ປະທານສະພາ ຕ້ອນຮັບສະມາຊິກລັດຖະສະພາ ປະເທດອົດສະຕຣາລີ.

ຈາກແຫລ່ງຂ່າວ ຂປລ. ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຄໍານັບຂອງ ທ່ານ ແອນດຣີວ ສຸດກ໋ອດ (Andrew Southcott ) ສະມາຊິກ ລັດຖະສະພາແຫ່ງ ປະເທດອົດສະຕຣາລີ ພ້ອມຄະນະ ໃນວັນທີ 6 ຕຸລາ 2015 ນີ້ ຢູ່ຫ້ອງຮັບແຂກສະພາແຫ່ງຊາດ ໃນໂອກາດທີ່ເດີນທາງ ມາຢ້ຽມຢາມ ແລະ ເຮັດວຽກຢູ່ ສປປ ລາວ ແຕ່ວັນທີ 3-7 ເດືອນຕຸລານີ້.

ໃນໂອກາດນີ້ ທ່ານນາງ ປານີ ຢາທໍ່ຕູ້, ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງຕໍ່ທ່ານ ແອນດຣີວ ສຸດກ໋ອດ ພ້ອມຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້. ເຊິ່ງເປັນການປະກອບສ່ວນສໍາຄັນ ເຂົ້າໃນການເສີມຂະຫຍາຍສາຍພົວພັນ ມິດຕະພາບ ແລະ ການຮ່ວມມືທີ່ດີ ລະຫວ່າງ ສອງປະເທດລາວ ແລະ ອົດສະຕຣາລີ, ໂດຍສະເພາະ ສະພາແຫ່ງຊາດລາວ ແລະ ລັດຖະສະພາອົດສະຕຣາລີ ໃຫ້ໄດ້ຮັບການພັດທະນາດີຂຶ້ນກວ່າເກົ່າ.

ທ່ານ ແອນດຣີວ ສຸດກ໋ອດ ໄດ້ສະແດງຄວາມ ຂອບໃຈ ຕໍ່ທ່ານປະທານສະພາແຫ່ງຊາດລາວ ທີ່ໄດ້ສະຫລະເວລາ ໃຫ້ການຕ້ອນຮັບຢ່າງອົບອຸ່ນ, ພ້ອມທັງໄດ້ແຈ້ງເຖິງ ຈຸດປະສົງຂອງການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ໃຫ້ທ່ານປະທານສະພາແຫ່ງຊາດ ຊາບຕື່ມອີກ.