ປັດຂ່າວລືແລ້ວ ຄັນເດຣວາ ສໍ່ແວວຍ້າຍໄປ "ງູໃຫຍ່"

ເອເຢນອອກມາໂຕ້ຂ່າວລື ອັນໂຕນີໂອ ຄັນເດຣວາ ປີກຈາກ ລາຊີໂອ ສໍ່ແວວຍ້າຍໄປຮັບໃຊ້ ອິນເຕີ ມິລານ ບໍ່ແມ່ນຄວາມຈິງ ບອກວ່າຕົນເອງບໍ່ຮູ້ຫຍັງຫຼັງຈາກທີ່ມີຂ່າວວ່າທັງນັກເຕະ ແລະ “ງູໃຫຍ່” ມີນັດການລົມກັນແບບລັບໆ.

ເຟດິຣິໂກ້ ປາສໂຕເຣໂລ ເອເຢນຂອງ ອັນໂຕນິໂອ ຄັນເດຣວາ ມິດຟິວປີກຂອງ ລາຊີໂອ ທີມດັງຈາກ ກັນໂຊ ຊີຣີ ອາ ອອກມາປະຕິເສດຂ່າວວ່າ ຂ່າວລືທີ່ວ່ານັກເຕະໃນການເບິ່ງແຍງອາດຈະຍ້າຍໄປຟາດແຄ່ງໃຫ້ກັບ ອິນເຕີ ມິລານ ຄູ່ແຂ່ງຮ່ວມລີກບໍ່ແມ່ນຄວາມຈິງແຕ່ຢ່າງໃດ.

ກ່ອນໜ້ານີ້ມີກະແສຂ່າວວ່າ ກອງກາງທີມຊາດ ອີຕາລີ ອາຍຸ 28 ປີເປັນເປົ້າໝາຍໃນການເສີມທັບຂອງ “ເນຣັດຊູຣີ” ແລະ ທັງສອງຝ່າຍມີການລົມກັນແບບລັບໆແລ້ວ ຢ່າງໃດກໍຕາມລ່າສຸດ ປາສໂຕເຣໂລ ໄດ້ປັດຂ່າວລືນັ້ນແລ້ວ ໂດຍຢືນຢັນວ່າຕົນເອງບໍ່ຮູ້ຫຍັງກ່ຽວກັບຄວາມເປັນໄປໄດ້ທີ່ວ່າ ຄັນເດຣວາ ຈະຍ້າຍໄປຫຼິ້ນໃນຮັງ ຊານ ຊີໂຣ.

ນາຍໜ້າຂອງອະດີດດາວເຕະ ອູດິເນເຊ ກ່າວວ່າ “ຂ້ອຍບໍ່ໄດ້ອ່ານເລື່ອງເຫຼົ່ານີ້ໃນໜັງສືພິມ ຕອນນີ້ຂ້ອຍຕ້ອງບອກວ່າຂ້ອຍບໍ່ຮູ້ຫຍັງ ຖ້າຕອນໃດທີ່ມີການພັດທະນາຈາກຂ່າວລືເຫຼົ່ານັ້ນ ເຮົາຈະພິຈາລະນາຮ່ວມກັນກັບນັກເຕະ ແລະ ເຮົາຈຶ່ງຈະໄດ້ຮູ້”.

................................................................................................................................................