ປະທານສະພາແຫ່ງຊາດ ກຳປູເຈຍ ຢ້ຽມຢາມລາວ

ໃນວັນທີ 21 ມິຖຸນາ 2017 ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດລາວ ພ້ອມດ້ວຍຄະນະ ໄດ້ຈັດພິທີຕ້ອນຮັບການມາຢ້ຽມຢາມ ສປປ ລາວ ຂອງ  ສົມເດັດ ອັກຄະມະຫາ ໂປເຢຍ ຈັກກຣີ ເຮັງຊຳຣິນ ປະທານສະພາແຫ່ງຊາດ ແຫ່ງ ຣາຊະອານາຈັກກຳປູເຈຍ ພ້ອມດ້ວຍຄະນະຜູ້ແທນຂັ້ນສູງ ໄດ້ເດີນທາງມາຢ້ຽມຢາມ ສປປ ລາວ ທີ່ຫໍປະຊຸມແຫ່ງຊາດ.

ລະຫວ່າງການພົບປະ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດລາວ ໄດ້ກ່າວຂໍສະແດງຄວາມຍິນດີຕ້ອນຮັບ ທ່ານ ສົມເດັດ ເຮັງຊຳຣິນ ພ້ອມດ້ວຍຄະນະ ທີ່ໄດ້ມາຢ້ຽມຢາມສັນຖະໄມຕີຢ່າງເປັນທາງການຄັ້ງນີ້ ເຊິ່ງຈະປະກອບສ່ວນສຳຄັນໃນການສືບຕໍ່ຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອລະຫວ່າງສອງປະເທດລາວ – ກຳປູເຈຍ ເວົ້າລວມ ເວົ້າສະເພາະແມ່ນ ສອງສະພາແຫ່ງຊາດ ໃຫ້ນັບມື້ໄດ້ຮັບການເສີມຂະຫຍາຍຍິ່ງຂຶ້ນ, ພ້ອມນີ້ ກໍ່ຂໍສະແດງຄວາມຊົມເຊີຍຕໍ່ຜົນສຳເລັດການເລືອກຕັ້ງສະພາຕາແສງແຫ່ງ ຣາຊະອານາຈັກກຳປູເຈຍ ທີ່ຫາກໍ່ສຳເລັດໃນວັນທີ 4 ມິຖຸນາ ຜ່ານມາ.

ຂະນະດຽວກັນ ສົມເດັດ ອັກຄະມະຫາ ໂປເຢຍ ຈັກກຣີ ເຮັງຊຳຣິນ ປະທານສະພາແຫ່ງຊາດ ແຫ່ງ ຣາຊະອານາຈັກກຳປູເຈຍ ໄດ້ກ່າວບາງຕອນວ່າ: ຂ້າພະເຈົ້າມີຄວາມດີໃຈທີ່ໄດ້ນຳພາຄະນະຜູ້ແທນແຫ່ງ ຣາຊະອານາຈັກກຳປູເຈຍ ມາຢ້ຽມຢາມ ສປປ ລາວ ຢ່າງເປັນທາງການ ຕາມການເຊື້ອເຊີນຂອງທ່ານປະທານສະພາແຫ່ງຊາດລາວ ແລະ ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງຄະນະຜູ້ແທນລາວ, ຂ້າພະເຈົ້າມາຢ້ຽມຢາມ ສປປ ລາວ ແຕ່ລະຄັ້ງກໍ່ເຫັນວ່າມີການພັດທະນາ. ດັ່ງນັ້ນ, ຂໍຍ້ອງຍໍຊົມເຊີຍ ທີ່ ສປປ ລາວ ມີການພັດທະນາທີ່ວ່ອງໄວມີໂສມໜ້າໃໝ່ທີ່ສົດໃສ ໂດຍສະເພາະແມ່ນຢູ່ນະຄອນຫຼວງວຽງຈັນ. ຂ້າພະເຈົ້າເຊື່ອໝັ້ນວ່າການພົວພັນຮ່ວມມື ແລະ ມິດຕະພາບ ລະຫວ່າງ ສອງປະເທດ ລາວ-ກຳປູເຈຍ ໂດຍສະເພາະສອງສະພາແຫ່ງຊາດ ລາວ – ກຳປູເຈຍ ນັບມື້ຈະໄດ້ຮັບການເສີມຂະຫຍາຍຍິ່ງຂຶ້ນ.

ຂໍ້ມູນຈາກ: ຂ່າວເສດຖະກິດ-ການຄ້າ Lao Economic Daily