ບໍ​ລິ​ສັດ​ເທີນ​ຫີນ​ບູນຍົກ​ລະ​ດັບ​ກັງ​ຫັນເພື່ອ​ເພີ່ມກຳ​ລັງ​​ການ​ຜະ​ລິດ

         ບໍ​ລິ​ສັດ​ເທີນ​ຫີນ​ບູນພາວ​ເວີ​ຈຳ​ກັດໄດ້​ຕິດ​ຕັ້ງ​ກັງ​ຫັນ​ໃໝ່ ໃຫ້​ແກ່ເຮືອນ​ຈັກ​ເທີນ-ຫີນ​ບູນຢູ່​​ແຂວງ​ຄຳ​ມ່ວນເຊິ່ງ​ການ​ຕິດ​ຕັ້ງ​ຄັ້ງ​ນີ້​ໄດ້​ເຮັດ​ໃຫ້​ບໍ​ລິ​ສັດ​ ສາ​ມາດ​ຜະ​ລິດ​ໄຟ​ຟ້າ​ເພີ່ມ​ຂື້ນຈາກ​ການ​ນຳ​ໃຊ້​ນ້ຳເທົ່າ​ເດີມ. ກັງ​ຫັນ​ໃໝ່​ນີ້​ມີ​ກຳ​ລັງ​ການ​ຜະ​ລິດ 120 ແມັກ​ກະ​ວັດເຊິ່ງ​ໄດ້​ເລີ່ມ​ດຳ​ເນີນການ​ຜະ​ລິດ​ໄຟ​ຟ້າ​ໃນ​ວັນ​ທີ28 ກຸມ​ພາ​ທີ່​ຜ່ານ​ມານີ້, ແລະການ​ທົດ​ສອບ​ຫວ່າງ​ມໍ່ໆ​ນີ້ ໄດ້​ສະ​ແດງ​ໃຫ້​ເຫັນວ່າ​ກັງ​ຫັນ​ດັ່ງ​ກ່າ​ວ​ນັ້ນ​ຜະ​ລິດ​ພະ​ລັງ​ງານ​ໄດ້​ປະສິດ​ທິ​ພາບ​ສູງກວ່າ​ຕົວ​ເກົ່າ.
ທ່ານຄອນ​ສະ​ຫວາດເມືອງ​ປາກ, ຫົວ​ໜ້າ​ຝ່າຍ​ການ​ຜະ​ລິດຂອງ THPC ໄດ້​ກ່າວ​ວ່າການ​ປ່ຽນ​ຖ່າຍ​ກັງ​ຫັນ​ຄັ້ງ​ນີ້​ແມ່ນກັງ​ຫັນ​ທີ່​ມີ​ກຳ​ລັງ​ການ​ຜະ​ລິດ 110 ເມ​ກະ​ວັດ ເຊິ່ງ​ເປັນ​ໜ່ວຍ​ທີ່​ຕິດ​ຕັ້ງ​ໃຫ້​ແກ່​ໂຄງ​ການ​ເທີນ​ຫີນ​ບູນ​ດັ້ງ​ເດີມ​ໃນ​ປີ 1997. ທ່ານຄອນ​ສະ​ຫວາດຍັງ​ໄດ້​ກ່າວ​ຕື່ມ​ອີກວ່າເຄື່ອງ​ຈັກ​ໃໝ່​ນີ້​ຈະ​ເພີ່ມ
ການຜະ​ລິດ. “ນີ້​ແມ່ນ​ການ​ພິ​ຈາ​ລະ​ນາ​ທີ່​ສຳ​ຄັນ​ຂອງ​ຜູ້​ປະ​ກອບ​ການ​ພະ​ລັງ​ງານ​ໄຟ​ຟ້າ​ນ້ຳ​ຕົກ, ໂດຍ​ສະ​ເພາະຢ່າງ​ຍິ່ງແມ່ນ​ໃນ​ຊ່ວງ​ເວ​ລາ​ທີ່​ຝົນ​ຕົກ​ບໍ່​ຫຼາຍ​ຄື​ໃນ​ອະ​ດີດ​ຜ່ານ​ມາ”.
