ປະທານປະເທດເນັ້ນໃຫ້ແຂວງຄໍາມ່ວນ ເອົາໃຈ ໃສ່ປັບປຸງຄຸນນະພາບຊີວິດຂອງປະຊາຊົນ

ວັນທີ 25 ກັນຍາ 2017, ທ່ານ ບຸນຍັງ ວໍລະຈິດ ປະທານ​ປະ​ເທດ ​ແຫ່ງ ສປປ ລາວ ພ້ອມດ້ວຍຄະນະ ໄດ້ເດີນທາງ​ໄປຢ້ຽມຢາມແຂວງຄຳມ່ວນ ໂດຍ​ໃຫ້ກຽດຕ້ອນຮັບຂອງ ທ່ານ ໂອໄດ ສຸດາພອນ ແຂວງເຈົ້າແຂວງໆ ຄຳມ່ວນ, ມີບັນດາຄະນະນຳຂັ້ນແຂວງ, ຄະນະນຳຈາກພະແນກການຕ່າງໆ ອ້ອມຂ້າງແຂວງເຂົ້າຮ່ວມ. ລະຫວ່າງ​ການ​ຢ້ຽມຢາມ​​​ໃນ​ຄັ້ງ​ນີ້, ທ່ານ ປະທານປະເທດ​ໄດ້​ເດີນທາງ​ໄປ​ຢ້ຽມຢາມ​ໂຮງສີ​ເຂົ້າສາຍບົວ ບ້ານໜອງຫ້າງ ​ເມືອງ​ທ່າ​ແຂກ ​ແຂວງ​ຄຳ​ມ່ວນ.

ທ່ານ ໂອໄດ ສຸດາພອນ ແຂວງເຈົ້າແຂວງໆຄຳມ່ວນ ກໍ​ໄດ້ລາຍງານກ່ຽວກັບການພັດທະນາເສດຖະ ກິດ-ສັງຄົມ ຂອງແຂວງ ໄລຍະ 9 ເດືອນຂອງແຜນການປີ 2017 ຕໍ່​ທ່ານປະທານ​ປະ​ເທດ​ຮັບ​ຊາບ​ວ່າ: ​ດ້ານ​ເສດຖະກິດ​ມະຫາ​ພາກ​ຂອງ​ແຂວງ​ ແມ່ນ​ມີ​ການ​ຂະຫຍາຍຕົວ​ຕໍ່​ເນື່ອງ ​ແລະ ໝັ້ນທ່ຽງ ​ໃນ​ລະດັບ 7,95% ຕໍ່ປີ ​ໃນ​ນັ້ນ​ຂົງ​ເຂດ​ກະສິກຳ​ກວມ​ເອົາ 25%, ຂົງ​ເຂດ​ອຸດສາຫະກຳ​ກວມ 41% ​ແລະ ຂົງ​ເຂດ​ການ​ບໍລິການ​ກວມ​ເອົາ 34% ຂອງ GDP ລວມຍອດ​ຜະລິດ​ຕະພັນ​ພາຍ​ໃນສະ​ເລ່ຍຕໍ່ຫົວ​ຄົນ​ເພີ່ມ​ຈາກ 887 ​ໂດ​ລາ​ສະ ຫະລັດ​ໃນ​ປີ 2015 ມາ​ເປັນ 1.922 ​ໂດ​ລາ​ສະຫະລັດ​ຕໍ່ຄົນ​ຕໍ່ປີ ​ໃນ​ປີ 2017, ການ​ລົງທຶນ​ຂອງ​ລັດ​ໃນ​ປີ 2017 ມີ 357 ​ໂຄງການ, ມູນ​ຄ່າ 123,76 ຕື້​ກີບ, ປັດຈຸ​ບັນ​ ຈັດ​ຕັ້ງ​ປະຕິບັດ​ໄດ້ 244 ​ໂຄງການ, ມູນ​ຄ່າ 94,34 ຕື້​ກີບ, ວຽກງານອຸດ​ສາ​ຫະກຳ ​ແລະ ​ການ​ຄ້າ ມີ​​ໂຮງງານ​ອຸດ​ສາ​ຫະກຳທັງໝົດ 201 ​ແຫ່ງ, ​ໃນ​ນັ້ນ​ມີ​ໂຮງງານ​ຂະໜາດ​ໃຫຍ່ 77 ​ແຫ່ງ, ດ້ານ​ການ​ສົ່ງ​ອອກ​ສິນຄ້າ​ມີ​ມູນ​ຄ່າ  142, 25 ລ້ານ​ໂດ​ລາ​ສະຫະລັດ ການ​ສົ່ງ​ອອກ​ສ່ວນ​ໃຫຍ່​ແມ່ນ​ແຮ່​ທາດ​ກວມ 90%, ນອກ​ນັ້ນ ​ແມ່ນ​ເຂົ້າສານ ​ແລະ ຜະລິດ​ຕະພັນ​ອື່ນໆຈຳ ນວນໜຶ່ງ, ສຳລັບ​ການ​ນໍາ​ເຂົ້າ​ສິນຄ້າມີ​ມູນ​ຄ່າ 114,25 ລ້ານ​ໂດ​ລາ​ສະຫະລັດ ທຽບ​ໃສ່​ປີຜ່ານມາຫລຸດລົງ 55,48%, ການ​ນຳ​ເຂົ້າ​ສ່ວນ​ໃຫຍ່​ແມ່ນ​ວັດ​ສະ​ດຸກໍ່ສ້າງ, ນ້ຳມັນ​ເຊື້ອ​ໄຟ, ​ເຄື່ອງ​ອຸປະ​ໂພ​ກ-ບໍລິ​ໂພ​ກຕ່າງໆ, ວຽກງານ​ດ້ານ​ການ​ເງິນສົກ​ງົບປະມານ 2017 ລັດຖະບານ​ມອບ​ຕົວ​ເລກ​ສູ້​ຊົນ​ໃນ​ການ​ເກັບ​ລາຍ​ຮັບ​ເຂົ້າ​ງົບປະມານ​ໃຫ້​ແຂວງ​ຄຳ​ມ່ວນ​ເກືອບ 600 ຕື້​ກີບ. ​ໃນ​ນີ້​, ພູດ​ສູນ​ກາງ 282 ກວ່າຕື້​ກີບ, ພູດ​ຂອງ​ແຂວງ 277 ກວ່າຕື້​ກີບ, ຜ່ານ​ການຈັດ​ຕັ້ງ​ປະຕິບັດ​ຮອດ​ປັດຈຸ​ບັນ ພູດ​ຂອງ​ສູນ​ກາງ​ປະຕິບັດ​ໄດ້ 260 ກວ່າຕື້​ກີບ ​ເທົ່າ​ກັບ 92,05% ຂອງ​ແຜນການ​ປີ, ພູດ​ຂອງ​ແຂວງ 167 ກວ່າຕື້​ກີບ ​ເທົ່າ​ກັບ 60,29%, ລວມສູນ​ກາງ ​ແລະ ທ້ອງ​ຖິ່ນ​ປະຕິບັດ​ໄດ້ 427 ກວ່າຕື້​ກີບ ຫລື ​ເທົ່າ​ກັບ 76,32%.

