ບາຊາຢັນມາສເຄຣາໂນຕໍ່ສັນຍາຮອດປີ 2019

 

ບາເຊໂລນາ ຟັງທຸງ ຮາເວຍ ມາສເຄຣາໂນ ກຽມຂະຫຍາຍສັນຍາກັບທີມອອກໄປຈົນຮອດປີ 2019 ຫຼັງຈາກທີ່ນັກເຕະມີຂ່າວກ່ຽວພັນກັບເລື່ອງຍ້າຍທີມມາຕະຫຼອດ.

 

ບາເຊໂລນາ ສະໂມສອນຍັກໃຫຍ່ຂອງ ລາ ລີກາ ສະເປນປະກາດຢືນຢັນເມື່ອວັນພະຫັດທີ່ຜ່ານມາວ່າ ຮາເວຍ ມາສເຄຣາໂນ ກອງຫຼັງອາເຈັນຕິນາໄດ້ຕົກລົງທີ່ຈະຕໍ່ສັນຍາຢູ່ກັບ ບາຊາ ອອກໄປຈົນຮອດທ້າຍເດືອນມິຖຸນາປີ 2019 ຮຽບຮ້ອຍ ໂດຍຈະມີການເຊັນສັນຍາຢ່າງທາງການໃນວັນຈັນທີ 17 ຕຸລານີ້.

 

ກ່ອນໜ້ານີ້ ມາສເຄຣາໂນ ຕົກເປັນຂ່າວກ່ຽວພັນກັບເລື່ອງການຍ້າຍທີມຢ່າງຕໍ່ເນື່ອງ ໂດຍເຊື່ອກັນວ່າເຂົາກຳລັງໄດ້ຮັບຄວາມສົນໃຈຈາກສະໂມສອນໃນ ໄຊນິສ ຊູເປີລິກ ຢ່າງໃດກໍຕາມຫຼ້າສຸດດາວເຕະທີມຊາດອາເຈັນຕິນາຕົກລົງທີ່ຈະຂະຫຍາຍສັນຍາກັບ ບາຊາ ອອກໄປອີກ 3 ປີຮຽບຮ້ອຍ.

 

“ການຕໍ່ສັນຍາຂອງ ຮາເວຍ ມາສເຄຣາໂນ ກັບ ບາເຊໂລນາ ຈະມີຂຶ້ນໃນວັນຈັນທີ 17 ຕຸລານີ້ ແລະ ນັ້ນຈະເຮັດໃຫ້ ຮາເວຍ ມາສເຄຣາໂນ ໄດ້ຢູ່ກັບ ບາເຊໂລນາ ຈົນຮອດວັນທີ 30 ມິຖຸນາ 2019” ຖະແຫຼງການຢືນຢັນຈາກ ບາເຊໂລນາ ລະບຸ.