ລະ​ດັບຕໍ່​າ​ຂອງ​ປະ​ລິ​ມານ​ນ້ຳ​ຝົນ​ໃນ​ປີ 2015 ໄດ້​​ເປັນ​ອຸ​ປະ​ສັກ​ຕໍ່​ຄວາມ​ສາ​ມາດໃນ​ການ​ທຳ​ງານ​ຂອງ​ເຄື່ອງ​ຈັກ​ຜະ​ລິດ​ພະ​ລັງງານ​ໄຟ​ຟ້າ​ໃຫ້​ຜະ​ລິດບໍ່​ໄດ້​​ເຕັມ​ກຳ​ລັງ​, ແລະ​ການ​ຍົກ​ລະ​ດັບເທັກ​ໂນ​ໂລ​ຢີທີ່​ທັນ​ສະ​ໄໝ​ສາ​ມາດ​ຊ່ວຍບັນ​ເທົາ​ບັນ​ຫາ​ດັ່ງ​ກ່າວ​ໄດ້. ທ່ານຄອນ​ສະ​ຫວາດຍັງ​ໄດ້​ກ່າວ​ຕື່ມ​ອີກວ່າ“​ຢູ່ THPC ພວກ​ເຮົາຕ້ອງ​ການ​ໃຫ້​ກັງ​ຫັນ​ດຳ​ເນີນການ​ຜະ​ລິດ​ໄດ້​ຢ່າງ​ມີ​ປະ​ສິດ​ທີ່​ພາບ​ສູງ​ສຸດ ​ຫຼາຍກວ່າ​ການ​ຜະ​ລິດເຕັມ​ກຳ​ລັງ​ສູງ​ສຸດ, ພາຍ​ໃຕ​້​ທາງ​ເລືອກ​ຂອງ​ກັງ​ຫັນ​ໃໝ່​ນີ້​ ຈະ​ສາ​ມາດ​ຜະ​ລິດ​ພະ​ລັງ​ງານ​ໄຟ​ຟ້າ​ໄດ້​ເພີ່ມ​ຂື້ນ​ອີກ 10 ເມ​ກະ​ວັດ​ຈາກ​ປະ​ລິ​ມານ​ນ້ຳເທົ່າເດີມ” ການ​ປ່ຽນ​ຖ່າຍ​ກັງ​ຫັນ​ແມ່ນ​ໄດ້​ເລີ່ມ​ຂື້ນ​ໃນ​ເດືອນ​ທັນ​ວາປີ​ກາຍ​ນີ້, ທີ​ມ​ງານສ້ອມ​ແປງ​ໃຫ​ຍ່​ປະ​ກອບ​ດ້ວຍ​ພະ​ນັກ​ງານ​ຈາກTHPC  ຮ່ວມ​ກັບ​ວິ​ສະ​ວະ​ກອນ​ທີ່​ມີ​ຄວາມ​ຊຳ​ນິ​ຊຳ​ນານ​ຈາກບໍ​ລິ​ສັດRainpowerແລະ Alstom ຈາກປະ​ເທດ​ນ​ໍ​ເວ. ວຽກ​ການ​ປ່ຽນ​ຖ່າຍ​ໄດ້​ສຳ​ເລັດ​ກ່ອນ​ກຳ​ນົດ​ໝາຍພ້ອມ​ກັບ​ຄວາມ​ປະ​ທັບ​ໃຈ​ຂອງ​ທີມ​ງານ​ຄົນ​ລາວ​ໃນ​ການ​ຮ່ວມ​ງານກັບ​ຄູ່​ຮ່ວມ​ງານ​ຕ່າງ​ປະ​ເທດ.
