ປະທານນັກບຸນຢືນຢັນບໍ່ຂາຍ ຟານ ໄດ໊ ແນ່ນອນ

 

ປະທານສະໂມສອນຂອງນັກບຸນເອີ່່ຍປາກບໍ່ປ່ອຍ ຟານ ໄດ໊ ໃນຊຳເມີນີ້ແນ່ນອນ.

ຣາຟ ຄຣູເກີ ປະທານສະໂມສອນ ເຊົາແຮມຕັນ ສະໂມສອນດັງຂອງເວທີ ພຣີເມຍລີກ ຢືນຢັນວ່າ ພວກເຂົາຈະບໍ່ຂາຍ ເຟີກິວ ຟານ ໄດ໊ ເຊັນເຕີແບັກຂອງທີມໃນຊ່ວງຊຳເມີນີ້ຢ່າງແນ່ນອນເຖິງວ່ານັກເຕະຍື່ນເລື່ອງຂໍຂຶ້ນບັນຊີຍ້າຍທີມໄປເປັນທີ່ຮຽບຮ້ອຍແລ້ວກໍຕາມ.

ຫຼັງຈາກຕົກເປັນຂ່າວລືເລື່ອງການຍ້າຍທີມມາດົນ ຟານ ໄດ໊ ກໍອອກຕຳໜິສະໂມສອນຢ່າງໜັກເມື່ອອາທິດຜ່ານມາ ໂທດຖານທີ່ບໍ່ຍອມປ່ອຍໃຫ້ເຂົາໄດ້ຍ້າຍທີມໂດຍກ່ອນໜ້ານີ້ ລິເວີພູ ຄືເຕັງໜຶ່ງທີ່ຈະໄດ້ນັກເຕະໄປຮ່ວມທັບແຕ່ສຸດທ້າຍ “ຫົງແດງ” ກໍຕ້ອງຖອນຕົວອອກໄປຫຼັງຈາກທີ່ແອບຕິດຕໍ່ກັບດາວເຕະຊາວດັດທີ່ບໍ່ຜ່ານທາງ “ນັກບຸນ” ພ້ອມກັບອອກມາຂໍໂທດກັບເລື່ອງທີ່ເກີດຂຶ້ນພ້ອມ.

ຈົນຫຼ້າສຸດ ຄຣູເກີ ກໍປະກາດຊັດເຈນວ່າບໍ່ວ່າຈັ່ງໃດພວກເຂົາກໍຈະບໍ່ປ່ອຍ ຟານ ໄດ໊ ອອກຈາກທີມໃນຕະຫຼາດຮອບນີ້ແນ່ນອນ ເຊິ່ງເຂົາໃຫ້ສາເຫດວ່າທີ່ເຮັດແບບນີ້ເປັນຍ້ອນວ່າຢາກໃຫ້ທີມມີຄວາມໝັ້ນຄົງ ແລະ ໃຫ້ນັກເຕະໃນທີມຫຼິ້ນເຂົ້າຂາກັນ ຫຼັງຈາກຫຼາຍລະດູການທີ່ຜ່ານມາທີມທັງຊື້ ແລະ ຂາຍນັກເຕະຫຼາຍຄົນຈົນເຮັດໃຫ້ທີມຕ້ອງໃຊ້ເວລາປັບຕົວເຂົ້າຫາກັນດົນພໍສົມຄວນ.

“ເຮົາຈະບໍ່ຂາຍ ເຟີກິວ ໃນຕະຫຼາດຮອບນີ້ ເຮົາບໍ່ໄດ້ເຮັດແບບນັ້ນເພາະບັນຫາສ່ວນຕົວກັນ ມັນບໍ່ໄດ້ກ່ຽວກັບເຂົາ ມັນກ່ຽວກັບສະພາບລວມທີ່ໃຫຍ່ກວ່າ ຄືການປ່ຽນແປງຂອງ ເຊົາແຮມຕັນ ໃນຊຳເມີທຳອິດຂອງຂ້ອຍກັບທີມ ເຮົາຕ້ອງຂາຍນັກເຕະໄປ 5 ຄົນ ແລະ ຊື້ເຂົ້າມາ 6 ຄົນເຊິ່ງນີ້ບໍ່ໄດ້ນັບພວກນັກເຕະຈາກອະຄາເດມີ”.

“ມາເຖິງຊຳເມີທີ່ສອງກັບທີມເຮົາຂາຍໄປ 3 ແລະ ຊື້ເຂົ້າມາອີກ 7 ສ່ວນຊຳເມີທີສາມເຮົາກໍປ່ອຍໄປ 5 ແລະ ຊື້ມາ 5 ຄົນແຕ່ຕອນນີ້ເຮົາປ່ອຍອອກໄປແລ້ວພຽງຄົນດຽວ ແລະ ຊື້ເຂົ້າມາ 2 ຄົນເຊິ່ງມັນຄືສິ່ງທີ່ເຮົາຕ້ອງການ ເຮົາຢາກເຕີບໃຫຍ່ຂຶ້ນ ເຮົາຢາກເປັນທີມທີ່ຈະໄດ້ປະໂຫຍດຈາກການເຮັດວຽກຮ່ວມກັນທີ່ເຮັດໃຫ້ເກີດວິທີການຫຼິ້ນອັນໜ້າຕື່ນຕາຕື່ນໃຈ ແລະ ເຮັດໃຫ້ແຟນບານໄດ້ເບິ່ງເກມທີ່ດີກວ່າເກົ່າ ລວມເຖິງເພື່ອເຮັດໃຫ້ເຮົາມີໂອກາດໄດ້ກັບໄປຫຼິ້ນລາຍການລະດັບທະວີບເອີຣົບ” ນາຍໃຫຍ່ ນັກບຸນ ກ່າວ.