ບາຊາຊືມ!!!ຊົວເຣດຖືກແບນ 2 ເກມ

 

ສະຫະພັນບານເຕະສະເປນສັ່ງແບນ ຫຼຸຍ ຊົວເຣດ ດາວຍິງຂອງ ບາເຊໂລນາ 2 ເກມໂດຍຈະໃຫ້ມີຜົນສະເພາະເກມບານເທົ່ານັ້ນ ເຊິ່ງມັນເຮັດໃຫ້ນັກເຕະຈະບໍ່ໄດ້ລົງຫຼິ້ນໃນເກມ ໂກປາ ເດວ ເຣ ນັດຊິງຊະນະເລີດກັບ ອະລາເບສ ທັນທີ.

 

ຫຼຸຍຊົວ ຊົວເຣດ ກອງໜ້າຄົນເກັ່ງຂອງ ບາເຊໂລນາ ສະໂມສອນຍັກໃຫຍ່ຂອງ ລາ ລີກາ ສະເປນ ຖືກສະຫະພັນບານເຕະສະເປນ ຫຼື ອາເອຟອີເອຟ ລົງໂທດແບນ 2 ນັດຈາກການທີ່ເຂົາຖືກໄລ່ອອກຈາກສະໜາມໃນເກມ ໂກປາ ເດວ ເຣ ຮອບຮອງຊະນະເລີດນັດສອງທີ່ຕົ້ນສັງກັດສະເໝີກັບ ແອັດເລຕິໂກ ມາດຣິດ 1-1 ເມື່ອວັນອັງຄານທີ່ຜ່ານມາ.

 

ສຳລັບໂທດແບນດັ່ງກ່າວຈະມີຜົນສະເພາະເກມບານຂັນເທົ່ານັ້ນ ນັ້ນໝາຍຄວາມວ່າດາວເຕະອູຣູກວາຍຈະໝົດສິດລົງຊ່ວຍທີມໃນເກມ ໂກປາ ເດວ ເຣ ນັດຊິງດຳທີ່ທີມຂອງ ຫຼຸຍ ເອັນຣິເກ ຈະພົບກັບ ເດປໍຕິໂບ ອະລາເບສ ຊ່ວງເດືອນພຶດສະພານີ້ທັນທີ.

 

ທັງນີ້ໃນນັດດັ່ງກ່າວ ຊົວເຣດ ຖືກໃບເຫຼືອງທີສອງເປັນໃບແດງໄລ່ອອກຈາກສະໜາມໃນນາທີ 90 ຈາກການທີ່ເຂົາເຮັດຄືວ່າຈະໄປຟາດແຂນໃສ່ອີກຝ່າຍ ເຊິ່ງໂທດແບນໃນເທື່ອນີ້ນັ້ນ ສ່ວນໜຶ່ງມາຈາກການຖືກໄລ່ອອກ ຂະນະທີ່ອີກສ່ວນມາຈາກການທີ່ເຂົາບໍ່ຍອມເຂົ້າໄປໃນຫ້ອງແຕ່ງຕົວທັນທີຫຼັງຖືກໄລ່ອອກຈາກສະໜາມ.

 

ຢ່າງໃດກໍຕາມ ການຖືກແບນ 2 ເກມຂອງ ຊົວເຣດ ຖືວ່າເກີນຄວາມຄາດໝາຍຂອງ ບາເຊໂລນາ ເພາະວ່າ “ອະຊູກຣານາ” ນຶກວ່າດາວຍິງຂອງທີມຈະຖືກແບນພຽງນັດດຽວ ໂດຍກ່ອນໜ້ານີ້ພວກເຂົາປະກາດໄປແລ້ວວ່າບໍ່ວ່າຈັ່ງໃດກໍຈະອຸທອນໂທດແບນຂອງຫົວຫອກທີມຊາດອູຣູກວາຍແນ່ນອນ.