ປະໂຫຍດ​​ ທີ່​ມະຫາ​ສານ​ເກີນໂ​ຕ ຂອງສານ​ກັນບູດ

ຫຼາຍ​ຄົນ​ຄົງ​ເຄີຍ​ເຫັນ​ສານ​ດູດ​ຄວາມ​ຊື້ນ​ຖົງ​ນ້ອຍ​ທີ່​ມັກ​ຕິດ​ມາ​ກັບ​ຜະລິດຕະພັນ​ຫຼາຍ​ຊະນິດ​ໂດຍ​ ສະເພາະ​ອາຫານ​ “ຄຳ​ເຕືອນ​: ຫ້າມ​ບໍລິ​ໂພກ​” ທີ່​ຕິດ​ຢູ່​ເທິງ​ນັ້ນ​ຄົງ​ເຮັດໃຫ້​ຫຼາຍ​ຄົນ​ຮູ້ສຶກ​ຫວັ່ນ​ໃຈ​ທີ່​ຈະ​ເກັບ​ໄວ້​ແລະ​ຖິ້ມ​ຖັງ​ຂີ້ເຫຍື້ອ​ໄປ​ທັນ​ທີ​ ແຕ່​ກ່ອນ​ຈະ​ຖິ້ມ​ນີ້​ຄື​ປະໂຫຍດ​ຂອງ​ຖົງ​ນ້ອຍ​ໆ​ ທີ່​ມະຫາ​ສານ​ເກີນ​ໂຕ​!
1.ໂທລະ​ສັບ​ປຽກ​ນ້ຳ​ບໍ່​ແມ່ນ​ບັນຫາ​ອີກ​ຕໍ່ໄປ​ ຊື່​ທີ່​ເຮົາເອີ້ນ​ກັນ​ກໍ​ບົ່ງ​ບອກ​ຢູ່​ແລ້ວ​ວ່າ​ມັນ​ເປັນ​ “ສານ​ດູດ​ຄວາມ​ຊື້ນ​” ດັ່ງ​ນັ້ນ​ຖ້າ​ຫາກ​ເກີດ​ຄວາມ​ຊື້ນ​ຂຶ້ນ​ກັບ​ອຸປະກອນ​ອິ​ເລັກໂທນິກ​ຂອງ​ເຈົ້າ​ ນອກ​ຈາກ​ການ​ເອົາ​ໄປ​ແຊ່​ໃນ​ຖັງ​ເຂົ້າ​ສານ​ແລ້ວ​ການ​ໃສ່​ສານ​ດູດ​ຄວາມ​ຊື້ນ​ລົງ​ໄປ​ກໍ​ຊ່ວຍ​ໄດ້​ເຊັ່ນ​ກັນ​ແລະ​ຜູ້​ທີ່​ເຄີຍ​ລອງ​ເຮັດ​ແລ້ວ​ຍັງ​ຢືນຢັນ​ວ່າ​ “ດີກວ່າ​ເຂົ້າ​ 10 ເທົ່າ​”
2.ເກັບ​ຮັກສາ​ພາບ​ແຫ່ງ​ຄວາມ​ຊົງ​ຈຳ​ ພາບ​ຖ່າຍ​ໃບ​ເກົ່າ​ທີ່​ເກັບ​ໄວ້​ໃນ​ກ່ອງ​ຈະ​ບໍ່​ພັງ​ເພາະ​ຄວາມ​ຊື້ນ​ພຽງ​ແຕ່​ໃສ່​ຖົງ​ດູດ​ຄວາມ​ຊື້ນ​ລົງ​ໄປ​ແລ້ວ​ປິດ​ໃຫ້​ມິດ​ຊິດ​.
