ບໍ່ແກ້ວ ທຳລາຍຊິ້ນສວນສັດປ່າທີ່ຜິດກົດໝາຍ ຈຳນວນ 62,3 ກິໂລ

ກອງກວດກາປ່າໄມ້ ແຂວງບໍ່ແກ້ວ ​ໄດ້ກວາດລ້າງ, ຢຶດ ​ແລະ ທຳລາຍຊິ້ນສວນສັດປ່າ ທີ່ຜິດກົດໝາຍຢູ່ບັນດາ ຮ້ານອາຫານ ແລະ ຮ້ານຄ້າຂາຍຍ່ອຍ ຢູ່​ເມືອງ​ຫ້ວຍ​ຊາຍ ​ໃນ​ນັ້ນ​ປະກອບ​ມີ ໄກ່ປ່າ, ຊີ້ນໝູປ່າ, ໜັງໝູປ່າ, ງູເຫລືອມ, ຮອກທອງແດງ, ຮອກມົນ ແລະ ສັດອື່ນໆ ລວມທັງໝົດ 62,3 ກິໂລ ​ເຊິ່ງ​ໄດ້​ຈັດ​ພິທີ​ຈູດ​ທຳລາຍ ໃນວັນທີ 06 ມິຖຸນາ 2017 ທີ່ໂຮງຮຽນ ມສ ບ້ານປຸງ ເມືອງຫ້ວຍຊາຍ.

ການຢຶດ ​ແລະ ທໍາລາຍຊິ້ນ​ສວນສັດ​ປ່າໃນຄັ້ງນີ້ ເປັນການປຸກລະດົມ ໃຫ້ພໍ່-ແມ່ປະຊາຊົນ ມີສະຕິລະວັງຕົວຕໍ່ກົດໝາຍ ຂອງບ້ານເມືອງ, ພ້ອມ​ນີ້​ ເຈົ້າໜ້າທີ່ຍັງໄດ້ແຈ້ງ ໃຫ້ພໍ່ແມ່ປະຊາຊົນ ໄດ້ຮັບຮູ້ກ່ຽວ ກັບລະບຽບການກົດໝາຍປ່າໄມ້, ກົດໝາຍຕ້ານ ແລະ ສະກັດກັ້ນສັດນໍ້າ, ທັງ​ລະດົມ​ປະຊາຊົນ​ ໃນ​ການ​ອານຸລັດ​ສັດປ່າ, ໃຫ້ພໍ່ແມ່ປະຊາຊົນ ພາຍໃນແຂວງ ກໍຄື ທ້ອງຖິ່ນເຂດພັດທະນາ ຊົນນະບົດໃຫ້ມີສະຕິ ລະວັງຕົວຕໍ່ລະບຽບກົດໝາຍ ເປັນຕົ້ນການລະເມີດຄ້າຂາຍສັດປ່າເຖື່ອນ ຖ້າບຸກຄົນໃດຫາກຝາຝື້ນ ແມ່ນຈະໄດ້ປະຕິບັດຕາມ ລະບຽບກົດໝາຍທີໄດ້ວາງໄວ້.

ທີ່ມາ: ສຳນັກຂ່າວສານປະເທດລາວ