ບໍ່ຢູ່ແລ້ວ!! ມາຕິດບອກສິງຂໍຍ້າຍໄປຢູ່ກັບມ້າລາຍ

 

ເນມານຢາ ມາຕິດ ກອງກາງຂອງ ເຊວຊີ ຕົກເປັນຂ່າວວ່າແຈ້ງກັບຕົ້ນສັງກັດຂໍຍ້າຍໄປຢູ່ກັບ ຢູເວັນຕຸດ ໃນຊຳເມີນີ້ຫຼັງຈາກທີ່ ມ້າລາຍ ຢາກໄດ້ນັກເຕະໄປແທນທີ່ ພໍ ປັອກບາ ແລະ ພະຍາຍາມໃຊ້ ຊິໂມເນ ຊາຊາ ພ່ວງເຂົ້າໄປໃນຂໍ້ສະເໜີນຳ ຂະນະທີ່ເຂົາກໍປະກາດຊັດເຈນວ່າຢາກຫຼິ້ນໃນ ຢູຟາ ແຊມປຽນ ລີກ.

 

ເນມານຢາ ມາຕິດ ກອງກາງຂອງ ເຊວຊີ ສະໂມສອນຍັກໃຫຍ່ຂອງ ພຣີເມຍລີກ ຕົກເປັນຂ່າວວ່າໄດ້ແຈ້ງກັບທາງຕົ້ນສັງກັດແລ້ວວ່າເຂົາຕ້ອງການທີ່ຍ້າຍໄປຫຼິ້ນໃຫ້ກັບ “ມ້າລາຍ” ຢູເວັນຕຸດ ສະໂມສອນຍັກໃຫຍ່ຂອງ ກັນໂຊ ຊີຣີ ອາ ໃນຊ່ວງຊຳເມີນີ້ ຈາກການລາຍງານເມື່ອວັນທີ 11 ສິງຫານີ້.

 

ເຊື່ອກັນວ່າ ຢູເວ ພ້ອມທີ່ຈະພ່ວງ ຊິໂມເນ ຊາຊາ ກອງໜ້າທີມຊາດອີຕາລີເຂົ້າໄປໃນຂໍ້ສະເໜີຂໍຊື້ ມາຕິດ ມາຮ່ວມທີມເພື່ອຫວັງທີ່ຈະຫຼຸດລາຄານັກເຕະ ຂະນະທີ່ພວກເຂົາກຳລັງເບິ່ງຫາຕົວແທນຂອງ ພໍ ປັອກບາ ທີ່ຫາກໍຂາຍໄປໃຫ້ກັບ ແມນຢູ.

 

ກ່ອນໜ້ານີ້ມີລາຍງານວ່າການພົບກັນລະຫວ່າງນາຍໜ້າກັບນັກເຕະ ເຊວຊີ ໄດ້ຖືກເລື່ອນອອກໄປ ແຕ່ຫຼ້າສຸດເຊື່ອວ່າທັງສອງຝ່າຍໄດ້ມີການຫາລືກັນແລ້ວ ແລະ ມາຕິດ ກໍປະກາດຢ່າງຊັດເຈນວ່າຕ້ອງການຫຼິ້ນໃນ ຢູຟາ ແຊມປຽນ ລີກ ແລະ ຢາກໄປຫຼິ້ນໃຫ້ກັບ ຢູເວ ໃນລະດູການໃໝ່ທີ່ຈະຮອດນີ້.

 

ທັງນີ້ເຊື່ອກັນວ່າ ອັນໂຕນີໂອ ຄອນເຕ ຜູ້ຈັດການທີມ ເຊວຊີ ຕ້ອງການດຶງນັກເຕະໄວ້ຕໍ່ໄປແຕ່ທຸກຢ່າງກໍອາດຈະຂຶ້ນຢູ່ກັບການຕັດສິນໃຈຂອງນັກເຕະ.