ປະທານສູນກາງ ແນວລາວສ້າງຊາດ ເນັ້ນໃຫ້ຖືຄວາມສາມັກຄີ ເປັນໜຶ່ງພາຍໃນພັກ

ປະທານ​ສູນ​ກາງ ​ແນວ​ລາວ​ສ້າງ​ຊາດ ​ໄດ້​​ໂອ້​ລົມ ​ແລະ ​ໃຫ້​ທິດ​ຊີ້​ນໍາ ​ໃນ​ໂອກາດ​ກອງ​ປະຊຸມ ການ​ດໍາ​ເນີນ​ຊີ​ວິດການ​ເມືອງ ​ປັບປຸງ​ປົວ​ແປງ​ພາຍ​ໃນ​ພັກ ສູນ​ກາງ​ແນວ​ລາວ​ສ້າງ​ຊາດ ​ໂດຍ​ເນັ້ນ​ໃຫ້​ຄະ​ນະ​ພັກ​, ສະມາຊິກ​ພັກ ຕ້ອງ​ເອົາ​ໃຈ​ໃສ່ ​ແລະ ຖື​ສໍາຄັນ​ວຽກງານ ການສຶກສາ​ອົບຮົມ ​ການ​ເມືອງ-​ແນວ​ຄິດ ​ໃຫ້​ສະມາ​ຊິກ​ພັກ, ພະນັກງານ​ໃຫ້​ປົກກະຕິ; ​ເພີ່ມ​ທະວີ​ຄວາມ​ສາມັກ​ຄີ​ ເປັນອັນ​ໜຶ່ງ​ອັນ​ດຽວ​ພາຍ​ໃນ​ພັກ, ຖື​ສໍາຄັນ​ຕໍ່ວຽກ​ງານ​ລວມ​ ເປັນພື້ນຖານ​ການ​ເຕົ້າ​ໂຮມ ​ຄວາມ​ສາມັກຄີ​ບັນດາ​ຊົນ​ເຜົ່າ, ຊັ້ນ​ຄົນ, ສາສະໜາ, ​ເພດ-​ໄວ ​ແລະ ຊາວ​ລາວ ​ທີ່​ດໍາລົງ​ຊີ​ວິດ​ຢູ່​ຕ່າງປະ​ເທດ.

ກອງ​ປະຊຸມ​ດັ່ງກ່າວ, ໄດ້​ປິດ​ລົງ​ໃນ​ວັນ​ທີ 26 ພຶດສະພາ​ 2017 ນີ້. ​ໂດຍສະຫາຍ ​ໄຊ​ສົມ​ພອນ ພົມວິຫານ ປະທານ​ສູນ​ກາງ ​ແນວ​ລາວ​ສ້າງ​ຊາດ ກ່າວ​ວ່າ: ສໍາລັບ​ການ​ກໍ່ສ້າງ​ ໜ່ວຍ​ພັກ​ແຂງ-ຮູ້​ນໍາພາ​ຮອບດ້ານ ຄວນ​ເອົາ​ໃຈ​​ໃສ່​ດໍາ​ເນີນ​ ຢ່າງ​ເປັນ​ຂະ​ບວນການ​ຕໍ່​ເນື່ອງ​ ມີ​ການ​ກວດກາ, ປະ​ເມີນ ​ແລະ ປັບປຸງ​ປົວ​​ແປງ​ ໄດ້​ພ້ອມໆ​ກັນ; ຄະນະ​ໜ່ວຍ​ພັກ, ສະມາ​ຊິກພັກ ​ຕ້​ອງຖື​ເອົາ​ວຽກ​ງານ ກໍ່ສ້າງ​ໜ່ວຍ​ພັກ​ແຂ​ງ-ຮູ້​ນໍາພາ​ຮອບດ້ານ​ ເຂົ້າ​ເປັນ​ມາດຖານ​ໜຶ່ງ ​ເພື່ອ​ສໍາ​ຫລວດ​ຕີ​ລາຄາ, ​ແບ່ງ​ປະ​ເພດ ​ທັງ​ເປັນ​ໄມ້​ຫລາ​ວັດ​ແທກ​ຜົນ​ສໍາ​ເລັດ; ການ​ກໍ່ສ້າງ​ພັກ-ພະນັກງານ ​ແມ່ນ​ຢຶດໝັ້ນ​ເປັນ​ເອກະ​ພາບ​ ປະຕິບັດ​ຕາມ 5 ຫລັກການ 3 ທິດ​ນໍາ, ຄວນ​ມີ​ແຜນ​ກໍານົດ​ ການ​ກໍ່ສ້າງ​ຢ່າງ​ຄັກ​ແນ່​ ໃຫ້​ຖືກ​ກັບ​ມາດຖານ​ຕົວ​ຈິງ. ພ້ອມ​ນີ້, ກໍເອົາ​ໃຈ​ໃສ່​ການ​ຂະຫຍາຍ​ພັກ ​ແລະ ອີງ​ໃສ່​ກົດ​ລະບຽບ​ ການ​ຂະຫຍາຍ​ພັກ ​ສະ​ໄໝ​ທີ X ຢ່າງ​ເຂັ້ມ​ງວດ ຮັບປະກັນ​ຄວາມ​ສອດ​ຄ່ອງກັບ​ ເງື່ອນ​ໄຂ​ທີ່​ແທ້​ຈິງ, ຝຶກ​ຝົນ​ຫລໍ່​ຫລອມ​ຕົນ​ເອງ​ ເປັນຜູ້​ທີ່​ເຂົ້າ​ໃຈ​ ແນວທາງ​ຂອງ​ພັກ​ຢ່າງ​ເລິກ​ເຊິ່ງ; ​ການ​ນໍາພາ ​ແລະ ​ແບບ​​ແຜນ​ວິທີ​ເຮັດ​ວຽກ​ ຄວນ​ປະຕິບັດ​ຕາມ​ຫລັກການ ​ລວມສູນ​ປະຊາທິປະ​ໄຕ, ເຮັດ​ວຽກ​ເປັນ​ໝູ່​ຄະນະ, ​ແບ່ງ​ຄວາມ​ຮັບຜິດຊອບ ​ໃຫ້​ບຸກຄົນ, ມີ​ການ​ຕິດຕາມ​ກວດກາ, ຊຸກຍູ້​ປະຕິບັດ​ ແຜນການ​ເຄື່ອນ​ໄຫວ​ ຂອງ​ໜ່ວຍ​ພັກ ​ໂດຍ​ມີ​ການ​ຕິດຕາມ​ ປະ​ເມີ​ນວຽກ​ງານ​ແຕ່​ລະ​ດ້ານ​ ເພື່ອ​ປັບປຸງ​ແກ້​ໄຂ​ດ້ານ​ອ່ອນ ​ແລະ ​ເສີມ​ຂະຫຍາຍ​ດ້ານ​ຕັ້ງໜ້າ ​ໃຫ້​ແທດ​ເໝາະ​ກັບ​ ແຕ່​ລະ​ເປົ້າ​ໝາຍ​ ຕາ​ມພາລະ​ບົດບາດ​ຂອງ​ຕົນ.

Cr:http://kpl.gov.la