3.ປົກ​ປ້ອງ​ເຄື່ອງ​ສຳ​ອາງ​ ໃສ່​ສານ​ດູດ​ຄວາມ​ຊື້ນ​ລົງ​ໄປ​ໃນ​ກະ​ເປົ໋າ​ເຄື່ອງ​ສຳ​ອາງ​ຈະ​ຊ່ວຍ​ໃຫ້​ຜະລິດຕະພັນ​ທີ່​ເປັນ​ຜົງ​ແປ້ງ​ອັດ​ແຂງ​ບໍ່​ພັງ​ເສຍ​ຫາຍ.​
4.ຮັກສາ​ຄວາມ​ສະ​ອາດ​ຂອງ​ອຸປະກອນ​ອອກ​ກຳ​ລັງ​ກາຍ​ທີ່​ອັບ​ຊື້ນ​ ຫຼາຍ​ຄົນ​ມັກ​ຖິ້ມ​ອຸປະ ກອນ​ຕ່າງ​ໆ​ ໄວ້​ໃນ​ກະ​ເປົ໋າ​ຫຼັງ​ການ​ອອກ​ກຳ​ລັງ​ກາຍ​ ຄວາມ​ຊື້ນ​ແລະ​ເຫື່ອ​ທີ່​ໝັກ​ໝົມ​ຢູ່ໃນ​ນັ້ນ​ເຮັດໃຫ້​ແບັກ​ທີ​ເລຍ​ຈະເລີນ​ເຕີບໃຫຍ່​ແລະ​ສົ່ງ​ກິ່ນ​ເໝັນ​ ສານ​ດູດ​ຄວາມ​ຊື້ນ​ຈັກ​ສອງ​ສາມ​ອັນ​ຊ່ວຍ​ເຈົ້າ​ໄດ້​.
5.ກຳຈັດ​ກິ່ນ​ອັບ​ຂອງ​ຜ້າ​ເຊັດ​ໂຕ​ ວາງ​ສານ​ດູດ​ຄວາມ​ຊື້ນ​ໄວ້​ໃນ​ຜ້າ​ເຊັດ​ໂຕ​ທີ່​ພັບ​ໄວ້​ແລ້ວ​ກິ່ນ​ອັບ​ບໍ່​ພຶງ​ປະສົງ​ຈະ​ໝົດ​ໄປ.​
6.ໝາກອຶ​ຮາ​ໂລ​ວີນ​ ໝາກອຶ​ແກະ​ສ​ະຫຼັກ​ສຳລັບ​ຕົກ​ແຕ່ງ​ໃນ​ເທດ​ສະການ​ມື້​ຮາ​ໂລ​ວີນ​ຈະ​ຢູ່​ໄດ້​ດົນ​ຂຶ້ນ​ແລະ​ບໍ່​ເນົ່າ​ເສຍ​ໄດ້​ງ່າຍ​ຖ້າ​ຫາກ​ວາງ​ສານ​ດູດ​ຄວາມ​ຊື້ນ​ລົງ​ໄປ​ດ້ວຍ​.
7.ກະ​ຈົກ​ໜ້າລົດກະ​ຈ່າງ​ໃສ​ ວາງ​ສານ​ດູດ​ຄວາມ​ຊື້ນ​ໄວ້​ທີ່​ແຜງ​ໜ້າ​ປັດ​ລົດຍົນ ​ເພື່ອຫຼຸ​ດ​ການ​ຄວບ​ແໜ້ນ​ຂອງ​ໄອ​ນ້ຳ​ທີ່​ເຮັດໃຫ້​ກະ​ຈົກ​​ມົວ.​
8.ເພັດ​ພອຍ​ລະ​ຢິບ​ລະ​ຢັບ​ຕະຫລອດ​ເວລາ​ ຄວາມ​ຊື້ນ​ເຮັດໃຫ້​ເພັດ​ພອຍ​ແລະ​ເຄື່ອງ​ປະ​ດັບ​ແວວ​ວາວ​ໝອງ​ແລະ​ເຊື່ອມ​ສະພາບ​ ໃສ່​ສານ​ດູດ​ຄວາມ​ຊື້ນ​ລົງ​ໄປ​ຈັກ​ສອງ​ຖົງ​ຈະ​ຊ່ວຍ​ຮັກສາ​ຄວາມ​ແວວ​ວັບ​ເປັນ​ປະ​ກາຍ​ໄດ້​ດີ​ຂຶ້ນ.​
ຖ້າ​ຫາກ​ສານ​ດູດ​ຄວາມ​ຊື້ນ​ແບບ​ເຈນ​ເຮັດວຽກ​ໄດ້​ບໍ່​ມີປະ​ສິດ​ທິ​ພາບ​ຫລາຍ​ພໍ​ນຳ​ໄປ​ອົບ​ໃນ​ເຕົາ​ທີ່​ຄວາມ​ຮ້ອນ​ 100 ອົງ​ສາ​ຟາ​ເລນ​ໄຮ​​ຈະ​ເຮັດໃຫ້​ມັນ​ກັບ​ມາ​ໃຊ້​ງານ​ໄດ້​ດີຄືເກົ່າ.​

===========================================================================================================