ບຸນຊ່ວງເຮືອປະເພນີປີນີ້ ນະຄອນຫຼວງຈະນໍາໃຊ້ເຈົ້າໜ້າທີ່ເຖິງ 300 ຄົນ

      ພະແນກຈະລາຈອນ ນະຄອນຫລວງວຽງຈັນ, ຈະໄດ້ຈັດຕັ້ງປະຕິບັດ ຕາມແຜນການຂອງກອງບັນຊາການ ປກສ ນະຄອນຫລວງວຽງຈັນ ໂດຍສະເພາະ ຈະໄດ້ນຳໃຊ້ ເຈົ້າໜ້າທີ່ຈຳນວນ 300 ຄົນ ປະຈຳຢູ່ຕາມເສັ້ນທາງຕ່າງໆ ເພື່ອອຳນວຍຄວາມສະດວກ ແລະ ຮັບປະກັນ ໄດ້ຄວາມປອດໄພ ໃຫ້ພໍ່ແມ່ປະຊາຊົນ ທີ່ຈະເດີນທາງມາ ທ່ຽວງານບຸນອອກພັນສາ ປະວໍລະນາ, ວາງສະແດງສິນຄ້າ, ຊ່ວງເຮືອປະເພນີ ທີ່ ທ່າວັດຈັນ ເມືອງຈັນທະບູລີ ເຊິ່ງໃນລະຫວ່າງ ມື້ບຸນຊ່ວງເຮືອປະເພນີ ວັນທີ 14-17 ຕຸລາ ທີ່ຈະເຖິງນີ້ ຫ້າມພາຫະນະທຸກປະເພດ ນຳໃຊ້ຖະໜົນເຈົ້າຟ້າງຸ່ມ (ແຄມຂອງ) ເລີ່ມແຕ່ 3 ແຍກຄຣິກນິກສາກົນ ຫາສາມແຍກປາກປາສັກ ສະເພາະ ພາຫະນະຂົນສົ່ງ ສິນຄ້າປະເພດຕ່າງໆ ທີ່ມີຈຸດປະສົງ ຈະນຳເອົາສິນຄ້າ ເຂົ້າໄປຂາຍໃນງານບຸນ ແມ່ນອະນຸຍາດ ໃຫ້ນຳສົ່ງເຄື່ອງແຕ່ເວລາ 5:00-09:00 ໂມງເຊົ້າ.

ແຫຼ່ງຂ່າວ: ສໍານັກຂ່າວສານປະເທດລາວ.