ບ້ານຊ່ວຍເຫຼືອເດັກ sos ຍັງເປັນບ່ອນເພິ່ງອາໃສຂອງເດັກນ້ອຍທີ່ຂາດຜູ້ເບິ່ງແຍງ

ວັນທີ 15 ຕຸລາ ທີນີ້ທີ່ພະແນກແຮງງານ ແລະສະຫວັດດີການສັງຄົມແຂວງໄດ້ມີກອງປະຊຸມສະຫຼຸບວຽກງານຂອງບ້ານຊ່ວຍເຫຼືອເດັກ sos ໂດຍການເຂົ້າຮ່ວມຂອງນາງ ບຸນເຍື້ອນ ທິດພຸດທະວົງ ຫົວໜ້າພະແນກແຮງງານ ແລະສະຫວັດດີການສັງຄົມແຂວງສະຫວັນນະເຂດ, ມີຫົວໜ້າ, ຮອງຫົວໜ້າພະແນກການອ້ອມຂ້າງແຂວງ ແລະອົງການຈັດຕັ້ງມະຫາຊົນທຸກຂັ້ນເຂົ້າຮ່ວມ.
ໂອກາດນີ້ທ່ານ ຄຳວິໄລ ມານາບຸດ ຜູ້ອຳນວຍການບ້ານຊ່ວຍເຫຼືອເດັກ sos ໄດ້ລາຍງານວ່າວ່າ: ບ້ານຊ່ວຍເຫຼືອເດັກນ້ອຍ sos ແຂວງສະຫວັນນະເຂດໄດ້ຮັບເອົາເດັກນ້ອຍທີ່ກຳພ້າ-ກຳພອຍ ແລະເດັກນ້ອຍທີ່ຂາດສານອາຫານມາອຸປະກາລະເບິ່ງແຍງ, ໃຫ້ພວກເຂົາມີໂອກາດໄດ້ຮັບການສຶກສາຮ່ຳຮຽນ, ສ້າງໃຫ້ເຂົາມີວິຊາຊີບຕິດໂຕ, ໃຫ້ສາມາດດູແລເບິ່ງແຍງຊ່ວຍເຫຼືອຕົນເອງໄດ້ໃນອະນາຄົດ; ປະຈຸບັນພາຍໃນບ້ານມີເດັກທີ່ໄດ້ຮັບເຂົ້າມາອຸປະຖຳທັງໝົດ 140 ຄົນ, ຍິງ 64 ຄົນ, ໃນຈຳນວນດ່ັງກ່າວນີ້ຮຽນຢູ່ໂຮງຮຽນອະນຸບານພາບໃນບ້ານເດັກມີ 5 ຄົນ, ຍິງ 2 ຄົນ, ເຂົ້າໂຮງຮຽນປະຖົມໂພນສະຫວ່າງເໜືອມີ 52 ຄົນ, ຍິງ 27ຄົນ, ເຂົ້າໂຮງຮຽນມັດທະຍົມສົມບູນອຸດົມວິໄລຕອນຕົ້ນມີ 80 ຄົນ, ຍິງ 34 ຄົນ ແລະຕອນປາຍມີ 3 ຄົນ, ຍິງ 1 ຄົນ. ສະເພາະອຸປະຖຳເດັກທີ່ຂາດສານອາຫານອາຍຸແຕ່ 4-6 ເດືອນແລ້ວສ່ົງກັບຄືນສູ່ຄອບຄົວປະຈຸບັນມີ 152 ຄົນ, ຍິງ 83 ຄົນ, ສົ່ງກັບຄືນຜູ້ປົກຄອງແລ້ວ 142 ຄົນ, ຍິງ 76 ຄົນ.
ປະຈຸບັນມີແມ່ລ້ຽງ 13 ຄົນ ແລະນ້າສາວ 2 ຄົນ ເຮັດໜ້າທີ່ເປັນຜູ້ລ້ຽງດູ ແລະສຶກສາອົບຮົມເດັກ ນຳພາເດັກເຮັດກິດຈະກຳພາຍໃນບ້ານຂອງຕົນເຊັ່ນ: ຫຼິ້ນກິລາ, ສອນໃຫ້ເຂົາຮູ້ຈັກຮັກສາສິ່ງແວດລ້ອມ, ອະນາໄມເຮືອນຊານ, ເດີ່ນບ້ານ, ເຮັກສາເບິ່ງແຍງຕົ້ນດອກໄມ້, ປູກຜັກໄວ້ກິນເອງ ແລະອື່ນໆ.

ທີ່ມາ Savanhphuttana News