ບາຊາເຊັງ!!ສະຫະພັນສະເປນປັດອຸທອນໂທດແບນເນມາ

 

ສະຫະພັນບານເຕະສະເປນປັດອຸທອນໂທດແບນຂອງ ເນມາ ຫົວຫອກ ບາເຊໂລນາ ຮຽບຮ້ອຍແລ້ວເຮັດໃຫ້ນັກເຕະໝົດໂອກາດຮ່ວມທີມບຸກຖິ່ນ ເຣອັນ ມາດຣິດ ໃນການເຮັດເສິກ ເອວ ກລາສິໂກ ວັນອາທິດນີ້.

 

ສະຫະພັນບານເຕະສະເປັນ ຫຼື ອາເອຟອີເອຟ ປະຕິເສດການອຸທອນໂທດແບນ 3 ເກມຂອງ ເນມາ ກອງໜ້າເລືອດແຊມບາຂອງ ບາເຊໂລນາ ສະໂມສອນຍັກໃຫຍ່ຂອງເວທີ ລາ ລີກາ ສະເປນ ສົ່ງຜົນໃຫ້ນັກເຕະໝົດສິດຊ່ວຍທີມເຮັດເສິກ ເອວ ກລາສິໂກ ກັບ ເຣອັນ ມາດຣິດ ວັນອາທິດນີ້ແນ່ນອນ.

 

ດາວເຕະທີມຊາດບາຊິວອາຍຸ 25 ປີໄດ້ຮັບໃບເຫຼືອງທີສອງຈົນເປັນໃບແດງໃນເກມທີ່ປລາໄຊໃຫ້ກັບ ມາລາກາ 0-2 ເມື່ອຕົ້ນເດືອນເມສາທີ່ຜ່ານມາເຊິ່ງນັ້ນເຮັດໃຫ້ເຂົາຈະຖືກໂທດແບນ 1 ເກມຢູ່ແລ້ວແຕ່ຕອນທີ່ກຳລັງຍ່າງອອກຈາກສະໜາມນັ້ນ ເນມາ ຖືກຈັບພາບໄດ້ວ່າສະແດງທ່າທາງບໍ່ເໝາະສົມໃສ່ກຳມະການ ເຮສຸດ ກິວ ມານຊາໂນ ກັບຜູ້ຕັດສິນທີ 4 ເຮັດຄືວ່າເປັນການເຮັດໃສ່ນັ້ນເອງ.

 

ຈາກເຫດການດັ່ງກ່າວເຮັດໃຫ້ ເນມາ ຖືກແບນເພີ່ມອີກ 2 ເກມທັນທີເພາະລີກຂອງສະເປນມີການຕັ້ງກົດເອົາໄວ້ວ່ານັກເຕະທຸກຄົນມີສິດຖືກລົງໂທດແບນໜັກກວ່າເກົ່າຖ້າວ່າພວກເຂົາສະແດງທ່າທາງປະຊົດປະຊັນທີມຂອງຜູ້ຕັດສິນ.

 

ກ່ອນໜ້ານີ້ ເນມາ ຫາກໍຊົດໃຊ້ໂທດແບນເກມທຳອິດທີ່ ບາຊາ ເອົາຊະນະ ເຣອັນ ໂຊຊິດາດ 3-2 ເມື່ອວັນເສົາທີ່ຜ່ານມາສະນັ້ນໂທດແບນທີ່ເຫຼືອ 2 ເກມພົບກັບ “ລາຊາຊຸດຂາວ” ວັນອາທິດນີ້ ແລະ ເກມດວນກັບ ໂອຊາຊູນາ ວັນທີ 26 ເມສາ.