້ນຖານ.

ນອກຈາກ​ນັ້ນ ທ່ານ​ກໍ່​ໄດ້​ຊີ້ແຈງ​ເພີ່ມ​ຕື່ມ​ຕໍ່​ຂໍ້​ສະເໜີ​ຂອງ ​ສສຊ 1 ບາງ​ບັນຫາ​ດັ່ງນີ້: ຕໍ່​ກັບການ​ພັດທະນາ​ເມືອງ​ຫຼວງ​ໃຫ້ເປັນ​ຕົວ​ເມືອງ​ໜ້າ​ຢູ່ ແລະ ຍືນ​ຍົງມີ​ສະພາບ​ແວດ​ລ້ອມ​ທີ່​ດີ ເປັນຕົວ​ເມືອງ​ທີ່​ມີ​ການ​ພັດທະນາ​ນັບມື້​ນັບ​ກ້າວ​ຂຶ້ນ ມີ​ຄວາມ​ສະເໝີພາບ​ກັບ​ເມືອງ​ອື່ນໆ ໃນ​ນັ້ນ ຈະ​ສູ້ຊົນ​ສ້າງ ນວ ໃຫ້​ຫຼຸດ​ພົ້ນ​ອອກຈາກ​ນະຄອນ​ດ້ອຍ​ພັດທະນາ ​ເປັນນະຄອນ​ໜ້າ​ຢູ່​ຍືນ​ຍົງ​ຕາມ​ຕົວ​ຊີ້ວັດ 6 ສ ໃນ​ເບື້ອງ​ຕົ້ນ​ຈະ​ເລັ່ງ​ໃສ່ 2 ສ ຄື: ສ ສະຫງົບ​ສຸກ ທີ່​ມີ 7 ຕົວ​ຊີ້​ວັດ ແລະ ສ ສະອາດ ທີ່​ມີ 8 ຕົວ​ຊີ້​ວັດ ສູ້​ຊົນ​ປັບປຸງ​ບູລະນະບ້ານ​ຕ່າງໆ ໃຫ້​ເປັນ​ບ້ານ​ທີ່​ມີ​ພື້ນຖານ​ໂຄງ​ລ່າງ​ນັບ​ມື້​ດີ​ຂຶ້ນ ປຸກສ້າງ​ຖືກ​ແຜນຜັງ ເລັ່ງ​ແກ້​ໄຂ​ຊຸມຊົນ​ແອ​ອັດ​ໃຫ້​ຫຼຸດ​ລົງ ຮັບປະກັນຄວາມ​ຍືນ​ຍົງ​ໃຫ້​ຫຼີກ​ລຽງ​ໄພ​ພິບັດ​ທຳ​ມະ​ຊາດ ເຊັ່ນ: ນ້ຳ​ຖ້ວມ ນ້ຳ​ຂັງ ຕະ​ຝັ່ງ​ເຈື່ອນ ຢັບ​ຢັ້ງ​ໄພແຫ້ງແລ້ງ ໄຟ​ໄໝ້ ແລະ ອາກາດຮ້ອນ​ໃນ​ລະດັບ​ດີ ຈັດ​ຕັ້ງ​ປະຕິບັດມາດ​ຕະການ​ແກ້​ໄຂ​ລົດ​ຕິດ ສົ່ງເສີມ​ໃຫ້​ພາກ​ທຸລະ​ກິດ​ ສ້າງ​ບ່ອນຈອດ​ລົດ ກຳນົດ​ຄ່າ​ບໍລິການ​ຕາມກົນ​ໄກ​ຕະຫຼາດ ລັດ​ພຽງ​ເກັບ​ມູນຄ່າ​ພາສີ​ເພີ່ມ 10% ແລະ ອາກອນ​ລາຍ​ໄດ້​ຕາມ​ກົດໝາຍ ສູ້ຊົນ​ອະນຸ​ຮັກ​ຮັກສາ​ວັດຖຸບູຮານ ມໍລະດົກ​ຂອງ​ຊາດຂອງ ນວ ໃຫ້​ຄົງ​ຢູ່​ຍືນ​ນານ ໄປ​ພ້ອມ​ກັບການ​ຮັບປະກັນ​ອຳນວຍ​ຄວາມສະດວກ ​ໃຫ້​ອົງການ​ນຳ​ສູງ​ສຸດຂອງ​ສູນ​ກາງ​ພັກ ລັດຖະບານ ສະພາ​ແຫ່ງ​ຊາດ ສະ​ຖາ​ບັນ​ການເມືອງ​ຕ່າງໆ ແລະ ສະຖານທູດຢ່າງ​ປອດ​ໄພ ກ່ຽວ​ກັບ​ການ​ສ້າງຖານະ​ການ​ເງິນ ນວ ຈະ​ເລັ່ງ​ໃສ່ລະດົມ​ທຶນ​ຈາກ​ທົ່ວ​ສັງຄົມ ພັດທະ​ນາ​ສິນຄ້າ ນຳ​ໃຊ້​ເຄື່ອງມື​ທັນສະໄໝ​ເຂົ້າ​ໃນ​ການ​ເກັບ​ລາຍ​ຮັບ ເຮັດ​ໃຫ້​ລາຍ​ຮັບ​ຫຍັບ​ເຂົ້າ​ໃກ້ກັບ​ຄວາມ​ຈິງ ສຳລັບ​ການ​ຈັດຕັ້ງ​ປະຕິບັດ​ແມ່ນ​ໃຫ້​ຫັນ​ລົງ​ຮາກຖານ ​ເພື່ອ​ຊຸກຍູ້​ການ​ສ້າງ​ວິ​ສາຫະ​ກິດ​ປະຕິບັດ​ຄຳ​ຂວັນ 5 ດີ ກ່ຽວ​ກັບ​ມາດ​ຕະ​ກາແກ້​ໄຂ​ໜີ້ສິນ ແຕ່​ປີ 1997 ມາ​ຮອດ​ປັດ​ຈຸບັນ ນວ ມີ​ໜີ້​ສິນ​ທັງ​ໝົດ 11.089 ກວ່າ​ຕື້​ກີບ (ຊຳລະ​ແລ້ວ 1,6 ຕື້ກີບ ປັດຈຸບັນ​ຍັງ​ເຫຼືອ 9 ພັນ​ກວ່າຕື້​ກີບ) ສຳລັບ​ແຜນການ​ແກ້​ໄຂໜີ້​ສິນ​ແມ່ນ​ພັດທະນາ​ໂຄງການໃໝ່ ເອົາ​ລາຍ​ຮັບ​ໃໝ່ ຂາຍ​ຊັບສິນ ຫຼື ໃຫ້​ຜູ້​ລົງທຶນ​ສຳ​ປະທານໄລຍະ​ຍາວ ອອກ​ກົດໝາຍ​ອາກອນ​ຕົວ​ເມືອງ ແລະ ສະເໜີ​ເພີ່ມລາຄາ​ທີ່​ດິນ ​ໃນ​ເສັ້ນທາງ​ໃໝ່​ຂຶ້ນຕາມ​ລັດ​ຖະ​ບັນຍັດ 02

ທີ່ມາ ວຽງຈັນໃໝ່