ບ້ານບຶງໄຊ ເປັນບ້ານຜະລິດ ກະສິກຳ ຂອງແຂວງສາລະວັນ

 ບ້ານ​ບຶງ​ໄຊ ​ເມືອງສາລະ​ວັນ ​​ເປັນ​ບ້ານ​ ທີ່​ມີ​ເງື່ອນ​ໄຂ ​ຄົບ​ຖ້ວນ​ ມາດຖານ ຂອງ​ບ້ານ​ ພັດທະ​ນາ​ ດ້ານ​ກະ​ສິ​ກຳ ​ແລະ ​ເປັນ​ບ້ານ​ແບບຢ່າງ ​ໃນ​ການ​ນຳ​ໃຊ້ ​​ເຕັກນິກ​ໃໝ່​ ເຂົ້າ​ໃນ​ການ​ຜະລິດ. ດັ່ງນັ້ນ ບ້ານ​ດັ່ງກ່າວ ຈຶ່ງ​ໄດ້​ຮັບ​ການ​ ປະກາດ​ ເປັນ​ບ້ານ ຜະລິດ​ກະສິກຳ​ ​ເມື່ອ​ບໍ່​ດົນ​ມາ​ນີ້ ຢູ່​ແຂວງ​ສາລະ​ວັນ ​ໂດຍການ ​ເປັນ​ປະທານ​ ຂອງທ່ານ ພູ​ທົງຄຳ​ ມະນີ​ວົງ ຮອງ​ເຈົ້າ​ແຂວງໆ ສາລະ​ວັນ, ທ່ານ ອານຸສັກ ຈຳປາ​ຄຳ ຫົວໜ້າ ພະ​ແນ​ກ ກະ​ສິກຳ ​ແລະ​ ປ່າ​ໄມ້​ແຂວງ​, ພາກສ່ວນ​ກ່ຽວຂ້ອງ ພ້ອມ​ດ້ວຍ​ ກຸ່ມ​ການ​ຜະລິດ ​ພາຍ​ໃນ​ບ້ານ ​ເຂົ້າ​ຮ່ວມ​.

ທ່ານ ທອງ​ດີ ຈັນທະ​ວົງ ຮອງ​ຫົວ ໜ້າພະ​ແນ​ກ ກະ​ສິ​ກຳ ແລະ​ ປ່າ​ໄມ້​ແຂວງ​ ໄດ້​ກ່າວ​ວ່າ: ​ບ້ານ​ບຶງ​ໄຊ ​ເປັນ​ບ້ານ​ພັດທະນາ ​ດ້ານ​ກະ​ສິ​ກຳ ​ຕິດ​ພັນ​ກັບ ​ວຽກງານ​ສາມ​ສ້າງ ​ເຊິ່ງມີພົນລະ​ເມືອງ 2,7ພັນ​ກວ່າຄົນ, ຍິງ 1,4 ພັນ​ກວ່າຄົນ, ມີ​ເນື້ອ​ທີ່ກວ່າ 1,4 ພັນ​ເຮັກຕາ, ​ເນື້ອ​ທີ່​ປ່າ​ໄມ້ 300 ກວ່າ​ເຮັກຕາ, ​ເນື້ອ​ທີ່ດິນ ກະ​ສິກຳກວ່າ 900 ​ເຮັກຕາ ​ແລະ​ ເນື້ອ​ທີ່​ນາກວ່າ 100 ​ເຮັກຕາ. ບ້ານ​ບຶງ​ໄຊ ​ປະກອບ​ມີ​ ກິດຈະກຳ​ ຈຸດ​ສຸມ​ຈຳນວນ 4 ກິດຈະກຳ​ມີ 45 ກຸ່ມ​ຜະລິດ​ຄື: ຜະລິດ​ເຂົ້າ​ເປັນ​ສິນຄ້າ ​ມີ 10 ກຸ່ມ, ມີ 66 ຄອບຄົວ​ ໃນ​ເນື້ອ​ທີ່ 85 ​ເຮັກຕາ ​ສະມັດ​ຕະພາບ ​ສະ​ເລ່ຍ 5,5 ​ໂຕນ/​ເຮັກຕາ, ​ໂຄງການ​ລ້ຽງ​ໄກ່​ມີ 25 ກຸ່ມ, ມີ 107 ຄອບຄົວ,ລ້ຽງໝູມີ 9 ກຸ່ມ, ມີ 61 ຄອບຄົວ ​ແລະ ​ໂຄງການ ​ລ້ຽງປາ​ມີ 1 ກຸ່ມ, ມີ 6 ຄອບຄົວ, ເຊິ່ງ​ເປັນ​ບ້ານ ​ທີ່​ໄດ້​ຄົບ​ຕາມ 9 ມາດຖານ ຂອງ​ບ້ານ​ພັດທະ​ນາ ​ດ້ານ​ກະ​ສິ​ກຳ​ຄື: ​ເປັນ​ບ້ານ​ທີ່​ມີ​ລະບົບ​ການຈັດ​ຕັ້ງ ໜັກ​ແໜ້ນ, ​ເປັນ​ບ້ານ​ທີ່​ ປູກ​ເຂົ້າ​ ໄດ້​ທັງ​ນາປີ ແລະ ​ນາ​ແຊງ, ປະຊາຊົນ​ ພາຍ​ໃນ​ບ້ານ 100%​ ແມ່ນ​ນຳ​ໃຊ້​ເຂົ້າ​ໃນ ​ການ​ກະກຽມດິນ, ​ເປັນ​ບ້ານ​ ທີ່​ມີ​ກຸ່ມ​ການ​ຜະລິດ, ​ເປັນ​ບ້ານ​ທີ່​ມີ​ເ ງື່ອນ​ໄຂ ​ເອື້ອ​ອຳນວຍ ​ຄວາມ​ສະດວກ ຫລາຍດ້ານ​ເຊັ່ນ​: ມີ​ລະບົບ ​ຊົນລະປະທານ, ຝາຍ​ນ້ຳ​ລົ້ນ, ​ເປັນ​ບ້ານ ​ທີ່​ມີ​ການ​ປູກຝັງ​ ນຳ​ໃຊ້​ຕິກ​ນິກ​ໃໝ່,​ ​ພາຍ​ໃນ​ບ້ານ​ບຶງ​ໄຊ​ມີ 300 ກວ່າຄົວ​ເຮືອນ ​ທີ່​ເຮັດ​ອາຊີບ ​ດ້ານ​ກະ​ສິກຳ ​ເທົ່າ​ກັບ 95% ຂອງ​ຈຳນວນ ​ຄົວ​ເຮືອນ ​ແລະ​ ເປັນ​ບ້ານ​ທີ່​ມີ​ກອງ​ທຶນ ​ພັດທະນາ​ ບ້ານ​ເຊັ່ນ​: ກອງ​ທຶນ​ປ່າ​ ຜະລິດກວ່າ 77 ລ້ານກີບ, ກອງ​ທຶນໜູນວຽນ ມີ​ປະມານ 300 ລ້ານກວ່າ​ກີບ.

ທີ່ມາ http://kpl.gov.la