ປະທານສະພາແຫ່ງຊາດ ພົບປະພໍ່ແມ່ປະຊາຊົນ ເມືອງບໍລິຄັນ

ວັນທີ  22 ກັນຍາ 2017 ຜ່ານ​ມາ​ນີ້ ທີ່ບ້ານ ນາກູນ ເມືອງບໍລິຄັນ, ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ພ້ອມດ້ວຍຄະນະ ລົງເຄື່ອນໄຫວຢ້ຽມຢາມ ແລະ ພົບປະພໍ່ແມ່ປະຊາຊົນ ບ້ານ ນາກຸນ ເມືອງ ບໍລິຄັນ ໂດຍ​ໃຫ້ການ​ຕ້ອນຮັບ ຂອງ ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ, ທ່ານ ເລື່ອນວິໄລ ຈັນທະລາພັນ ເຈົ້າເມືອງບໍລິຄັນ ພ້ອມດ້ວຍຄະນະນໍາ ຂັ້ນແຂວງ,ຂັ້ນເມືອງ, ພະນັກງານອາວຸໂສບໍານານ ຕະຫລອດຮອດອໍານາດ ການປົກຄອງບ້ານເຂົ້າຮ່ວມຢ່າງພ້ອມພຽງ.

ລະຫວ່າງຢ້ຽມຢາມໃນຄັ້ງນີ້ ທ່ານປະທານສະພາແຫ່ງຊາດ ໄດ້ຮັບພັງການລາຍງານ ການຈັດຕັ້ງປະຕິບັດ ວຽກງານຮອບດ້ານ ຂອງເມືອງ ເຊິ່ງຕິດພັນກັບການເຮັດທົດລອງ 3 ສ້າງ ແລະ ການຈັດສັນພູມລໍາເນົາ ຕາມແຜນການຂອງ ລັດຖະບານຈາກ ທ່ານ ເລື່ອນວິໄລ ຈັນທະລາພັນ ​ໂດຍ​ມີ​ເນື້ອ​ໃນ​ດັ່ງກ່າວ​ນີ້ ເມືອງບໍລິຄັນ ເປັນເມືອງເຄິ່ງທົ່ງພຽງເຄິ່ງພູດອຍ ແລະ ພູພຽງ ມີເນື້ອທີ່ ປົກຄອງທັງໜົດ 3.062.28 ກິໂລຕາແມັດ, ມີ 6 ກຸ່ມບ້ານພັດທະນາ, ມີ 43 ບ້ານ, ມີພົນລະເມືອງ 44.975 ຄົນ, ຍິງ22.241 ຄົນ, ມີ 7.658 ຄອບຄົວ ແລະ ມີ 9 ຊົນເຜົ່າຢູ່ຮ່ວມກັນ ເປັນເມືອງທີ່ກໍາລັງເຮັດທົດລອງ 3 ສ້າງ ໂດຍຜ່ານທິດຊີ້ນໍາ-ນໍາພາ ຂອງຄະນະພັກເມືອງ, ອໍານາດການປົກຄອງແຕ່ລະຂັ້ນ ໄດ້ເຮັດໃຫ້ເມືອງ ມີຄວາມສະຫງົບ ທາງດ້ານການເມືອງ, ພື້ນຖານໂຄງລ່າງ ໄດ້ຮັບການປັບປຸງ ສັງຄົມມີຄວາມ ເປັນລະບຽບຮຽບຮ້ອຍ, ປະກົດການຫຍໍ້ທໍ້ໃນສັງຄົມ ໄດ້ຮັບການແກ້ໄຂ, ປະຊາຊົນບັນດາເຜົ່າ ມີຄວາມສາ ມັກຄີເປັນປຶກແຜ່ນ.  

ໂອກາດດັ່ງກ່າວ, ທ່ານ ນາງ ປານີ ຢາທໍ່ຕູ້ ໄດ້ສະ​ແດງ​ຄວາມ​ຍ້ອງຍໍ​ຊົມ​ເຊີຍ ​ແລະ ເນັ້ນ​ໃຫ້ບັນດາການນໍາ ຂັ້ນແຂວງ, ຂັ້ນເມືອງ ແລະອໍານາດການປົກຄອງ ແຕ່ລະຂັ້ນເອົາໃຈໃສ່ໃນການ ຈັດຕັ້ງປະຕິບັດໄລຍະ ຜ່ານມາ ຂອງແຕ່ລະຂັ້ນເອົາໃຈໃສ່ ໃນການສ້າງສາພັດທະນາບ້ານ, ເມືອງໃຫ້ມີຄວາມເຂັ້ມແຂງຮອບດ້ານ ເຮັດໃຫ້ປະຊາຊົນ ມີຄວາມສາມັກຄີພ້ອມກັນປົກ ປັກຮັກສາປະເທດຊາດ ບ້ານເມືອງເອົາໃຈໃສ່ ວຽກງານສຶກສາ, ສາທາເດັກໃນເກນອາຍຸ ໄດ້ຮັບການສັກຢາ-ຢອດຢາ, ສົ່ງເສີມການຜະລິດ​ ໃຫ້​ກາຍເປັນສີນຄ້າ ແລະ ແກ້ໄຂຄວາມທຸກຍາກ ຂອງພໍ່ແມ່ປະຊາຊົນ ຕາມແນວທາງນະໂຍບາຍຂອງ ພັກ-ລັດ ວາງໄວ້ ໃຫ້ປະກົດຜົນເປັນຈິງ. 

ຂ່າວ: ສອນໄລ

ຂໍ້ມູນຈາກ: ສຳນັກຂ່າວສານປະເທດລາວ