ສຳລັບ​ສະພາບ​ຜົນ​ກະທົບ ​ແລະ ຜົນ​ເສຍ​ຫາຍ​ຈາກ​ພາຍຸ​ດອກ​ສຸຣິພັດ​ຜ່ານ​ ໃນ​ລະຫວ່າງ​ວັນ​ທີ 15-17 ກັນຍາຜ່ານ​ມາ ​ແຂວງ​ຄຳ​ມ່ວນ​ ມີ​ບ້ານ​ທີ່​ຖືກ​ນ້ຳ​ຖ້ວມ​ທັງໝົດ 155 ບ້ານ, ຄອບຄົວ​ໄດ້​ຮັບ​ຜົນ​ກະທົບ 2.589 ຄອບຄົວ, ປະຊາຊົນ​ໄດ້​ຮັບ​ຜົນ​ກະທົບ 14.303 ຄົນ, ​ເນື້ອ​ທີ່​ຖືກ​ນ້ຳຖ້ວມ 3.998 ​ເຮັກຕາ, ​ເສຍ​ຫາຍ 3.309,71 ​ເຮັກຕາ, ​ເນື້ອ​ທີ່​ສວນ​ເສຍ​ຫາຍ 1.764 ​ເຮັກຕາ, ນອກ​ນັ້ນ ​ຍັງ​ມີ​ງົວ, ຄວາຍ, ​ແບ້, ສັດ​ປີກ ​ແລະ ​ເຮືອນ​ຊານລວມ​ເຖິງ​ຖະໜົນຫົນທາງ​ເປ່​ເພ​ເສຍ​ຫາຍ ​ອີກ​ຈຳນວນໜຶ່ງ, ສ່ວນ​ມູນ​ຄ່າ​ການ​ເສຍ​ຫາຍ​ທາງ​ຄະນະ​ຮັບຜິດຊອບ​ກຳລັງ​ດຳ​ເນີນ​ການ​ຢູ່.

​​ໃນໂອກາດ​ດັ່ງກ່າວ​, ​ທ່ານປະທານ​ປະ​ເທດ​ ກໍໄດ້​​ສະ​ແດງ​ຄວາມຍ້ອງຍໍ​ຊົມ​ຊົມຕໍ່​ໝາກຜົນ​ຄວາມ​ສໍາ​ເລັດ​ທີ່​ທາງ​ແຂວງ​ຍາດ​ມາ​ໄດ້ພົ້ນ​ເດັ່ນ ​ແລະ ສືບ​ຕໍ່​ໂອ​ລົມພະນັກງານຫລັກ​ແຫລ່ງ​ແຂວງ​ຄຳ​ມ່ວນ, ​ເຊິ່ງທ່ານ​ໄດ້​ຮຽກຮ້ອງ​ໃຫ້​ຄະນະ​ນຳ​ຂອງ​ແຂວງ​ ຈົ່ງ​ໄດ້​ເອົາ​ໃຈ​ໃສ່​ວຽກງານ​ການ​ເມືອງ​ແນວ​ຄິດ, ວຽກງານ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ​ຂອງ​ແຂວງ ​ພ້ອມ​ເນັ້ນ​ໃຫ້ເອົາ​ໃຈ​ໃສ່​ການ​ພັດທະນາ​ເສດຖະກິດ-ສັງຄົມ​ຕິດ​ພັນ​ກັບ​ການ​ປັບປຸງ​ຄຸນ​ນະພາ​ບຊີວິດ​ການ​ເປັນ​ຢູ່​ຂອງ​ປະຊາຊົນຢ່າງ​ໜັກ​ແໜ້ນ.

ຂ່າວ: ​ແຂວງ​ຄຳ​ມ່ວນ