ປະທານປະເທດ ຢ້ຽມຢາມພື້ນຖານເສດຖະກິດຢູ່ເມືອງ ປາກງື່ມ

ໃນວັນທີ 11 ມັງກອນ 2017 ນີ້, ທ່ານ ບຸນຍັງ ວໍລະຈິດ ປະທານປະເທດ ພ້ອມດ້ວຍຄະນະເຄື່ອນໄຫວຢ້ຽມຢາມ ເຂດພັດທະນາກະສິກໍາຢູ່ເມືອງ ປາກງື່ມ ນະຄອນຫລວງວຽງຈັນ ໂດຍໃຫ້ກຽດຮັບການຕ້ອນຮັບ ຈາກຄະນະນໍາ, ເຈົ້າເມືອງປາກງື່ມ ແລະ ປະຊາຊົນ.
ທ່ານ ປະທານປະເທດໄດ້ຢ້ຽມຢາມ ກຸ່ມຜະລິດພືດອິນຊີບ້ານທ່າຊ້າງ ເຊິ່ງເປັນກຸ່ມຜະລິດຕົວແບບ ໄດ້ເລີ່ມຈັດຕັ້ງປະຕິບັດແຕ່ປີ 2010 ເປັນຕົ້ນມາ ປັດຈຸບັນມີສະມາຊິກ 77 ຄອບຄົວ ມີເນື້ອທີ່ຜະລິດ 60 ເຮັກຕາ ສາມາດສະໜອງພືດຜັກອິນຊີປະເພດຕ່າງໆ ສະໜອງໃຫ້ນະຄອນຫລວງວຽງຈັນ 3-4 ໂຕນຕໍ່ອາທິດ ແລະ ສາມາດສ້າງລາຍຮັບໄດ້ 30-40 ລ້ານກີບ ເຊິ່ງເຮັດໃຫ້ລາຍຮັບ ຂອງສະມາຊິກເພີ່ມຂຶ້ນ ແລະ ນໍາພາຄອບຄົວຫລຸດພົ້ນອອກຈາກຄວາມທຸກຍາກ ໄດ້ໂດຍພື້ນຖານ ຈາກນັ້ນກໍໄດ້ໄປຢ້ຽມ ຢາມຟາມພູຕາເວັນ ເຊິ່ງເປັນຟາມຕົວແບບ ໄດ້ເລີ່ມຈັດຕັ້ງປະຕິບັດມາແຕ່ປີ 2012 ໂດຍການຜະລິດກະສິກໍາ ທີ່ມີຄວາມປອດໄພ ແລະ ດີຕໍ່ສຸຂະພາບ ພາຍໃນຟາມນອກຈາກ ຈະປູກພືດຜັກນາໆຊະນິດແລ້ວ ຍັງມີຟາມງົວ ແລະ ສັດອື່ນໆ ທີ່ສາມາດຕອບສະໜອງຄວາມຕ້ອງການ ຂອງຕະຫລາດໄດ້ເປັນຢ່າງດີ ແລະ ຍັງໃຫ້ການເຝິກອົບຮົມ ດ້ານກະສິກໍາການກະເສດ ສົ່ງເສີມທຸລະກິດ ຂະໜາດນ້ອຍ-ຂະໜາດກາງ ແລະ ພັດທະນາການທ່ອງທ່ຽວສີຂຽວ ແລະ ຢ້ຽມຢາມຟາມລ້ຽງງົວ ຂອງບໍລິສັດເອັກສພີການຄ້າລາວ-ຈີນຈໍາກັດ ມີເນື້ອທີ່ 100 ເຮັກຕາ ໄດ້ເລີ່ມບຸກເບີກແຕ່ປີ 2012 ເປັນຕົ້ນມາ ເຊິ່ງເປັນຟາມໜຶ່ງທີ່ເປັນຕົວແບບ ມີການນໍາໃຊ້ເຕັກໂນໂລຊີ ເຂົ້າໃນການຜະລິດ ນໍາໃຊ້ລະບົບຝົນຝອຍເພື່ອປູກຫຍ້າ ສາລີ ເປັນອາຫານໃຫ້ງົວ ໂດຍຟາມດັ່ງກ່າວມີແຜນ ລ້ຽງງົວ 1.500 ແມ່ ນອກນີ້ຍັງມີແຜນລ້ຽງໝູ່ ໂດຍການນໍາໃຊ້ເຕັກນິກທີ່ທັນສະໄໝ ຕິດພັນກັບການປຸງແຕ່ງ ເພື່ອຈໍາໜ່າຍພາຍໃນ ແລະ ສົ່ງອອກຕ່າງປະເທດ.
ໂອກາດດັ່ງນີ້, ທ່ານ ປະທານປະເທດ ກໍໄດ້ສະແດງຄວາມຊົມເຊີຍຕໍ່ການບຸກບືນ ສູ້ຊົນຂອງຜູ້ປະກອບການ ຈົນເຮັດໃຫ້ກິດຈະການມີການເຕີບໃຫຍ່ ຂະຫຍາຍຕົວ ແລະ ໄດ້ປະກອບສ່ວນ ດ້ານສະບຽງອາຫານ ໃຫ້ ນະຄອນຫລວງວຽງຈັນ, ບັນດາແຂວງ ກໍ່ຄືຕ່າງປະເທດປະກອບສ່ວນ ໃນການພັດທະນາເສດຖະກິດ-ສັງຄົມໄດ້ເປັນຢ່າງດີ ພ້ອມນີ້ທ່ານຍັງໄດ້ຮຽກຮ້ອງ ໃຫ້ກຸ່ມຜະລິດພືດຜັກອິນຊີ ກໍ່ຄື ເຈົ້າຂອງຟາມສືບຕໍ່ຂະຫຍາຍເນື້ອທີ່ການຜະລິດ ແລະ ຜົນຜະລິດໃຫ້ຫລາຍຂຶ້ນ ຮັບປະກັນໃຫ້ໄດ້ທັງຄຸນະພາບ ແລະ ປະລິມານ ເພື່ອຕອບສະໜອງຄວາມຕ້ອງການ ຂອງຕະຫລາດທີ່ນັບມື້ຫລາຍຂຶ້ນ ແລະ ຮອງຮັບການແຂ່ງຂັນ ໃນອະນາຄົດ ເພີ່ມທະວີການປຸງແຕ່ງ ກໍ່ໃຫ້ມີຫລາຍຮູບຫລາຍສີ ຕາມທິດສີຂຽວ ແລະ ຍືນຍົງ; ເນັ້ນໃຫ້ ນະຄອນຫລວງວຽງຈັນ, ເມືອງ ແລະ ພາກສ່ວນກ່ຽວຂ້ອງ ສືບຕໍ່ໃຫ້ການຊຸກຍູ້ສົ່ງເສີມ ບົນພື້ນຖານຂອງລະບຽບ ແລະ ຂໍ້ກໍານົດຕ່າງໆ ຂອງພັກ ແລະ ລັດຖະບານ ເພື່ອຊ່ວຍໃຫ້ເຂົາເຈົ້າສາມາດ ເຕີບໃຫຍ່ຂະຫຍາຍຕົວ ແລະ ເປັນຕົວແບບທີ່ດີໃນຕໍ່ໜ້າ.

ຂໍ້ມູນຈາກ: ປະເທດລາວ Pathedlao