ບຸບຟອນບອກໃຜທີ່ດູຖູກອີຕາລີຈະຕ້ອງເສຍໃຈຄືກະທິງ!!!

 

ຈານລຸຍຈິ ບຸບຟອນ ນາຍທະວານທີມຊາດອີຕາລີຊີ້ສະເປນ ແລະ ທຸກທີມໃນເອີຣົບຕ້ອງເສຍໃຈທີ່ດູຖູກ “ອັດຊູຣີ” ຫຼັງຈາກທີ່ພວກເຂົາເຂ່ຍ “ກະທິງ” ຕົກຮອບ 16 ທີມສຸດທ້າຍຂອງ ຢູໂຣ 2016 ເມື່ອວັນຈັນ ແຕ່ຍອມຮັບວ່າທີມຍັງເຫຼືອເສັ້ນທາງທີ່ຍາວໄກ ແລະ ມີຄູ່ແຂ່ງໜັກໆຖ້າຢູ່ກ່ອນທີ່ຈະໄປຮອດຕຳແໜ່ງແຊມ.

 

ຈານລຸຍຈິ ບຸບຟອນ ນາຍທະວານທີມຊາດອີຕາລີອອກມາກ່າວເມື່ອຕອນເຊົ້າຂອງວັນອັງຄານນີ້ວ່າ ເຂົາຄິດວ່າສະເປນ ແລະ ທີມອື່ນໆໃນເອີຣົບຕ້ອງເສຍໃຈກັບການທີ່ປະເມີນຂຸນພົນ “ອັດຊູຣີ” ຕ່ຳເກີນໄປລັງຈາກທີ່ທັບນັກເຕະຈາກແດນກະໂລນີຈັດການເອົາຊະນະ “ກະທິງໂຫດ” ສະເປນ 2-0 ໃນ ຢູໂຣ 2016 ຮອບ 16 ທີມສຸດທ້າຍເມື່ອວັນຈັນທີ່ຜ່ານມາ.

 

ອີຕາລີຕາຍແບບເບິ່ງບໍ່ໄດ້ໃຫ້ສະເປນ 0-4 ໃນນັດຊິງ ຢູໂຣ 2012 ແຕ່ຫຼ້າສຸດ “ອັດຊູຣີ” ກໍຈັດການເອົາຄືນດ້ວຍການເອົາຊະນະ “ກະທິງໂຫດ” 2-0 ຈາກປະຕູຂອງ ຈໍໂຈ ຄິເອວລິນີ ແລະ ກຣາເຊຍໂນ ເປວເລ ສົ່ງຜົນໃຫ້ແຊມເກົ່າຕ້ອງຢຸດເສັ້ນທາງລົງແຕ່ຮອບ 16 ທີມສຸດທ້າຍເທົ່ານັ້ນ.

 

ກ່ອນໜ້ານີ້ທີມຂອງ ອັນໂຕນິໂອ ຄອນເຕ ຖືກສື່ທົ່ວໂລກເບິ່ງວ່າເປັນທີມຊາດອີຕາລີຊຸດທີ່ຕົກຕ່ຳທີ່ສຸດໃນທົວນາເມນໃຫຍ່ເຊິ່ງເປັນສິ່ງທີ່ ບຸບຟອນ ຊີ້ວ່າຜູ້ຈັດການທີມ ແລະ ທຸກຄົນໃນທີມຕາງກໍບໍ່ລືມເລື່ອງນີ້ ແລະ ຕ້ອງການພິສູດຕົນເອງໃຫ້ໄດ້.

 

ສຳລັບອີຕາລີຈະຕ້ອງພົບກັບເຢຍລະມັນໃນຮອບ 8 ທີມສຸດທ້າຍວັນເສົານີ້.