ບາຊາເຈັບຕັບ!!ປີເກເຈັບນັ່ງຍາວ 3 ອາທິດ

 

ເຄຫຼາດ ປີເກ້ ກອງຫຼັງ ບາເຊໂລນາ ໂຊກຮ້າຍຮັບບາດເຈັບຂໍ່ຫາຕ້ອງພັກ 3 ອາທິດສົ່ງຜົນໃຫ້ຈະອົດລົງຊ່ວຍທີມໃນເກມໄປຢາມ ແມນຊີຕີ ຊ່ວງຕົ້ນເດືອນໜ້າ ຂະນະທີ່ ຈໍດີ ອາວບາ ຟູແບັກຈອມບຸກຄາດອົດລົງຫຼິ້ນປະມານ 2 ອາທິດ.

 

ບາເຊໂລນາ ຍັກໃຫຍ່ ລາ ລີກາ ສະເປນຢືນຢັນວ່າ ເຄຫຼາດ ປີເກ ກອງຫຼັງໂຕເກັ່ງໝົດສິດລົງສະໜາມ 3 ອາທິດຫຼັງບາດເຈັບຂໍ່ຂາມາຈາກເກມເປີດຮັງ ແຄມນູ ໄລ່ທະລົ່ມ ແມນເຊສເຕີ ຊີຕີ 4-0 ໃນ ຢູຟາ ແຊມປຽນລີກ ຮອບແບ່ງກຸ່ມ ກຸ່ມຊີ ນັດສາມເມື່ອວັນພຸດທີ່ຜ່ານມາ.

 

ກອງຫຼັງອາຍຸ 29 ປີຕ້ອງຖືກປ່ຽນໂຕອອກຕັ້ງແຕ່ກ່ອນຈົບເຄິ່ງທຳອິດ ແລະ ຜົນການກວດກໍອອກມາວ່າອາການບາດເຈັບເອັນຂໍ່ຫາຂວາຕ້ອງພັກປະມານ 3 ອາທິດສົ່ງຜົນໃຫ້ຈະໝົດສິດລົງສະໜາມໃນເກມບຸກໄປຢາມ ແມນ ຊີຕີ ວັນອັງຄານທີ 1 ພະຈິກນີ້.

 

ຂະນະດຽວກັນ ຈໍດີ ອາວບາ ແບັກຊ້າຍຂອງ ບາຊາ ທີ່ຖືກປ່ຽນໂຕອອກຕັ້ງແຕ່ນາທີທີ່ 9 ກໍຄາດວ່າຈະຕ້ອງພັກຍາວ 2 ອາທິດເຮັດໃຫ້ ຫຼຸຍ ເອັນຣິເກ ນາຍໃຫຍ່ຂອງທີມຕ້ອງເຈັບເສັ້ນກັບການຈັດທັບ.

 

“ມັນເປັນເລື່ອງທີ່ກັງວົນຕະຫຼອດໃນເວລາທີ່ເຈົ້າຕ້ອງເສຍນັກເຕະໄປເພາະອາການບາດເຈັບ ຂ້ອຍເຊື່ອວ່າພວກເຮົາຕ້ອງພົບກັບງານຍາກໃນການໄປຫຼິ້ນທີ່ແມນເຊສເຕີ” ເອັນຣິເກ ກ່າວ.