ປະທານສະພາແຫ່ງຊາດ ຕ້ອນຮັບທູດກູເວດ ອຳລາ

 ທ່ານນາງ ປານີ ຢ່າ​ທໍ່​ຕູ້ ປະທານສະພາ​ແຫ່ງ​ຊາດ ​ແຫ່ງ ສປປ ລາວ​ ​ໄດ້​ໃຫ້ກຽດຕ້ອນ​ຮັບການ​ເຂົ້າ​ຢ້ຽມອໍາ​ລາ​​ຂອງ​ທານ​ Nabeel Al Dakheel ເອກ​ອັກຄະ​ລັດ​ຖະ​ທູດ ວິສາມັນ ​ຜູ້​ມີ​ອຳນາດ​ເຕັມ ​ແຫ່ງປະ​ເທດ ກູ​ເວດ ປະຈຳ​ລາວ​ ​ໃນ​ວັນ​ທີ 21 ກັນຍາ 2015 ນີ້ ຢູ່​ສະພາ​ແຫ່ງ​ຊາດ ​ໃນ​ໂອກາດ​​ທີ່​ທ່ານ​ ໄດ້ສຳ​ເລັດການ​ປະຕິບັດໜ້າທີ່ການ​ທູດ ຢູ່ ສປປ ລາວ ​.

ທ່ານ​ປະທານ​ສະພາ​ແຫ່ງ​ຊາດ ​ໄດ້​ສະ​ແດງຄວາມ​ຍິນ​ດີ​ຕ້ອນຮັບ ​ແລະ ຊົມ​ເຊີຍ ​ຕໍ່​ຜົນສຳ​ເລັດ ​ຂອງ​ການ​ປະຕິບັດ​ໜ້າ​ທີ່​ການ​ທູດ ຢູ່ ສປປ ລາວ ​ຂອງທ່ານ ​ Nabeel Al Dakheel  ​ເຊິ່ງ​ເປັນ​ການ​ປະກອບສ່ວນ​ສຳຄັນ​ ເຂົ້າ​ໃນ​ການ​ເສີມ​ຂະຫຍາຍ​ສາຍ​ພົວພັນ​ມິດຕະພາບ ​ແລະ ການ​ຮ່ວມ​ມື ລະຫວ່າງ ສ​ອງປະ​ເທດ ລາວ ​ແລະ ກູ​ເວດ ​ໃຫ້​ມີ​ບາດກ້າວ​ ຂະຫຍາຍຕົວຂຶ້ນ​ໄປ​ເລື້ອຍໆ. ພ້ອມ​ນີ້, ທ່ານ ​ຍັງ​ໄດ້​ອວຍພອນ​ ໃຫ້​ທ່ານ​ເອກ​ອັກຄະ​ລັດຖະທູດ ກູ​ເວດ ຈົ່ງ​ກັບ​ຄືນ​ປະ​ເທດດ້ວຍ​ຄວາມ​ສະຫວັດດີ​ພາບ ​ແລະ ປະສົບ​ຜົນ​ສຳ​ເລັດ​ ໃນ​ພາລະກິດ​ໃໝ່​ຂອງ​ຕົນ.

ໂອກາດ​ດຽວ​ກັນ ທ່ານ​ Nabeel Al Dakheel  ກໍ​ໄດ້​ສະ​ແດງ​ຄວາມ​​ຂອບ​ໃຈ​ຕໍ່ທ່ານ ປະທານ​ສະພາ​ແຫ່ງ​ຊາດ ທີ່​ໄດ້​ສະຫລະ​ເວລາ​ອັນ​ມີ​ຄຸນຄ່າ​ ໃຫ້ການ​ຕ້ອນຮັບຢ່າງ​ອົບ​ອຸ່ນ​, ພ້ອມ​ທັງ​ ຖື​ໂອກາດ​ນີ້ ສະ​ແດງຄວາມ​ຂອບ​ໃຈຢ່າງ​ຈິງ​ໃຈ ​ມາ​ຍັງ​ບັນດາ​ການ​ນຳ​ພັກ-ລັດຂອງ​ລາວ ຕະຫລອດ​ຮອດ ​ປະຊາຊົນ​ລາວ ​ບັນດາ​ເຜົ່າ​ ທີ່​ໄດ້​ໃຫ້ການ​ຮ່ວມ​ມື​ເປັນ​ຢ່າງ​ດີ ​ແລະ ອຳນວຍຄວາມ​ສະດວກ​ທຸກ​ຢ່າງ​ ໃນ​ຕະຫລອດໄລຍະ​ການປະຕິບັດ​ໜ້າ​ທີ່​ຂອງ​ຕົນຈົນ​ໄດ້​ຮັບ​ຜົນສຳ​ເລັດ​ຢ່າງ​ໜ້າ​ເພິງພໍ​ໃຈ

ທີ່ມາ http://kpl.gov.la/