ທ່ານ Alf Steiner Jensen, ຫົວ​ໜ້າ​ພາກ​ສະ​ໜາມຂອງ​ບໍ​ລິ​ສັດRainpowerເວົ້າ​ວ່າທີມ​ງານ​ຂອງ THPC ເຮັດ​ວຽກ​ວ່ອງ​ໄວ, ມີ​ປະ​ສິດ​ທິ​ພາບແລະປອດ​ໄພ, ເຮັດ​ໃຫ້​ວຽກ​ສຳ​ເລັດ​ທັນ​ເວ​ລາ​ພ້ອມ​ກັບ​ຜົນ​ງານ​ທີ່​ດີ​ເລີດ.
        ກັງ​ຫັນ​ໜ່ວຍທີ​ສອງຈະ​ຖືກ​ປ່ຽນ​ຖ່າຍ​ໃນ​ທ້າຍ​ປີ​ນີ້, ຈະ​ເຮັດ​ໃຫ້ THPC ເກັບ​ຄືນ​ໄດ້​ຜົນ​ຜະ​ລິດ​ທີ່​ເສຍ​ໄປ​ໃນ​ຊ່ວງ​ລະ​ດູ​ຝົນ​ທີ່​ບໍ່​ດີ​ຂອງ​ປີ​ກາຍ​ນີ້.  ທ່ານ​ ສຸ​ລິ​ເດດເບົ້າ​ມະ​ນີ​ໂຄດ, ຮອງ​ຜູ້​ອໍ​າ​ນວຍ​ການ​ໃຫ​ຍ່​ ຂອງ​ບໍ​ລິ​ສັດໄດ້​ກ່າວ​ວ່າ “ຖ້າ​ຝົນ​ຕົກ​ຫຼາຍ​ໃນ​ປີ​ນີ້ ພວກ​ເຮົາ​ຈະ​ສາ​ມາດ​​ຜະ​ລິດໄດ້​​ເຕັມ​ທີ່. ເຖິງ​ແມ່​ວ່າ​ລະ​ດັບ​ນ້ຳ​ຈະ​ຕ່ຳ ພວກ​ເຮົາ​ກໍ່​ສາ​ມາດ​ທີ່​ຈະ​ປະ​ຕິ​ບັດ​ຕາມ​ພັນ​ທະ​ທາງ​ການ​ເງິນ​ຕໍ່​ກັບ​ລັດ​ຖະ​ບານແລະຜູ້​ໃຫ້​ກູ້​ຢືມ​ ພ້ອມ​ກັນ​ນີ້ ພວກ​ເຮົາ​ກໍ່​ຍັງ​ສາ​ມາດ​ຊ່ວຍ​ເຫຼືອ​ຊຸມ​ຊົນ​ທ້ອງ​ຖິ່ນໄດ້​ອ​ີກ​ດ້ວຍ”.

      “ເຖິງ​ຢ່າງ​ໃດ​ກໍ່​ຕາມ, ໃນ​ການ​ຜະ​ລິດ​ເຕັມຮູບ​ແບບ​ນັ້ນ ພວກ​ເຮົາຈະ​ສາ​ມາດ​ຊຳ​ລະໃຫ້​ຄູ່​ຮ່ວມ​ງານ​ຂອງ​ພວກ​ເຮົາໄດ້​ຫຼາຍ​ຂື້ນ​ ແລະປະ​ກອບ​ສ່ວນ​ຫຼາຍ​ຂື້ນ​ໃຫ້​ແກ່​ການ​ພັດ​ທະ​ນາ​ປະ​ເທດ​ຊາດ. ກັງ​ຫັນ​ໜ່ວຍ​ໃໝ່​ນີ້​ຈະ​ຊ່ວຍ​ເຮັດ​ໃຫ້​ການ​ປະ​ກອບ​ສ່ວນ​​ຫຼາຍ​ຂື້ນ​ໄດ້​ຕໍ່​ໄປ”.

ແຫຼ່ງຂ່າວ: Laophatthana Newspaper