ປະທານສະພາ ຢ້ຽມຢາມໂຄງການຊົນລະປະທານ ບ້ານຖ້ຳ ເມືອງຄູນ ແຂວງຊຽງຂວາງ

ວັນທີ 25 ທັນວາ ຜ່ານມານີ້ ທ່ານ ນາງ ປານີ ຢາທໍ່ຕູ້ ປະທານສະພາ ແຫ່ງຊາດ ພ້ອມຄະນະໄດ້ໄປຢ້ຽມຢາມ ແລະກວດສອບເບິ່ງໂຄງການກໍ່ສ້າງຊົນລະປະທານ ບ້ານຖໍ້າ ເມືອງຄູນ ແຂວງ ຊຽງຂວາງ ໃນໂອກາດທີ່ທ່ານໄດ້ໄປ ເຄື່ອນໄຫວເຮັດວຽກຢູ່ແຂວງດັ່ງກ່າວ
ທັງນີ້ທ່ານຮຽກຮ້ອງໃຫ້ບໍລິສັດຮັບເໝົາ ຈົ່ງເອົາໃຈໃສ່ກໍ່ສ້າງຄອງດັ່ງກ່າວໃຫ້ ແໜ້ນໜາໄດ້ມາດຕະຖານ ເພື່ອສາມາດ ລຳລຽງນ້ຳເຂົ້າໃສ່ພື້ນທີ່ການຜະລິດ ຂອງປະຊາຊົນໄດ້ຢ່າງພຽງພໍ ແລະນຳ ໃຊ້ໄດ້ຍາວນານ.

ຮ່ວມເດີນທາງກັບທ່ານ ເພື່ອລົງ ຢ້ຽມຢາມໂຄງການໃນຄັ້ງນີ້ ໂດຍແມ່ນ ທ່ານ ບຸນຕົ້ນ ຈັນທະພອນ ແລະທ່ານ ນາງ ອຸເທນ ມາສີຊົນໄຊ ຮອງເລຂາພັກ ແຂວງຊຽງຂວາງ ພ້ອມດ້ວຍທ່ານເຈົ້າ ເມືອງໆຄູນ ແລະພາກສ່ວນທີ່ກ່ຽວຂ້ອງ.

   ໂອກາດນີ້ ທ່ານ ທອງສະຫວັນ ສີບຸນ ເຮືອງ ຜູ້ປະສານງານໂຄງການຊົນລະປະທານບ້ານຖໍ້າ ໄດ້ຂຶ້ນກ່າວລາຍງານ ຄວາມຄືບໜ້າຂອງການກໍ່ສ້າງໃຫ້ຮູ້ວ່າ: ໂຄງການຊົນລະປະທານແຫ່ງນີ້ສ້າງ ເປັນເຂື່ອນດິນ ມີຄວາມສູງ 28 ແມັດ, ຄວາມຍາວຂອງເຂື່ອນ 205 ແມັດ, ກໍ່ສ້າງທາງເວັ້ນອ່າງມີຄວາມຍາວ 1 ພັນ ກວ່າແມັດ, ເຮັດຄອງເໝືອງອອກສອງ ຟາກມີຄວາມຍາວເກືອບ 7 ພັນແມັດ, ອ່າງສາມາດບັນຈຸນໍ້າໄດ້ເຖິງ 1,2 ລ້ານ ແມັດກ້ອນ ແລະກະຈາຍນໍ້າອອກໃຫ້ພໍ່ ແມ່ປະຊາຊົນໄດ້ຊົມໃຊ້ດ້ວຍຄອງເມືອງ 4 ເສັ້ນ ເພື່ອສະໜອງນໍ້າໃຫ້ພຽງພໍກັບ ຄວາມຕ້ອງການຂອງຊາວກະສິກອນໃນການທຳການຜະລິດ.

    ໂຄງການຊົນລະປະທານບ້ານຖໍ້າ ໄດ້ເລີ່ມລົງມືກໍ່ສ້າງມາແຕ່ວັນທີ 20 ພະ ຈິກ 2015, ໂດຍແມ່ນທຶນຊ່ວຍເຫຼືອລ້າ ຈາກກະຊວງກະສິກຳ ສ. ເກົາຫຼີ ລວມ ມູນຄ່າທັງໝົດ 4 ລ້ານໂດລາສະຫະລັດ ຫຼື ປະມານ 32 ຕື້ກີບ, ນອກນັ້ນຍັງມີທຶນ ສົມທົບຂອງລັດຖະບານແຫ່ງ ສປປ ລາວ 954 ລ້ານກີບ, ມາຮອດປະຈຸບັນການ ກໍ່ສ້າງປະຕິບັດໄດ້ແລ້ວ 70% ຄາດຈະ ສຳເລັດສົມບູນໃນທ້າຍເດືອນມີນາ 2017 ນີ້. ໂດຍແມ່ນບໍລິສັດ ຊາຍຄູນຄຳ ກໍ່ສ້າງເຄຫາສະຖານ-ຂົວທາງ ແລະ ຊົນລະປະທານຈຳກັດຜູ້ດຽວເປັນຜູ້ຮັບເໝົາ.

    ພາຍຫຼັງສຳເລັດການກໍ່ສ້າງຊົນລະ ປະທານດັ່ງກ່າວ ຈະຊ່ວຍເຮັດໃຫ້ປະຊາ ຊົນຈຳນວນ 3 ໝູ່ບ້ານຄື: ບ້ານຖໍ້າ, ບ້ານ ຫອຍ ແລະບ້ານໂພນໄຊ ລວມທັງໝົດ 153 ຄອບຄົວໄດ້ຮັບຜົນປະໂຫຍດຈາກ ໂຄງການ, ການຜະລິດກະສິກຳມີຄວາມ ສະດວກ, ໄດ້ຜົນຜະລິດທີ່ເພີ່ມຂຶ້ນທີ່ສຳ ຄັນຄືຈະເຮັດໃຫ້ຊີວິດການເປັນຢູ່ຂອງພໍ່ແມ່ປະຊາຊົນໄດ້ຮັບການພັດທະນາສູ່ລະດັບໃໝ່ຈາກການຜະລິດເປັນສິນຄ້າໂດຍນຳໃຊ້ນ້ຳໃນຊົນລະປະທານແຫ່ງນີ້.

    ໂອກາດດັ່ງກ່າວ ທ່ານ ນາງ ປານີ ຢາທໍ່ຕູ້ ໄດ້ກ່າວສະແດງຄວາມຊົມເຊີຍ ຕໍ່ກັບບໍລິສັດຮັບເໝົາທີ່ໄດ້ເອົາໃຈໃສ່ບຸກ ບືນເຮັດໃຫ້ການກໍ່ສ້າງມີຄວາມຄືບໜ້າ ໄວແຕ່ໃນເວລາດຽວກັນຕ້ອງເອົາໃຈໃສ່ ຕໍ່ຫຼັກວິຊາການ-ການອອກແບບທຸກຂັ້ນ ຕອນ ເພື່ອໃຫ້ໂຄງສ້າງການກໍ່ສ້າງມີ ຄວາມແໜ້ນໜາຖາວອນ ແລະສຳເລັດ ຕາມລະດັບຄາດໝາຍ.

ທີ່ມາ: ເສິຖະກິດ-ສັງຄົມ