ບາໂບຊ້າເຈັ໋ງ!!ພ້ອມຫຼິ້ນທຸກຕຳແໜ່ງໃຫ້ງູໃຫຍ່

 

ກາບຽວ ບາໂບຊ້າ ຫົວຫອກໂຕໃໝ່ຂອງ ອິນເຕີ ມິລານ ລະບຸຊັດເຈນວ່າພ້ອມຫຼິ້ນທຸກຕຳແໜ່ງໃຫ້ທີມ ພ້ອມກັບຊີ້ລີກອີຕາລີເນັ້ນແທັກຕິກຫຼາຍກວ່າລີກບາຊິວບ້ານເກີດ.

 

ກາບຽວ ບາໂບຊ້າ ກອງໜ້າຄົນໃໝ່ຂອງ ອິນເຕີ ມິລານ ສະໂມສອນຍັກໃຫຍ່ຂອງ ກັນໂຊ ຊີຣີ ອາ ເປີດເຜີຍວ່າຕົນຍິນດີ ແລະ ພ້ອມທີ່ຈະຫຼິ້ນທຸກບົດບາດຕາມຄຳສັ່ງຂອງ ແຟຣັງ ເດີ ບົວ ເທຣນເນີຈອມແທັກຕິກຂອງ “ງູໃຫຍ່”.

 

ດາວຍິງທີ່ມີຊື່ຫຼິ້ນວ່າ “ກາບິໂກ” ຫາກໍຍ້າຍມາຈາກ ຊານໂຕສ ສະໂມສອນຊັ້ນນຳໃນລີກບາຊິວເມື່ອຊ່ວງເດືອນສິງຫາທີ່ຜ່ານມາ ແລະ ມີໂອກາດທີ່ຈະໄດ້ລົງຫຼິ້ນນັດທຳອິດໃນນາມນັກເຕະຂອງ “ງູໃຫຍ່” ໃນເກມລີກນັດທີ່ທີມມີຄິວເປີດຮັງ ຈູເຊັບເປ້ ເມອັດຊ້າ ດວນກັບ ໂບໂລນຢາ ວັນອາທິດທີ 25 ນີ້.

 

“ຂ້ອຍສາມາດຫຼິ້ນໄດ້ທຸກບົດບາດ ມັນກໍຂຶ້ນຢູ່ກັບຄວາມຕ້ອງການຜູ້ຈັດການທີມ ຂ້ອຍພຽງແຕ່ຕ້ອງຊ່ວຍທີມ ຂ້ອຍກຳລັງຕັ້ງໜ້າຕັ້ງຕາລໍຖ້າເກມທຳອິດຂອງຂ້ອຍ ຕອນນີ້ທີມເຮົາກຳລັງຫຼິ້ນໄດ້ດີ ເຊິ່ງເຮົາກໍຕ້ອງພະຍາຍາມຫຼິ້ນແບບນີ້ຕໍ່ໄປເລື້ອຍໆ”.

 

“ຂ້ອຍເບິ່ງເຫັນຄວາມແຕກຕ່າງຢ່າງຊັດເຈນລະຫວ່າງລີກນີ້ກັບລີກຂອງບາຊິວ ລີກອີຕາລີຈະເນັ້ນເລື່ອງແທັກຕິກຫຼາຍກວ່າ ແລະ ມີການປະທະທີ່ໜັກກວ່າແຕ່ຂ້ອຍກໍພ້ອມແລ້ວ” ຫົວຫອກທີມຊາດແຊມບ້າກ່າວ.