ບໍລິສັດລາວເວີນ ຊ່ອຍເຫຼືອລ້າໂຄງການກໍ່ສ້າງເສັ້ນທາງ ແລະ ຂົວ 2 ແຫ່ງ ໃນນະຄອນຫຼວງວຽງຈັນ

ພິທີເຊັນສັນຍາໂຄງການຊ່ອຍເຫຼືອລ້າໃນການກໍ່ສ້າງຂົວຂວ້າມນ້ຳງື່ມ ບ້ານນາບົງ-ບ້ານທ່າກົກໄຮ ເມືອງປາກງື່ມ ນະຄອນຫຼວງວຽງຈັນ ຢູ່ຈຸດທີ່ເກີດອຸປະຕິເຫດເຮືອຫຼົ້ມເມື່ອບໍ່ດົນມານີ້ ແລະ ການກໍ່ສ້າງເສັ້ນທາງເຂົ້າຫາຂົວດັ່ງກ່າວ ພ້ອມດ້ວຍໂຄງການກໍ່ສ້າງຂົວຂວ້າມຮ່ອງແຊງ ເມືອງໄຊເຊດຖາ ນະຄອນຫຼວງວຽງຈັນ ຮວມມູນຄ່າກໍ່ສ້າງທັງສອງໂຄງການ ປະມານ 200 ຕື້ກີບໄດ້ມີຂຶ້ນໃນຕອນຄໍ່າຂອງວັນທີ 11 ມິຖຸນາ 2015 ຢູ່ສູນການຄ້າລາວ-ໄອເຕັກ ນະຄອນຫຼວງວຽງຈັນ ໂດຍພິທີລົງນາມໄດ້ມີຂຶ້ນລະຫວ່າງ ທ່ານ ດຣ. ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ກັບ ທ່ານ ສັກໄຊ ວົງມາລາສິດ (ປີເຕີຈັນ) ປະທານບໍລິສັດ ລາວເວີນ ວິສະວະກຳກໍ່ສ້າງຂົວທາງຈຳກັດ ໃນໂຄງການກໍ່ສ້າງຂົວຂວ້າມນ້ຳງື່ມ ແລະ ໂຄງການກໍ່ສ້າງຂົວຂ້າມຮ່ອງແຊງມີຂຶ້ນລະຫວ່າງ ທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫຼວງວຽງຈັນ ແລະ ທ່ານ ຄຳພອນ ພອນແກ້ວ ຄະນະອຳນວຍການບໍລິສັດລາວເວີນ ວິສາວະກຳກໍ່ສ້າງຂົວທາງຈຳກັດ ໂດຍເປັນກຽດເຂົ້າຮ່ວມຂອງທ່ານ ສົມສະຫວາດ ເລັ່ງສະຫວັດຮອງນາຍົກລັດຖະມົນຕີ ຜູ້ຊີ້ນຳວຽກງານຂົງເຂດເສດຖະກິດແລະຈໍລະຈອນ ທ່ານ ດຣ. ບຸນຈັນ ສິນທະວົງ ລັດຖະມົນຕີວ່າການກະຊວງ ໂຍທາທິການ ແລະ ຂົນສົ່ງ ທ່ານ ສອນໄຊ ສີພັນດອນ ລັດຖະມົນຕີ ຫົວໜ້າຫ້ອງວ່າການລັດຖະບານ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນຈຳນວນຫຼາຍ.

……………….ປະທານບໍລິສັດ ລາວເວີນ ວິສະວະກຳກໍ່ສ້າງຂົວທາງ ຈຳກັດ ກ່າວວ່າ ຕົນມີຄວາມຍິນດີໃຫ້ການຊ່ອຍເຫຼືອສ້າງຂົວຂວ້າມນ້ຳງື່ມ ຢູ່ບ້ານນາບົງ ເມືອງປາກງື່ມ ນະຄອນຫຼວງວຽງຈັນ ໃນຈຸດເກີດອຸປະຕິເຫດເຮືອຫຼົ້ມຈົນເປັນເຫດໃຫ້ນັກຮຽນເສຍຊີວິດທັງໝົດ 10 ຄົນ ເຊິ່ງຈະສ້າງເປັນຂົວເບຕົງເສີມເຫຼັກ ຍາວ 220 ແມັດ ໜ້າຂົວກວ້າງ 11 ແມັດ ຮວມທາງຄົນຍ່າງ2 ເບື້ອງໆລະ 1,50 ແມັດ ໄລຍະການກໍ່ສ້າງ 24 ເດືອນ ມີລະບົບປ້າຍຄົບຊຸດ ຮວມມູນຄ່າການກໍ່ສ້າງປະມານ 105 ຕື້ກີບພ້ອມນີ້ ຍັງເຫັນດີຊ່ອຍເຫຼືອໂຄງການກໍ່ສ້າງເສັ້ນທາງເບຕົງ ໃນເຂດ 4 ແຍກໄຟແດງໂພນພະເນົາ ໄປຕາມເຂດວິທະຍາໄລລາວ-ອາເມຣິກາ ລຽບຄອງນ້ຳ ຮວມມີຂົວ 3 ແຫ່ງ ເຊື່ອມຕໍ່ເສັ້ນທາງໂພນພະເນົາ ຍາວ 2 ກິໂລແມັດ ແລະ ກໍ່ສ້າງຂົວຂວ້າມຄອງ 3 ແຫ່ງທີ່ເຊື່ອມຕໍ່ໃສ່ເສັ້ນທາງໂພນພະເນົາ ໜ້າທາງກວ້າງ 9 ແມັດ ມີຮ່ອງລະບາຍນ້ຳຝົນ ໄລຍະເວລາກໍ່ສ້າງ ແມ່ນຈະໃຫ້ສຳເລັດທັນສະເຫຼີມສະຫຼອງວັນຊາດທີ 2 ທັນວາ ທີ່ຈະມາເຖິງນີ້ ຮວມມູນຄ່າການກໍ່ສ້າງ 42 ຕື້ກີບ ເປັນການປະກອບສ່ວນອຳນວຍຄວາມສະດວກໃນການໄປ-ມາ ຫາສູ່ຂອງປະຊາຊົນລະຫວ່າງ ບ້ານຕໍ່ບ້ານ ເມືອງຕໍ່ເມືອງ ແລະ ບັນດາແຂວງໃກ້ຄຽງໂດຍສະເພາະແມ່ນແນໃສ່ໃຫ້ປະຊາຊົນຫຼຸດພົ້ນອອກຈາກຄວາມທຸກຍາກ ແລະ ມີຊີວິດການເປັນຢູ່ນັບມື້ນັບດີຂຶ້ນເປັນກ້າວໆ.

ຂ່າວ/ພາບ: ເທບພະວົງ

ທີ່ມາ: Vientiane Today