ບໍລິສັດວິມແປວຄອມລາວຈໍາກັດ (ບີລາຍ) ມອບເງິນຄ່າທໍານຽມ ແລະ ຄ່ານໍາໃຊ້ຄື້ນຄວາມຖີ່ວິທະຍຸ ປະຈໍາປີ 2014-2015

ໂດຍອີງຕາມລັດຖະບັນຍັດຂອງປະທານປະເທດ ແຫ່ງ ສປປ.ລາວ ສະບັບເລກທີ 03/ປປທ ລົງວັນທີ 19 ພະຈິກ 2008 ວ່າດ້ວຍຄ່າທໍານຽມ ແລະ ຄ່າບໍລິການວິຊາການ (ສະບັບປັບປຸງໃໝ່ 2008) ອີງຕາມດໍາລັດຂອງນາຍົກລັດ ຖະມົນຕີ ແຫ່ງ ສປປ.ລາວ ສະບັບເລກທີ 303/ນຍ ລົງວັນທີ 26 ກັນຍາ 2011 ວ່າດ້ວຍການຈັດຕັ້ງການເຄື່ອນ ໄຫວຂອງ ກະຊວງໄປສະນີ ໂທລະຄົມມະນາຄົມ ແລະ ການສື່ສານ ແລະອີງຕາມຂໍ້ຕົກລົງຂອງລັດຖະມົນຕີ ປະຈໍາສໍານັກງານນາຍົກລັດຖະມົນຕີ ວ່າດ້ວຍການຫຼຸດຄ່ານໍາໃຊ້ຄື້ນຄວາມຖີ່ວິທະຍຸ ເຊິ່ງບໍລິສັດວິມແປວຄອມລາວ (ບີລາຍ) ຈິ່ງສືບຕໍ່ມອບພັນທະຄ່າທໍານຽມ ແລະ ຄ່ານໍາໃຊ້ຄື້ນຄວາມຖີ່ວິທະຍຸ ໃນລະບົບ 2G 3G ແລະ ວາຍແມັກ ປະຈໍາສົກປີ 2014-2015 ຕົກເປັນເງິນຈໍານວນທັງໝົດ 12.021.800.000 ກີບ.

ທ່ານ Armstrong ຜູ້ອໍານວຍການໃຫຍ່ ບໍລິສັດວິມແປວຄອມລາວຈໍາກັດ ໄດ້ກ່າວວ່າ ບໍລິສັດວິມແປວຄອມລາວຈໍາກັດ ຫຼື ບີລາຍ ເປັນບໍລິສັດນຶ່ງທີ່ດໍາເນີນທຸລະກິດກ່ຽວກັບດ້ານໂທລະຄົມໂທລະສັບມືຖືຢູ່ ສປປ.ລາວ ເຊິ່ງໃນແຕ່ລະປີກໍໄດ້ປະຕິບັດພັນທະຂອງຕົນຕາມຂໍ້ຕົກລົງ ແລະ ລະບຽບການຕ່າງໆທີ່ລັດຖະບານ ສປປ.ລາວ ໄດ້ວາງອອກທຸກປະການ ໃຫ້ຖືກຕ້ອງ ແລະ ສອດຄ່ອງຕາມແນວທາງນະໂຍບາຍຂອງພັກ-ລັກຖະບານ.

ພິທີມອບ-ຮັບ ເງິນຄ່າທໍານຽມ ແລະ ຄ່ານໍາໃຊ້ຄື້ນຄວາມຖີ່ວິທະຍຸ ປະຈໍາປີ 2014-2015 ດັ່ງກ່າວ ໄດ້ຈັດຂຶ້ນໃນຕອນບ່າຍວັນທີ 2 ກັນຍາ 2015 ທີ່ກະຊວງໄປສະນີ ໂທລະຄົມມະນາຄົມ ແລະ ການສື່ສານ ເຊິ່ງກ່າວມອບໂດຍທ່ານ Armstrong ຜູ້ອໍານວຍການໃຫຍ່ ບໍລິສັດວິມແປວຄອມລາວຈໍາກັດ ແລະ ກ່າວຮັບໂດຍທ່ານ ຈະເລີນ ສີບຸນເຮືອງ ຮອງຫົວໜ້າກົມໂທລະຄົມ ກະຊວງໂທລະຄົມມະນາຄົມແລະ ການສຶ່ສານ ເຂົ້າຮ່ວມມີທ່ານ ຄໍາກ້າ ຫາດາວເຮືອງ ຜູ້ຈັດການຝ່າຍພົວພັນລັດຖະບານຂອງ ບໍລິສັດວິມແປວຄອມລາວຈໍາກັດ ທ່ານ ຄໍາເຟື້ອງ ດວງບຸດດີ ຫົວໜ້າຝ່າຍການເງິນ ບໍລິສັດວິມແປວຄອມລາວຈໍາກັດແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ຂ່າວ/ພາບ: ເທບພະວົງ

………………………………………………………………………………………………………………………………….................................

ທີ່ມາ: Vientiane today