ບໍລິສັດ ດູເມັກຊ໌ ຮ່ວມນ້ຳໃຈ ຊ່ວຍເຫຼືອ ຜູ້ປະສົບໄພນ້ຳຖ້ວມ ປີ 2016

  • ໃນ​​ຕົ້ນ​ເດືອນ​ສິງຫາ 2016 ທີ່​ຜ່ານ​ມາ ໄດ້​ເກີດ​ມີ​ຝົນ​ໜັກ​ຕິດຕໍ່​ກັນ​ຫຼາຍ​ວັນ ສົ່ງ​ຜົນ​ເຮັດ​ໃຫ້​ແມ່ນ້ຳ​ສາຍ​ຕ່າງໆ​ຍຶ່ງ​ຂຶ້ນ​ຖ້ວມ​ບ້ານເຮືອນ ແລະ ເນື້ອທີ່​ການ​ຜະລິດ​ຂອງ​ປະຊາຊົນ​ເສຍ​ຫາຍ​ເປັນ​ບໍລິເວນ​ກວ້າງ ຢູ່​ບັນດາ​ແຂວງ​ພາກ​ເໜືອ ​ແລະ ພາ​ກກາງ ​ ​ເຮັດ​ໃຫ້​ປະຊາຊົນ​ໄດ້​ຮັບ​ຜົນ​ກະທົບ​ຢ່າງ​ໜັກ, ສຸກສາລາ, ວັດວາ, ສະຖານ​ທີ່​ສາທາລະນະ, ສັດລ້ຽງ, ​ເຄື່ອງ​ປູກ​ຂອງ​ຝັງ ​ແລະ ບ້ານ​ເຮືອນ​ຂອງ​ປະຊາຊົນ​ຖືກນ້ຳ​ຖ້ວມ, ບາງ​ບ້ານ​ສູງ​ຈົນ​ເຖິງ​ຫຼັງຄາ, ​ເຮັດ​ໃຫ້​ປະຊາຊົນ ລວມເຖີງແມ່ຍິງລາວ ແລະ ເດັກນ້ອຍ ຈໍຳນວນ ບໍ່​ໜ້ອຍ ໄດ້ຮັບຄວາມເດືອດຮ້ອນທາງ​ດ້ານ​ສາລະ​ນູປະ​ໂພ​ກ, ສຸຂະ​ອະນາ​ໄມ, ອາຫານ​ການ​ກິນ ​ເຮັດ​ໃຫ້​ມີ​ຜົນ​ກະທົບ​ຕໍ່​ສຸຂະພາບ ​ແລະ ​ໂພຊະ​ນາ​ການ.

  • ເພື່ອເປັນການຊ່ວຍ​ເຫຼືອ​​ໃຫ້​ແກ່ຜູ້ປະສົບໄພໃນຄັ້ງ​ນີ້ ໂດຍສະເພາະແມ່ຍິງ ແລະ ເດັກນ້ອຍ ທ່ານ ດຣ ນາງ ອິນ​ລາ​ວັນ ​ແກ້ວ​ບຸນ​ພັນ ກຳມະການ​ສູນ​ກາງ​ພັກ,  ປະທານຄະນະ​ບໍລິຫານ​ງານສູນກາງສະຫະພັນແມ່ຍິງລາວ ​ໄດ້​ມີ​ຄວາມ​ເປັນ​ຫ່ວງ​​ເປັນ​ໄຍ ​ແລະ ມີ​ຄວາມມຸ້ງໝັ້ນ ໃຫ້ຄວາມສຳຄັນຫຼາຍໃນກຸ່ມແມ່ ແລະ ເດັກ ໃຫ້ໄດ້ມີສຸຂະພາບ ແລະ ໂພຊະນາການທີ່ດີ ໃນເຂດປະສົບໄພພິບັດ, ຄວາມຈຳເປັນດ້ານສຸຂະພາບ ແລະ ພັດທະນາການຂອງເດັກນ້ອຍໃນໄລຍະ 1,000 ວັນ ຕ້ອງໄດ້ມີການສືບຕໍ່ອາຫານ ທີ່ເໝາະສົມ ແລະ ຈຳເປັນໃນແຕ່ລະມື້, ​ເພາະ​ໃນ​ໄລຍະ​ດັ່ງກ່າວ ​ແມ່ຍິງ ​ແລະ ​ເດັກນ້ອຍ​ອາດ​ຈະ​ບໍ່​ໄດ້​ຮັບ​ການ​ບໍລິການ​ທີ່​ພຽງພໍ​ດ້ານ​ໂພຊະ​ນາ​ການ, ສະ​ນັ້ນ ການ​ທີ່​ນຳ​ເອົາ​ເຄື່ອງ​ບໍລິ​ໂພ​ກ​ເປັນ​ຕົ້ນ ຜະລິດ​ຕະພັນ​ນົມ​ດູ​ເມັກ ຄັ້ງນີ້ ຈະ​ຊ່ວຍ​ໃຫ້​ແມ່ຍິງ ​ແລະ ​ເດັກນ້ອຍ​ມີ​ສຸຂະພາບ​ທີ່​ດີ​ຂື້ນ.

