ປະເທດຮົງກາລີ ພົບບັນຫາຂາດແຄນແຮງງານຢ່າງໜັກ

 ບໍລິສັດ​ແມນ​ພາວ​ເວີກຣຸບ​ເປີດ​ເຜີຍ​ຜົນ​ການ​ສຳ​ຫຼວດລະບຸ​ວ່າ ບໍລິສັດ​ກວ່າ​​ເຄິ່ງໜຶ່ງ​ຂອງ​ທັງ​ໝົດ​ຢູ່​ຮົງ​ກາລີ​ບໍ່​ສາມາດ​ຫາ​ບຸກຄະລາ​ກອນ​ເຂົ້າ​ມາ​ເຮັດ​ວຽກ​ໃນ​ຕຳ​ແໜ່​ງທີ່​ວ່າງ​ໄດ້ ​ເນື່ອງ​ຈາກ​ເກີດ​ພາວະ​ຂາດ​ແຄນ​ແຮ​ງງານ​ຢ່າງ​ໜັກ.

         ຜົນ​ການ​ສຳ​ຫຼວດປະຈຳ​ປີ​ເປີດ​ເຜີຍ​ວ່າ ບໍລິສັດຢູ່​ໃນ​ຮົງ​ກາລີ​ທີ່​ຮ່ວມ​ເຮັດ​ແບບ​ສອບ​ຖາມ 57% ປະສົບ​ບັນຫາ​ໃນ​ດ້ານ​ບຸກຄາ​ລາກ​ອນ​ເຂົ້າ​​ເຮັດ​ວຽກ ຊຶ່ງຕົວ​ເລກນີ້ເພີ່ມ​ຂຶ້ນ 10 ຈຸດ​ຈາກ​ປີ​ທີ່​ຜ່ານ​ມາ ​ແລະ ສູງ​ກວ່າ​ຄ່າ​ສະ​ເລ່ຍຈາກ​ການ​ສຳ​ຫຼວດ​ໃນ 42 ປະ​ເທດ​ທົ່ວ​ໂລກ​ຢູ່ທີ່ 40%, ຊຶ່ງ​ກົມ​ຜູ້​ຈັດການ​ບໍລິສັດ​ແມນ​ພາວ​ເວີກຣຸບຢູ່​ຮົງ​ກາລີ​ກ່າວ​ວ່າ ບໍລິສັດ​ໃນ​ປະ​ເທດ​ບໍ່​ໄດ້​ຕໍ່ສູ້​ຍາດ​ຊີງ​ແຮງ​ງານ​ກັນ​ເອງ​ພາຍ​ໃນ​ປະ​ເທດ​ເທົ່າ​ນັ້ນ ​ແຕ່​ຕ້ອງ​ຕໍ່ສູ້​ກັບ​ບໍລິສັດ​ໃນ​ເອີຣົບຕາ​ເວັນ​ຕົກ ​ແລະ ບັນດາ​ປະ​ເທດ​ເພື່ອນ​ບ້ານ ທັງ​ນີ້​ຜົນ​ຕອບ​ແທນ​ທີ່​ຕໍ່າ​ກາຍ​ເປັນ​ຈຸດ​ອ່ອນ​ສຳຄັນ​ທີ່​ເຮັດ​ໃຫ້​ບໍລິສັດ​ໃນ​ຮົງ​ກາລີ​ບໍ່​ໜ້າ​ດຶງ​ດູດ​ໃນ​ບັນດາ​ສາຍຕາ​ລູກຈ້າງ, ຜົນສຳ​ຫຼວດຂອງ​ແມນ​ພາວ​ເວີກຣຸບລະບຸ​ວ່າ​ກວ່າ 1 ​ໃນ 3 ຂອງ​ບໍລິ ສັດ​ໃນ​ຮົງ​ກາລີ​ບໍ່​ສາມາ​ດຫາ​ພະນັກງານ​ເຂົ້າ​ເຮັດ​ວຽກ​ໃນ​ຕຳ​ແໜ່​ງທີ່​ວ່າງ​​ໄດ້ ​ເພາະ​ບໍ່​ມີ​ຜູ້​ສະໝັກ ຂະນະ​ທີ່​ອີກ 1 ​ໃນ 3  ຂອງຜູ້​ວ່າ​ຈ້າງ​ປະ​ເຊີນ​ກັບ​ບັນຫາ​ຜູ້​ສະໝັກ​ມີ​ຄຸນສົມບັດ​ບໍ່​ພຽງພໍ ຢ່າງ​ໃດ​ກໍ​ຕາມ ບໍລິສັດ​ປະມານ 1 ​ໃນ 3 ພະ ຍາຍາມ​ທີ່​ຈະ​ແກ້​ໄຂ​ບັນຫາ​ວິ​ກິດ​ບັນຫາ​ຂາດ​ແຄນ​ແຮງ​ງານ​ດ້ວຍ​ການຈັດ​ຝຶກ​ອົບຮົມ​ເພີ່ມ​ຕື່ມ​ໃຫ້​ກັບ​ພະນັກງານ ຂະນະ​ທີ່​ອີກ​ປະມານ 16% ປັບ​ເພີ່ມ​ສະຫວັດດີ​ການ​ໃຫ້​ກັບ​ພະນັກງານ.

       ຕຳ​ແໜ່​ງງານ​ທີ່​ປະ​ເຊີນ​ກັບ​ພາວະ​ຂາດ​ແຄນ​ແຮງ​ງານ​ສູງ​ສຸດ 10 ອັນ​ດັບ​ຢູ່​ຮົງ​ກາລີ​ມີ​ຄື: ອຸດສາຫະກຳ​ແຮງ​ງານ, ຊ່າງ​ໄມ້, ຊ່າງ​ໄຟ ​ແລະ ຊ່າງ​ນ້ຳ​ປະປາ ຕະຫຼອດ​ຈົນ​ເຖິງ​ພະນັກງານ​ຂັບ​ລົດ, ວິສະວະກອນ, ​ແພດ ຜູ້​ຊ່ຽວຊານ​ດ້ານ​ໄອ​ທີ ​ແລະ ພະນັກງານ​ບັນຊີ.

ແຫຼ່ງຂ່າວ: ໜັງສືພິມເສດຖະກິດ-ສັງຄົມ.