             ເຊັ່ນດຽວກັບ ທ່ານ ເສກສັນ ໃຈຄົງ ຜູ້ຈັດການຝ່າຍພັດທະນາທຸລະກິດ ບໍລິສັດ ດູເມັກຊ໌ ຈຳກັດ (ປະເທດໄທ) ສະແດງຄວາມຮູ້ສຶກເປັນຫ່ວງຜູ້ປະສົບໄພໃນ ບັນດາ​ແຂວງ​ຕ່າງໆ  ໂດຍສະເພາະເດັກນ້ອຍ ວ່າ: ໃນໄລຍະທີ່ປະສົບໄພນ້ຳຖ້ວມ ເດັກນ້ອຍເຫຼົ່ານັ້ນຈະໄດ້ຮັບອາຫານທີ່ມີປະໂຫຍດ ຄົບຖ້ວນ ຕາມຄວາມຕ້ອງການໃນແຕ່ລະມື້ ຫຼື ບໍ່? ເພາະ ບໍລິສັດ ດູເມັກຊ໌ ຈໍ​າກັດ ເປັນໜື່ງໃນບໍລິສັດຂອງກຸ່ມ ດານອນ ປະເທດ ຝຣັ່ງ ໃຫ້ຄວາມສຳຄັນຫຼາຍ ໃນເລື່ອງໂພຊະນາທີ່ດີໃນໄລຍະເກີດໃໝ່ ຂອງຊີວິດ (Early life Nutrition) ເຊິ່ງໄດ້ຮັບການພິສູດ ທາງການແພດຈາກທົ່ວໂລກແລ້ວວ່າ ຈະສົ່ງຜົນໄລຍະຍາວຕໍ່ກັບ ຊີວິດຂອງເດັກນ້ອຍ ໃນເລື່ອງ ສຸຂະພາບ ພະຍາດ ທີ່ບໍ່ສາມາດຕິດຕໍ່ໄດ້ (NCD) ແລະ ສະຕິປັນຍາຂອງເດັກ, ທີ່ຈະເປັນຕົວກຳນົດ ໃຫ້ເປັນຜູ້ໃຫຍ່ທີ່ມີຄຸນນະພາບໃນອານາຄົດ ແລະ ໃນຖານະທີ່ບໍລິສັດ ດູເມັກຊ໌ ຈຳກັດ ໄດ້ມາດຳ​ເນີນທຸລະກິດ ​ໃນ ສປປ ລາວ ຕັ້ງແຕ່ ປີ 2008 ເຫັນວ່າ ຄວນຈະໃຫ້ຄວາມຊ່ວຍເຫຼືອເດັກໃນເຂດປະສົບໄພຢ່າງຮີບດ່ວນ ໂດຍຜ່ານທາງສູນກາງສະຫະພັນແມ່ຍິງລາວ.

          ເນື່ອງຈາກເປົ້າໝາຍ ຂອງ ສູນກາງສະຫະພັນແມ່ຍິງລາວ​ ແລະ ບໍລິສັດ ດູເມັກຊ໌ ຈໍາກັດ ແລະ ບໍລິສັດ ຂວັນໃຈການຄ້າ ຂາອອກ-ຂາເຂົ້າ ຈຳກັດ ຜູ້ແທນຈຳໜ່າຍຜະລິດຕະພັນຂອງ ບໍລີສັດ ດູເມັກ ໃນປະເທດລາວ ໂດຍທ່ານ ນາງ ມະນີວອນ ສິດທິໄຊ ​ແລະ ​ໂດຍ​ການ​ປະສານ​ງານ​ຫຼັກ ຂອງ ບໍລິສັດ ຄລາຍ​ແມັກ​ຊ໌ ມັລຕິ​ມີ​ເດຍ ຈຳກັດ ຊື່​ງ​ແມ່ນ​ທ່ານ ວົງ​ປະກາຍ ​ແສນ​ບຸດຕະລາດ ຄື​ກັນ, ​ໃນ​ມື້​ນີ້ ຈື່ງ​ໄດ້ມີການ ມອບ-ຮັບ ຜະລິດຕະພັນ ດູ​ເມັກ ຂອງ ບໍລິສັດ ດູເມັກຊ໌ ຈຳກັດ (ປະ​ເທດ​ໄທ) ຈຳນວນ 1,000 ​ແກັດ ລວມມູນຄ່າ 134,000,000ກີບ ແລະ ຍັງຈະຮ່ວມກັນຈັດຄາຣາວານສົ່ງມອບ ​ເຄື່ອງຊ່ວຍເຫຼືອ​ໃຫ້​ແກ່ກັບຜູ້ປະສົບໄພນ້ຳ​ຖ້ວມ ຊຶ່ງຈະມີຄະນະ​ຈາກ ສູນກາງສະຫະພັນແມ່ຍິງລາວ, ຄະນະ​ຮັບຜິດຊອບ ​ແລະ ສະຫະພັນ​ແມ່ຍິງແຂວງ, ຮ່ວມກັບ    ຜູ້ບໍລິຫານຈາກ ບໍລິສັດ  ດູເມັັກຊ໌ ຈຳກັດ, ບໍລິສັດ ຂວັນໃຈການຄ້າ  ຂາອອກ-ຂາເຂົ້າ ຈຳກັດ, ບໍລິສັດ ຄລາຍ​ແມັກ​ຊ໌ ມັລຕິ​ມີ​ເດຍ ຈຳກັດ ​ແລະ ຜູ້​ອຸບປະຖຳ ຈາກ​ພາກສ່ວນ​ອື່ນໆ ໃນ​ເວລາ​ທີ່​ເໝາະ​ສົມ.